خرُوج 1

یعقُوب دا خاندان مِصر ءچ

1تلے یعقُوب دے اُنہاں پوتراں دے ناں ہِن جیہڑے آپنڑے پِیُو یعقُوب تے آپنڑے خاندان سمیت مِصر ءچ آئے ہَن: 2رُوبِن، شمعون، لاوی، یہُوداہ 3اِشکار، زبُولُون، بِنیمِین، 4دان، نفتالی، جد تے آشر۔ 5اُوں ویلے یعقُوب دی اولاد دی تعداد ستّر ہئی۔ یُوسف تاں پہلے ای مِصر ءچ آ گِیا ہا۔

6مِصر ءچ راہندے ہوئے بہُوں عرصہ لنگھ گِیا تے یُوسف تے اُوندے سارے بِھرا تے اُوں نسل دے سارے لوک مر گئے۔ 7بنی اِسرائیل ودھدے ریہے تے گِنتری ءچ بہُوں زیادہ تھی گئے تے او بہُوں طاقتور وی تھی گئے۔ اِینویں پُورا مُلک اُنہاں نال بھریج گِیا۔

بنی اِسرائیل کُوں دبایا ویندے

8بہُوں عرصے بعد ہِک نواں بادشاہ مِصر دے تخت اُتے بیٹھا، جیہڑا یُوسف دے بارے ءچ نہ جانڑدا ہا۔ 9اُوں آپنڑے لوکاں کُوں آکھیا، ”بنی اِسرائیل کُوں ڈیکھو۔ او گِنتری تے طاقت ءچ ساڈے تُوں ودھ گئے ہِن۔ 10آؤ اساں عقل تُوں کم گِھنوں، نہ تاں او مزید ودھ ویسن۔ اِینویں نہ تھیوے جو کہیں ویلے جنگ چِھڑ ونجےتے او دُشمنڑ نال رَل تے ساڈے نال لڑن تے مُلک ءچوں نِکل ونجنڑ۔“

11اِیں واسطے مِصریاں بنی اِسرائیل اُتے نِگران مقرر کیتے تاں جو مُفت ءچ اُنہاں تُوں سخت کم گِھن تے اُنہاں کُوں دبائی رکھنڑ۔ اُوں ویلے اُنہاں پتوم تے رعمسِیس د ے شہر بنڑوائے جِنہاں ءچ فرعون بادشاہ دے وڈے وڈے گودام بنڑے۔ 12پر جِتنا بنی اِسرائیل کُوں دبایا گِیا اُتنے ای او گِنتری ءچ ودھدے تے کِھنڈدے گئے۔ آخر مِصری اُنہاں تُوں دہشت کھاوݨ لگ پئے، 13تے او وڈی بے رحمی نال اُنہاں تُوں کم کرویندے ریہے۔ 14اُنہاں بنی اِسرائیل کنُوں سخت محنت نال گارا تے سِلہاں بنڑوا بنڑوا تے، تے کھیتاں ءچ قِسم قِسم دے کم گِھن گِھن تے اُنہاں دی زندگی بہُوں اوکھی کر ڈِتی۔ اُنہاں بہُوں بے رحمی نال اُنہاں کنُوں کم گِھدا۔

دائیاں خُدا دا خوف رکھیندیاں ہِن

15عبرانیاں 1 دیاں ڈُو دائیاں ہَن جِنہاں دے ناں سِفرہ تے فوعہ ہَن۔ مِصر دے بادشاہ اُنہاں کُوں آکھیا: 16”جِیں ویلے عبرانی عورتاں تُہاکُوں مدد کیتے سڈݨ تاں خبردار رہوائے جو جیکر پوتر جمّے تاں اُونکُوں جانُوں مار ڈیوائے تے جیکر دِھی جمّے تاں اُونکُوں زندہ چھوڑ ڈیوائے۔“ 17پر دائیاں خُدا دا خوف رکھیندیاں ہَن۔ اِیں واسطے اُنہاں مِصر دے بادشاہ دا حُکم نہ منیا تے چھوہراں کُوں زندہ راہنڑ ڈِتا۔

18وَل مِصر دے بادشاہ اُنہاں کُوں ولا سڈ تے پُچھیا، ”تُساں ایہ کیوں کیتے؟ تُساں چھوہراں کُوں کیوں زندہ چھوڑ ڈیندیاں ہیوے؟“

19اُنہاں جواب ڈِتا، ”عبرانی عورتاں، مِصری عورتاں تُوں زیادہ مضبوط ہِن۔ اُنہاں دے بال ساڈے پُجنڑ تُوں پہلے ای جم پوندے ہِن۔“

20بس بنی اِسرائیل گِنتری ءچ ودھ تے بہُوں طاقتور تھی گئے تے خُدا دائیاں دا بھلا کیتا۔ 21کیوں جو دائیاں خُدا دا خوف رکھیندیاں ہَن، اِیں کیتے خُدا اُنہاں کُوں اولاد ڈِتی۔

22وَل فرعون آپنڑے مِصری لوکاں کُوں حُکم ڈِتا، ”جِیں ویلے وی عبرانیاں دے پوتر جمنڑ تاں اُنہاں کُوں نیل دریا ءچ سَٹ ڈیوائے پر صرف دِھیاں کُوں زندہ راہوݨ ڈیوائے۔“