Acaki 43

Omegi Yucepu gudok i Ejipt ki Benjamin

1Kec omede odoko lyet tutwal i lobo Kanaan, 2dok kal ma onongo gikelo ki i Ejipt dong otum woko. Ci Yakobo owaco ki awobene ni, “Wudok kunu, wucit wuwil ki wan cam mo manok.” 3Juda ogamo doge ni, “Laco ca ocikowa matek kun waco ni, ‘Pe kibikelowu inyima ka ominwu Benjamin pe ikinwu.’” 4Ka icwalo ominwa owoto kwedwa, ci wabicito kunu kawili cam; 5ento ka pe icwalo en, pe wabicito kunu, pien laco ca owaco botwa ni, “Pe kibiterowa inyime ka ominwa Benjamin pe kwedwa.” 6Yakobo owaco ni, “Pingo wutima marac kuman? Pingo dok wutito ki laconu ni wutye ki ominwu mukene?” 7Gudok iye ni, “Laco ca openyowa ki lwak peny mapol ikomwa ki ikom kakawa, kun waco ni, ‘Wonwu pud tye makwo? Ominwu mukene tye?’” Wan wagamo lapeny ducu ma mako gin ma openyo; onongo watwero ngeyo ningning ni en biwaco ni, “Wukel ominwu kany.” 8Juda owaco bot wone Icrael ni, “Mii latin i cinga, cwale wawot kwede, ci wabia wacito, wek wabed kwo, pe wato, wan kacel ki in ki lutinowa bene. 9An abicung pire; ibipenya pire. Kace pe abikelo en boti ikare ma adwogo, akete inyimi, ci wek an aye abed won alii matwal. 10Pien ka nene pe wagale, kono man dong wawire kunu kiryo.”

11Ci won gi Icrael dok owaco botgi ni, “Ka dong myero obed kitmeno, ci wukwany ginacama mabeco ma nonge i lobo kany wupik i kicaawu, wek wuter macalo mot ki ladit lobo meno, moo makur manok ki moo kic, odok yat ki murra, nyig otitimo ki yaa. 12Dok wuter lim maromo culu wil tyen aryo; wuting lim ma nene gidwoko kiketo i dog kicaawuni; gwok nyo yam wigi owil awila. 13Wua wucito ki ominwu Benjamin bot laconu. 14Lubanga Matwero ducu omii kica omak laconu ikomwu, wek ocwal ominwu mukene ca gin ki Benjamin gudwog cen. Ka kityeko lutinona woko, dong gityeka arumu do!” 15Ci gutero mot, ki wel lim ma dodo tyen aryo, kacel ki Benjamin; gua gucito i Ejipt, gucung inyim Yucepu.

16Ka Yucepu oneno ni Benjamin tye ikin gi, ci owaco bot lakan jamine me ot ni, “Kel jonu i ot. Cit inek lee wek iyubi pien gin koni gibicam kweda i dyeceng.” 17Latic meno otiyo kit ma Yucepu ocike, okelo jonu i ot pa Yucepu.

18Lworo omakogi ikare ma giterogi i ot pa Yucepu, guwaco ni, “Man kikelowa i otti pi lok me lim, ma nene kidwoko kiketo i dog kicaawa ikare mukwongo ca. Koni dong gipoto ikomwa, gimakowa, ka dok gimayo lwak kanawa woko wek wadok opiine.” 19Pimeno gucito bot lakan jami me ot pa Yucepu, guloko kwede ki i dogola, 20guwace ni, “Ladita, wan yam wabino kany kawilo cam ikare mukwongo ca. 21Ikare ma wao ikabedo ma wabutu iyeni, wagonyo dog kicaawa, ci wanongo lim tye i dog kicaa pa ngat acel acel ma ikinwa, limwa ducu onongo tye ki bere; en watyeko dwogo kwedeni. 22Kombedi dok wabino ki lim mukene me wilo cam, pe wangeyo ngat ma oketo limwa i kicaawa.” 23En ogamo ni, “Wuywe ma cwinywu opye mot, pe lworo omakwu. Lubanga ma Lubanga pa wonwu en aye gwok nyo okano ki wun lim i kicaawu; an agamo limwu ma lacengman wuculuni gire.” Ci ocito okelo Cimeon botgi. 24Latic meno oterogi i ot pa Yucepu, omiyogi pii me lwoko tyen gi, ka dok omiyo cam ki kanagi. 25Guyubu motgi me atyera bot Yucepu ka bidwogo i dyeceng, pien guwinyo ni gibicam kwede.

26Ikare ma Yucepu odwogo paco, gutero motgi bote i ot, guryebe piny inyime. 27Openyogi ka gitye maber, kun waco ni, “Wonwu ma nene wuloko pire ni dong otii woko ni pud tye makwo?” 28Gugamo ni, “Latici ma wonwa tye maber, pud tye makwo.” Gukulo wigi piny, guryebe inyime. 29Ma Yocepu oneno omine Benjamin, latin pa mine, ci owaco ni, “Man aye ominwu matidini bo, ma nene wutita pireni? Lubanga omini gum, latina!” 30Yucepu okato woko oyot, pien onongo cwinye puke pi omine, ocito oyenyo kama myero ekok iye. Ci odonyo kakoko i kicikane. 31Lacen olwoko wange, okati woko kun diyo cwinye, ci owaco ni, “Dong kitok cam.” 32Kitoko cam pa Yocepu kene pat, ki pa omegine bene pat, ki pa Luejipt mayam gicamo kwedgi bene pat kaken gi, pien Luejipt pe gicamo kacel ki jo Ibru, bedo me kwer ki bot Luejipt. 33Omegine gubedo piny inyime, cake ki ikom kayo nio ikom latin cogo; ci gucako bedo kanene keken gi kun giuru. 34Kipoko botgi cam kun kitoko a ki i meja pa Yucepu, ento pa Benjamin kipoko mere ododo pa omegine tyen abic kulu. Kitmeno gucamo dok gumato, kun gubedo kwede ki yomcwiny.