پیدائش 10

نُوح دی اولاد

1ایہ نُوح دے پوتراں سم، حام تے یافت دا شجرہ ہے۔ اُنہاں دے پوتر سیلاب تُوں بعد جمّے۔

یافت دی نسل

2یافت دے پوتر جُمر، ماجُوج، مادی، یاوان، تُوبل، مسک تے تِیراس ہَن۔ 3جُمر دے پوتر اَشکناز، ریفت تے تُجرمہ ہَن۔ 4یاوان دے پوتر اِلِیسہ تے ترسِیس ہَن۔ کِتّی تے دودانی وی اُوندی اولاد ہَن۔ 5او اُنہاں قوماں دے پِیُو ڈاڈا ہَن جیہڑیاں سمندر دے کنارے تے جزیریاں ءچ کِھنڈ گئیاں ہَن۔ ایہ یافت دی اولاد ہَن جیہڑے آپنڑے آپنڑے قبیلے تے وطن ءچ راہندے ہوئے آپنڑی آپنڑی بولی بُولیندے ہَن۔

حام دی نسل

6حام دے پوتر کُوش، مِصر، فوط تے کنعان ہَن۔ 7کُوش دے پوتر سبا، حوِیلہ، سبتہ، رعماہ تے سبتکہ ہَن۔ رعماہ دے پوتر سبا تے ددان ہَن۔

8کُوش دا ہِک بِیا پوتر ہا جِیندا ناں نِمرُود ہا۔ او دُنیا دا پہلا سُورما ہا۔ 9رب العالمین دے نزدیک او زبردست شکاری ہا، اِیں کیتے اَج وی آکھیا ویندے جو ایہ بندہ نِمرُود آلی کار ہے، جیہڑا رب العالمین دے نزدیک زبردست شکاری ہا۔ 10اُوندی سلطنت دے پہلے شہر سنعار مُلک ءچ بابل، ارک، اکّاد تے کلنہ ہَن۔ 11اُوں مُلک ءچوں نِکل تے او اسُور چلیا گِیا جِتھاں اُوں نِینوہ، رحوبوت عیر، کلح 12تے رسن دے شہر اُسارے۔ وڈا شہر رسن، نِینوہ تے کلح دے اَدھ ءچ ہے۔

13مِصر اِنہاں قوماں دا پِیُو ہا: لُودی، عنامی، لہابی، نفتُوحی، 14فترُوسی، کسلُوحی (جِنہاں ءچوں فِلِستی نِکلے) تے کَفتوری۔

15تے کنعان دا پلوٹھا صیدا ہا۔ کنعان اِنہاں قوماں دا پِیُو وی ہا: حِتّی، 16یبُوسی، اموری، جِرجاسی، 17حِوّی، عرقی، سِینی، 18اروادی، صِماری تے حماتی۔ بعد ءچ کنعانی قبیلے اِتنے کِھنڈ گئے 19جو اُنہاں دیاں حداں شمال ءچ صیدا تُوں جنُوب آلے پاسے جرار تُوں تھی تے غزہ تئیں تے اُتھوں مشرق آلے پاسے سدُوم، عمُورہ، اَدمہ تے ضِبیان تُوں تھیندیاں لسع تئیں ہَن۔

20ایہ سارے حام دی اولاد ہَن جیہڑے آپنڑے آپنڑے قبیلے تے وطن ءچ راہندے ہوئے آپنڑی آپنڑی بولی بُولیندے ہَن۔

سم دی نسل

21سم یافت دا وڈا بِھرا ہا۔ اُوندے وی پوتر جمّے۔ سم سبھ بنی عِبر دا پِیُو ہا۔

22سم دے پوتر عیلام، اسُور، ارفکسد، لُود تے ارام ہَن۔

23ارام دے پوتر عُوض، حُول، جتر تے مس ہَن۔

24ارفکسد دا پوتر سِلح تے سِلح دا پوتر عِبر ہا۔

25عِبر دے ڈُو پوتر جمّے، ہِک دا ناں فلج1 ہا، کیوں جو اُنہاں ڈینہاں ءچ دُنیا دی وَنڈ تھئی۔ فلج دے بِھرا دا ناں یُقطان ہا۔

26یُقطان دے پوتر الموداد، سلف، حصرماوت، اِراخ، 27ہدُورام، اُوزال، دِقلہ، 28عوبل، ابی مائیل، سبا، 29اوفِیر، حوِیلہ، تے یُوباب ہَن۔ ایہ سارے یُقطان دے پوتر ہَن۔ 30او مِیسا تُوں گِھن تے سفار دے مشرقی پہاڑی علاقے تئیں آباد ہَن۔

31ایہ سبھ سم دی اولاد ہَن جیہڑے آپنڑے آپنڑے قبیلے تے وطن ءچ راہندے ہوئے آپنڑی آپنڑی بولی بُولیندے ہَن۔

32ایہ سبھ نُوح دے پوتراں دے قبیلے ہِن جیہڑے آپنڑیاں نسلاں تے قوماں دے مطابق درج کیتے گئے ہِن۔ سیلاب تُوں بعد سبھ قوماں اِنہاں ءچوں نِکل تے زمین اُتے کِھنڈ گئیاں۔