پیدائش 11

بابل شہر دا بُرج

1اُوں ویلے تئیں پُوری دُنیا دے لوک ہِک ای زبان تے بولی بُولیندے ہَن۔ 2مشرق دو ودھدے ودھدے او سنعار دے ہِک میدان ءچ پُج تے اُتھاں آباد تھئے۔ 3اُتھاں او ہِک ڈُوجھے کُوں آکھنڑ لگے، ”آؤ اساں مِٹی نال سِلہاں بنڑا تے اُنہاں کُوں بھاہ ءچ چنگی طرحاں پکاؤں۔“ اُنہاں اُساری دے کم کیتے پتھر دی جاہ تے سِلہاں، تے مسالہ دی جاہ تے لُک اِستعمال کیتی۔ 4وَل او آکھنڑ لگے ”آؤ اساں آپنڑے کیتے شہر بنڑاؤں، جیندے ءچ اِیہو جِیہا بُرج ہووے جیہڑا اسمان تئیں پُج ونجے۔ وَل ساڈا ناں قائم راہسی تے اساں زمین اُتے کِھنڈݨ تُوں بچ ویسوں۔“

5پر رب العالمین اُوں شہر تے بُرج کُوں ڈیکھنڑ کیتے لہہ آیا جِینکُوں لوک بنڑیندے پئے ہَن۔ 6رب العالمین آکھیا، ”ایہ لوک ہِک قوم ہِن تے ہِکو زبان بُولیندے ہِن، تے جیہڑا او کرݨ چاہندے ہِن، ایہ صرف اُوندا شروع ہے۔ ہُنڑ تُوں جیہڑا کُجھ وی او رَل تے کرݨ چاہسن، او اُنہاں کیتے ناممکن نہ ہوسی۔ 7اِیں کیتے آؤ اساں زمین اُتے لہہ تے اُنہاں دی زبان ءچ اِختلاف پا ڈیؤں تاں جو او ہِک ڈُوجھے دی گالھ نہ سمجھ سگن۔“

8اِیں طریقے نال رب العالمین اُنہاں کُوں ساری زمین اُتے کِھنڈا ڈِتا تے شہر دی اُساری رُک گئی۔ 9اِیں کیتے شہر دا ناں بابل1 پے گِیا کیوں جو رب العالمین اُتھاں سبھ لوکاں دیاں زباناں ءچ اِختلاف پا تے اُنہاں کُوں ساری زمین اُتے کِھنڈا ڈِتا۔

سم دا شجرہ

10سم دا شجرہ ایہ ہے:

سم سو (100) سال دا ہا جِیں ویلے اُوندا پوتر ارفکسد جمیا۔ ایہ سیلاب دے ڈُو سال بعد تھیّا۔ 11اِیندے بعد سم بِیا پنج سو (500) سال زندہ ریہا تے اُوندے بئے دِھیاں پوتر وی جمّے۔

12ارفکسد پینتریح (35) سال دا ہا جِیں ویلے سِلح پیدا تھیّا۔ 13اِیندے بعد ارفکسد بِیا چار سو ترے (403) سال زندہ ریہا تے اُوندے بئے دِھیاں پوتر وی جمّے۔

14سِلح ترِیح (30) سال دا ہا جِیں ویلے عِبر جمیا۔ 15اِیندے بعد سِلح بِیا چار سو ترے (403) سال زندہ ریہا تے اُوندے بئے دِھیاں پوتر وی جمّے۔

16عِبر چونتریح (34) سال دا ہا جِیں ویلے فلج جمیا۔ 17اِیندے بعد عِبر بِیا چار سو ترِیح (430) سال زندہ ریہا تے اُوندے بئے دِھیاں پوتر وی جمّے۔

18فلج ترِیح (30) سال دا ہا جِیں ویلے رعُو جمیا۔ 19اِیندے بعد فلج بِیا ڈُو سو نؤں (209) سال زندہ ریہا تے اُوندے بئے دِھیاں پوتر وی جمّے۔

20رعُو بترِیح (32) سال دا ہا جِیں ویلے سروج جمیا۔ 21اِیندے بعد رعُو بِیا ڈُو سو سَت (207) سال زندہ ریہا تے اُوندے بئے دِھیاں پوتر وی جمّے۔

22سروج ترِیح (30) سال دا ہا جِیں ویلے نحُور جمیا۔ 23اِیندے بعد سروج بِیا ڈُو سو (200) سال زندہ ریہا تے اُوندے بئے دِھیاں پوتر وی جمّے۔

24نحُور اُنہتّریح (29) سال دا ہا جِیں ویلے تارح جمیا۔ 25اِیندے بعد نحُور بِیا ہِک سو اُنوِیہہ (119) سال زندہ ریہا تے اُوندے بئے دِھیاں پوتر وی جمّے۔

26تارح ستّر (70) سال دا ہا جِیں ویلے اُوندے پوتر ابرام، نحُور تے حاران جمّے۔

27تارح دا شجرہ ایہ ہے:

ابرام، نحُور تے حاران تارح دے پوتر ہَن۔ لُوط حاران دا پوتر ہا۔ 28آپنڑے پِیُو تارح دے جِیندے جی حاران کسدیاں دے شہر اُور ءچ مر گِیا جِتھاں او جمیا وی ہا۔

29باقی ڈوہاں پوتراں دی شادی تھئی۔ ابرام دی ذال دا ناں سارئی تے نحُور دی ذال دا ناں مِلکہ ہا۔ مِلکہ حاران دی دِھی ہئی تے اُوندی ہِک بھینڑ اِسکہ ہئی۔ 30سارئی بانجھ ہئی، اِیں کیتے اُوندے بال نہ ہَن۔

31تے تارح آپنڑے پوتر ابرام، آپنڑی نُونہہ سارئی تے آپنڑے پوترے لُوط کُوں جیہڑا حاران دا پوتر ہا، نال گِھن تے کسدیاں دے شہر اُور تُوں روانہ تھی تے کنعان ملک دو سفر کرݨ لگا۔ جِیں ویلے او حاران شہر پُجے تاں اُتھاں راہوݨ لگے۔ 32تارح ڈُو سو پنج (205) سال دا ہا جِیں ویلے او حاران ءچ فوت تھیّا۔