پیدائش 50

یعقُوب کُوں دفن کیتا ویندے

1یُوسف آپنڑے پِیُو نال چمبڑ گِیا تے روندے ہوئے اُوندا متھا چُمیا۔ 2اُوں اُنہاں حکیماں کُوں حُکم ڈِتا جو ”میڈے پِیُو دی لاش کُوں خوشبودار مصالحے لا تے سڑن تُوں محفوظ کرو۔“ بس اُنہاں اِینویں ای کیتا۔ 3اِیں کم ءچ چالیہہ ڈینہہ لگ گئے کیوں جو لاش محفوظ کرݨ کیتے اِتنا وقت لگدا ہا۔ مِصری ستّر ڈینہہ تئیں یعقُوب کیتے ماتم کریندے ریہے۔

4جِیں ویلے ماتم دے ڈینہہ لنگھ گئے تاں یُوسف فرعون دے درباریاں کُوں آکھیا، ”جے میڈے اُتے تُہاڈے کرم دی نظر ہووے تاں فرعون کُوں ایہ عرض کرو 5جو میڈے پِیُو قَسم ڈے تے میکُوں آکھیا ہا، ’مَیں مرݨ آلا ہاں۔ میکُوں اُوں قبر ءچ دفن کرائے جیہڑی میں کنعان مُلک ءچ آپنڑے کیتے بنڑوائی ہئی۔‘ ہُنڑ میکُوں اِجازت ڈیؤ جو مَیں اُتھاں وَنجاں تے آپنڑے پِیُو کُوں دفن کر آواں۔“

6فرعون جواب ڈِتا، ”وَنج آپنڑے پِیُو کُوں دفن کر جِینویں اُوں تیکُوں قَسم ڈِتی ہئی۔“

7اِیں واسطے یُوسف آپنڑے پِیُو کُوں دفن کرݨ کیتے کنعان چلیا گِیا۔ فرعون دے سارے افسر یعنی محل دے بزُرگ تے مِصر دے سارے بزُرگ اُوندے نال ہَن۔ 8یُوسف دے گھر آلے، اُوندے بِھرا تے اُوندے پِیُو دے گھر آلے وی نال گئے۔ صرف او آپنڑے بال تے آپنڑے ڈنگر جشن ءچ چھوڑ گئے۔ 9رَتھ تے گُھڑ سوار وی نال گئے۔ سارے مِل تے وڈا لشکر بنڑ گئے۔

10جِیں ویلے او یردن دریا دے پار اتد دی گہاوݨ آلی جاہ تے پُجے تاں اُنہاں بہُوں ڈُکھی اواز نال نوحہ کیتا۔ اُتھاں یُوسف سَت ڈینہہ تئیں آپنڑے پِیُو کیتے ماتم کیتا۔ 11جِیں ویلے کنعان دے مقامی لوکاں اتد دے گہاوݨ آلے جاہیں کولھ ماتم تھیندے ڈِٹھا تاں آکھیا، ”مِصریاں دا ایہ ماتم بہُوں ڈُکھی ہے۔“ اِیں کیتے اُوں جاہ دا ناں جیہڑی یردن دے پار ہے، ابیل مِصرِیئم1 پے گِیا۔

12اِینویں یعقُوب دے پوتراں آپنڑے پِیُو دا حُکم پُورا کیتا۔ 13اُنہاں یعقُوب دی میّت کُوں کنعان گِھن وَنج تے مکفیلہ دے کھیت آلی غار ءچ دفن کیتا جیہڑی مَمرے دے مشرق ءچ ہے۔ ایہ اُوہو غار ہے جیہڑی ابرہام عِفرون حِتّی تُوں آپنڑے لوکاں کُوں دفن کرݨ کیتے مُل گِھدی ہئی۔

14آپنڑے پِیُو کُوں دفن کرݨ تُوں بعد یُوسف، اُوندے بِھرا تے جنازے ءچ شامل سارے لوک مِصر وَل آئے۔

یُوسف آپنڑے بِھرانواں کُوں تسلی ڈیندے

15جِیں ویلے یعقُوب مر گِیا تاں اُوندے بِھرا ڈر گئے۔ اُنہاں آکھیا، ”جے یُوسف نفرت رکھ تے ساڈی بدی دا بدلہ گِھنے جیہڑی اساں اُوندے نال کیتی ہئی، تاں کیا تھیسی؟“ 16ایہ آکھ تے اُنہاں یُوسف کُوں پیغام بھیجیا، ”تُہاڈے پِیُو مرݨ تُوں پہلے ہدایت کیتی ہئی 17جو یُوسف کُوں ڈسائے جو، ’آپنڑے بِھرانواں دے اُنہاں غلط تے بُرے کماں کُوں معاف کر ڈیوائے جیہڑے اُنہاں تیڈے نال کیتے ہَن۔‘ اِیں واسطے ہُنڑ ساکُوں معاف کر ڈیؤ جیہڑے تُہاڈے پِیُو دے خُدا دے بندے ہیں۔“

ایہ پیغام سُنڑ تے یُوسف رو پِیا۔ 18وَل اُوندے بِھرا آپ آئے تے اُوندے سامنڑے ڈھے پئے۔ اُنہاں آکھیا، ”اساں تُہاڈے غُلام ہیں۔“

19پر یُوسف آکھیا، ”نہ ڈرو۔ کیا مَیں خُدا دی جاہ تے ہاں؟ 20تُساں میکُوں نُقصان پُچاوݨ دا اِرادہ کیتا ہا، پر خُدا اُوندے ءچوں بھلائی دا اِرادہ کیتا، تاں جو بہُوں سارے لوکاں دی جان بچاوے جِینویں اَج دے ڈینہہ تھیندا پئے۔ 21اِیں واسطے نہ ڈرو، مَیں تُہاڈا تے تُہاڈے بالاں دا خیال کریندا راہساں۔“

اِینویں یُوسف اُنہاں کُوں تسلی ڈِتی تے پیار نال گالھ کیتی۔

یُوسف دا اِنتقال

22یُوسف آپنڑے پِیُو دے خاندان نال مِصر ءچ ریہا۔ او ہِک سو ڈاہ سال زندہ ریہا۔ 23اُوں نہ صرف اِفرائِیم دے بالاں کُوں بلکہ اُوندے پوتریاں کُوں وی ڈِٹھا۔ منسّی دے پوتر مکِیر دے بال وی اُوندی جھولی ءچ رکھے گئے۔

24وَل ہِک ویلا آیا جو یُوسف آپنڑے بِھرانواں کُوں آکھیا، ”مَیں مرݨ آلا ہاں۔ پر خُدا تُہاڈے اُتے ضرور نظر کریسی تے تُہاکُوں اِیں مُلک تُوں کڈھ تے اُوں مُلک ءچ گِھن ویسی جِیندا اُوں ابرہام، اِضحاق تے یعقُوب کُوں ڈیوݨ دا وعدہ کیتا ہا۔“ 25وَل یُوسف بنی اِسرائیل کُوں قَسم ڈے تے آکھیا، ”خُدا تُہاڈے اُتے ضرور نظر کریسی۔ اُوں ویلے تُساں میڈیاں ہڈیاں وی چا تے اُتھاں ضرور گِھن وَنجائے۔“

26وَل یُوسف فوت تھی گِیا۔ او ہِک سو ڈاہ سال دا ہا۔ اُوندی میّت کُوں سڑن تُوں محفوظ رکھنڑ کیتے خوشبودار مصالحے لا تے مِصر ءچ ہِک تابُوت ءچ رکھیا گِیا۔