پیدائش 12

خُدا ابرام کُوں چُنڑدے

1رب العالمین ابرام کُوں آکھیا، ”آپنڑے مُلک، آپنڑے رشتے داراں تے آپنڑے پِیُو دے گھر کُوں چھوڑ تے اُوں مُلک دو چلیا وَنج جیہڑا مَیں تیکُوں ڈِکھیساں۔ 2مَیں تَیں ءچوں ہِک وڈی قوم بنڑیساں، تیکُوں برکت ڈیساں تے تیڈے ناں کُوں بہُوں ودھیساں۔ تُوں ڈُوجھیاں کیتے برکت دا وسیلہ ہوسیں۔ 3جیہڑے تیکُوں برکت ڈیسن اُنہاں کُوں مَیں وی برکت ڈیساں تے جیہڑا تیڈے اُتے لعنت کریسی اُوندے اُتے مَیں وی لعنت کریساں۔ دُنیا دیاں سبھ قوماں تیڈے وسیلے نال برکت پیسن۔“

4ابرام رب العالمین دے آکھنڑ دے مطابق حاران تُوں ٹُر پِیا۔ لُوط اُوندے نال ہا۔ اُوں ویلے ابرام پنجھتر (75) سال دا ہا۔ 5اُوں آپنڑی ذال سارئی تے بھتریجے لُوط کُوں آپنڑے نوکراں چاکراں تے ساری جائیداد سمیت جیہڑی اُونکُوں حاران ءچ مِلی ہئی، نال گِھن گِھدا تے کنعان مُلک کیتے روانہ تھیّا۔ ٹُردے ٹُردے او کنعان پُجے۔ 6ابرام اُوں مُلک ءچوں لنگھ تے سِکم شہر دے اُوں مقام اُتے ٹِک گِیا جِتھاں مورہ دے بلُوط1 دا درخت ہا۔ اُوں زمانے ءچ اُوں مُلک ءچ کنعانی قوماں آباد ہَن۔

7اُتھاں رب العالمین ابرام اُتے ظاہر تھیّا تے آکھیا، ”مَیں ایہ مُلک تیڈی اولاد کُوں ڈیساں۔“ اِیں کیتے اُوں رب العالمین دی تعظیم ءچ اُوں جاہ تے ہِک قُربان گاہ بنڑائی، جِتھاں او اُوندے اُتے ظاہر تھیّا ہا۔ 8اُتھوں او اُوں پہاڑی علاقے دو گِیا جیہڑا بیت ایل دے مشرق ءچ ہے۔ اُتھاں اُوں آپنڑا ڈیرہ لایا جیندے مغرب ءچ بیت ایل تے مشرق ءچ عَی ہا۔ اِیں جاہ تے وی اُوں رب العالمین دی تعظیم ءچ ہِک قُربان گاہ بنڑائی تے رب العالمین دا ناں گِھن تے عبادت کیتی۔

9وَل ابرام اُتھواں روانہ تھی تے جنُوبی بیابان دو ٹُر پِیا۔

ابرام مِصر ءچ

10اُنہاں ڈینہاں ءچ کنعان مُلک ءچ کال پے گیا۔ کال اِتنا سخت ہا جو ابرام کُجھ دیر مِصر راہوݨ کیتے روانہ تھیّا۔ 11جِیں ویلے او مِصر دی سرحد تے پُجیا تاں اُوں آپنڑی ذال سارئی کُوں آکھیا، ”مَیں جانڑدا ہاں جو تُوں بہُوں سوہنڑی ہیں۔ 12مِصری تیکُوں ڈیکھ تے اکھیسن، ’ایہ اِیندی ذال ہے،‘ تے او میکُوں مار ڈیسن پر تیکُوں زندہ چھوڑ ڈیسن۔ 13اِیں کیتے لوکاں کُوں آکھیں، ’مَیں ابرام دی بھینڑ ہاں۔‘ وَل تیڈے سببّوں میڈی جان بچ ویسی تے میڈے نال چنگا سلوک کیتا ویسی۔“

14جِیں ویلے ابرام مِصر پُجیا تاں مِصریاں ڈِٹھا جو سارئی واقعی بہُوں سوہنڑی ہے۔ 15تے جِیں ویلے فرعون2 دے افسراں سارئی کُوں ڈِٹھا تاں اُنہاں فرعون دے سامنڑے اُوندی تعریف کیتی تے آخر کار اُونکُوں محل ءچ پُچایا گِیا۔ 16فرعون سارئی دی خاطر ابرام اُتے مہربانی کریندے ہوئے اُونکُوں بھیڈ بکریاں، گائیں ڈاند، کھوتے کھوتیاں، نوکر چاکر تے اُوٹھ ڈِتے۔

17پر رب العالمین سارئی دے سببّوں فرعون تے اُوندے گھرانڑے ءچ سخت قِسم دیاں بیماریاں کِھنڈائیاں۔ 18آخر کار فرعون ابرام کُوں سڈ تے آکھیا، ”تُوں میڈے نال ایہ کیا کیتے؟ تَیں میکُوں کیوں نئیں ڈسایا جو سارئی تیڈی ذال ہے؟ 19تَیں کیوں آکھے جو او میڈی بھینڑ ہے؟ اِیں سببّوں مَیں اُونکُوں گھر ءچ رکھ گِھدے تاں جو اُونکُوں پرنا گِھناں۔ پر ہُنڑ ڈیکھ تیڈی ذال حاضر ہے، اِینکُوں گِھن تے اِتُھوں نِکل وَنج۔“ 20وَل فرعون آپنڑے سپاہیاں کُوں حُکم ڈِتا تے اُنہاں ابرام تے اُوندی ذال کُوں اُوندی ساری جائیداد سمیت مُلک ءچوں باہر کڈھ ڈِتا۔