Acaki

Buk mukwongo pa Moses ma kilwongo

ACAKI

Lanyut wilok madito ma i buk man

Nying buk man teloke tye ni “acaki.” Buk man tito kit ma kicweyo ki polo ki lobo, acaki pa dano, acaki me bal ki can matye i lobo, ki kit yo ma Lubanga tiyo kwede ki dano.

Buk man kitwero poko iye i dul aryo madito kit man: (1) Cwec me lobo ki lok atita ma mako lok kom jo macon. Lok ma mako kwo pa Adam ki Kawa, Kain ki Abel, Nua ki pii aluka, ki Lubele ma wiye ocudu me Babel (cura 1—11). (2) Lok atita ma mako kom tekwaro pa jo Icrael. Mukwongo aye Abraim, ma pire oywek pi niyene ki kit ma obedo lawiny dog Lubanga. Malubu meno obedo lok atita ma mako wode Icaka, ki lakware Yakobo (ma kilwongo Icrael), ka dok lok ikom awobe pa Yakobo aparwiye aryo, ma rok aparwiye aryo pa Icrael oa ki iye. Ikin lutino pa Yakobo, Yocepu aye tye macalo latin ma okelo wone ki jo ode ducu me doko lubedo i lobo Ejipt (Cura 12—50).

Kadi bed buk man tito lok kom dano, ento gin ma pire tek ma kinyutu iye aye obedo tic ma Lubanga otiyo. Cako ki moko ni Lubanga aye ocweyo gigu ducu, ka dok giko ki gicike ni Lubanga tye ki yub ikom danone. Lubanga aye tye madit mada i buk man, kun en aye ngolo kop dok bene en aye miyo pwod ikom lubal ducu, en bene telo danone dok bene konyogi, kun tiro yo kwogi. Buk man mukwongoni kicoyo me gwoko lok atita ma mako niye pa dano kun temo me gwoko niye man wek pe oruce ento obed tye ada.

Lacim wilok madito ma i buk man

Cwec me polo, lobo ki dano

Acaki bal ki deno can

Me a ikom Adam nio ikom Nua

Nua ki pii aluka

Lubele ma wiye ocudu me Babel

Me a ikom Cem nio ikom Abram

Tekwaro: Abraim, Icaka, Yakobo

Likwayo Ecau

Yocepu ki omegine

Jo Icrael i Ejipt