پیدائش 49

یعقُوب آپنڑے پوتراں کُوں برکت ڈیندے

1وَل یعقُوب آپنڑے پوتراں کُوں سڈ تے آکھیا، ”میڈے کولھ کٹھے تھی ونجو تاں جو مَیں تُہاکُوں ڈساں جو آوݨ آلے ڈینہاں ءچ تُہاڈے نال کیا تھیسی؟

2یعقُوب دے پوترو! کٹھے تھی تے سُنڑو

آپنڑے پِیُو اِسرائیل دے گالھیں اُتے غور کرو

3رُوبِن! تُوں میڈا پلوٹھا ہیں

میڈے زور تے میڈی طاقت دا پہلا پھل ہیں

تُوں عزت تے قوت ءچ ڈُوجھیاں کنُوں وڈا ہیں

4پر تُوں سیلاب آلی کار بے قابو ہیں

اِیں کیتے ڈُوجھیاں کنُوں وڈا نہ راہسیں

کیوں جو تُوں آپنڑے پِیُو دے بسترے اُتے چڑھیا

اُونکُوں ناپاک کر تے میڈی بے حُرمتی کیتی۔

5شمعون تے لاوی ڈوہائیں ہِکو جِیہے بِھرا ہِن

اُنہاں دیاں تلواراں ظلم دے ہتھیار ہِن۔

6میڈی جان! اُنہاں دی مجلس ءچ شریک نہ تھی

نہ اُنہاں دی جماعت ءچ شامل تھی

کیوں جو اُنہاں کاوڑ ءچ آ تے مرداں کُوں قتل کیتا

تے خوامخواہ ڈانداں دیاں کُھچاں کٹیاں۔

7اُنہاں دی کاوڑ دی شِدت اُتے لعنت ہووے

تے اُنہاں دے طیش اُتے جیہڑا ایڈا سخت ہا

مَیں اُنہاں کُوں یعقُوب دے مُلک ءچ تِتربِتر

ہا، اِسرائیل ءچ کِھنڈا ڈیساں۔

8یہُوداہ! تیڈے بِھرا تیڈی تعریف کریسن

تُوں آپنڑے دُشمنڑاں دی گِچی پکڑی راہسیں

تے تیڈے پِیُو دے پوتر تیڈے سامنڑے جُھک ویسن

9یہُوداہ! تُوں ببرشیر دا بچہ ہیں

میڈے پوتر! تُوں شکار مار تے واپس آئیں

یہُوداہ ببرشیر بلکہ شیرنی آلی کار تاڑ ءچ بہہ ویندے

کوݨ اُونکُوں چھیڑن دی جُرأت کریسی؟

10یہُوداہ دی سلطنت ختم نہ تھیسی

شاہی عصا اُوندی اولاد تُوں دُور نہ تھیسی

جئیں تئیں اُوندا حقدار نہ آوے

جیندے تابع قوماں راہسن۔

11او آپنڑا جوان کھوتا انگُور دی ویل نال بدھیسی

آپنڑی گڈھاں دا بال بہترین انگُور دی ویل نال۔

او آپنڑا لباس انگُور دی کثرت پارُوں رَس ءچ

آپنڑی پُشاک انگُور دی رَت ءچ دھوسی۔

12اُوندے اکھیں رَس دے سببّوں رتّیاں

اُوندے ڈند کھیر پارُوں چِٹے ہوسن۔

13زبُولُون سمندر دے کنڈے تے آباد تھیسی

تے بحری جہازاں کیتے بندرگاہ ہوسی

اُوندی حد صیدا تئیں ہوسی۔

14اِشکار زورآور کھوتا ہے

جیہڑا ڈُو بوریاں دے وِچال بیٹھے

15اُوں ہِک چنگی ارام گاہ

تے سوہنڑا مُلک ڈیکھ تے

آپنڑا مونڈھا بھار چاوݨ کیتے جِھکا کیتا

تے غلاماں آلی کار بغیر پیسے دے کم کرݨ قبول کیتا۔

16دان اِسرائیل دے باقی قبیلیاں آلی کار

آپنڑی قوم دا اِنصاف کریسی۔

17دان سڑک اُتے سَپ آلی کار

تے رستے دے زہریلے نانگ آلی کار ہوسی

او گھوڑے دی کُھری اُتے ڈنگ مریسی

تے اُوندا سوار پِچُھوں ڈھے پوسی۔

18یا رب العالمین! مَیں تیڈی نجات دی تانگھ ءچ ہاں۔

19جد اُتے ڈاکواں دا جتھا حملہ کریسی

پر او مُڑ تے اُنہاں اُتے حملہ کریسی۔

20آشر بہترین خوراک پیدا کریسی

او لذیذ شاہی کھانڑے مُہیا کریسی۔

21نفتالی ازاد چُھٹی ہوئی ہرنی ہے

او مِٹھے مِٹھے گالھیں کریندے۔

22یُوسف پھلدار ویل ہے

چشمے دے کولھ لگی ہوئی پھلدار ویل

جیندیاں ٹاہنڑیاں کندھ اُتے چڑھ گئیاں ہِن۔

23تِیر چلاوݨ آلیاں سخت حملہ کیتا

اُنہاں اُونکُوں ماریا تے تنگ کیتا

24پر اُوندی کمان مضبوط ریہی

تے اُوندے بازو طاقتور ہَن

یعقُوب دے قادر خُدا دی مدد نال

اُوں آجڑی دے پارُوں

جیہڑا اِسرائیل دی چٹان ہے

25کیوں جو تیڈے پِیُو دا خُدا تیڈی مدد کریندے

قُدرت آلا خُدا تیکُوں اسمان دیاں برکتاں

زمین دے ڈونگھے جاہیں دیاں برکتاں

تے اولاد دیاں برکتاں ڈیسی۔

26تیڈے پِیُو دیاں برکتاں

میڈے پِیُو ڈاڈے دیاں برکتاں تُوں ودھ ہِن

تے قدیم پہاڑاں تُوں اُچیاں ہِن

ایہ سبھ برکتاں یُوسف دے سر اُتے ہووݨ

جیہڑا آپنڑے بِھرانواں ءچ افضل ہے۔

27بِنیمِین پھاڑن آلا نہر ہے

سویلے او آپنڑا شکار کھا ویندے

تے شام کُوں آپنڑا لُٹیا ہویا مال وَنڈ ڈیندے۔“

28ایہ اِسرائیل دے کُل بارہاں قبیلے ہِن تے ایہ او گالھیں ہِن جیہڑیاں اُنہاں دے پِیُو اُنہاں کُوں برکت دی دُعا ڈیندے ویلے آکھیاں۔ اُوں ہر ہِک کُوں مناسب برکت ڈِتی۔

یعقُوب دا اِنتقال

29وَل یعقُوب آپنڑے پوتراں کُوں حُکم ڈِتا، ”ہُنڑ مَیں آپنڑے پِیُو ڈاڈے کولھ ویندا پِیا ہاں۔ میکُوں میڈے پِیُو ڈاڈے نال اُوں غار ءچ دفن کرائے جیہڑی عِفرون حِتّی دے کھیت ءچ ہے 30یعنی او غار جیہڑی کنعان مُلک ءچ مَمرے دے سامنڑے مکفیلہ دے کھیت ءچ ہے۔ ابرہام اُوں غار کُوں کھیت سمیت قبرستان کیتے عِفرون حِتّی تُوں مُل گِھدا ہا۔ 31اُتھاں ابرہام تے اُوندی ذال سارہ کُوں دفن کیتا گِیا۔ اُتھاں اِضحاق تے اُوندی ذال رِبقہ دفن کیتے گئے تے اُتھاں مَیں لیاہ کُوں دفن کیتا۔ 32او کھیت تے غار بنی حِت تُوں مُل گِھدے گئے ہَن۔“

33ایہ ہدایات ڈیوݨ تُوں بعد یعقُوب آپنڑے پیر بسترے اُتے کٹھے کر گِھدے تے دم ڈے ڈِتا تے آپنڑے پِیُو ڈاڈے نال وَنج مِلیا۔