Acaki 44

Kikopo pa Yucepu orwenyo

1Yucepu ociko lakan jami me ot ni, “Pik cam opong kicaa pa jonu, mabup, ma gitwero tingo; dok iket lim pa ngat acel acel i dog kicaane. 2Ci dok iket kikopona me ryali, i dog kicaa pa latin matidini, kacel ki lime me wilo kal.” En otimo kit ma Yucepu owace. 3Ka piny dong oru maleng, ci gucwalo jonu gukato woko kacel ki kanagi. 4Ikare ma pud guwoto manok keken nia ki i gang, Yucepu owaco ki lakan jamine ni, “Dong ilub kor jonu; ka imakogi, ci iwac botgi ni, ‘Pingo wuculu gin maber ki gin marac? Pingo wukwalo kikopo ryal ma mera woko? 5Pe rwoda mato ki kikopo meno? Dok pe en aye tyeto kwede bene? Wutimo rac mada.’”

6Ikare ma omakogi i yo, ci owaco ki gin lok meno. 7Gugamo doge kun giwaco ni, “Gin ango ma omiyo in laditwa iloko lakit lok meno? Wan lutici pe myero watim lakit tim macalo meno! 8Nen ba, lim ma nene wanongo i dog kicaawa, wadwoko cen boti nia wa ki i lobo Kanaan; dok wan myero wakwal ryal nyo jabu ki i ot pa laditwa ningning? 9Kace kibinongo tye bot ngat mo ikinwa, wek en aye oto, wan bene wabibedo opiini laditwa.” 10En ogamo ni, “Wuwek kong dong obed kit ma wuwaconi: ngat ma kibinongo kikopo bote aye bibedo opiina, jo mukene bal bibedo pe ikomgi.” 11Ngat acel acel ocako cibo yece piny oyotoyot, ci guyabo dog kicaagi. 12Latic pa Yocepu oyako kicaagi nia ki kom pa ladit nio wa kom latin, ci ginongo kikopo i kicaa pa Benjamin. 13Gucako yeco bongigi pi cwercwiny, gin ducu gutweyo yec inge kanagi, gudok cen i Ejipt.

14Ikare ma Juda ki omegine gudok i ot pa Yucepu, gunongo en pud tye kenyo; gupoto, guryebe piny inyime. 15Ci Yucepu owacigi ni, “Wun wutimo kit tim macalo man pingo? Wun pe wungeyo ni dano macalo an ngeyo tyet?” 16Juda ogamo kun waco ni, “Kit lok ango ma wan watwero gamo ne ladit? Wabipido ki lok ango kono? Wabikwanyo bal wa kekenwa ningning? Lubanga dong otyeko nongo bal ikomwa woko; nen, wan tin wadoko opiini, laditwa, wan ducu kacel ki ngat ma ginongo kikopo boteni.” 17Ento en ogamo ni, “An pe atwero timo kit eno! Ento ngat ma ginongo kikopo boteni, aye bibedo opiina; ento ki tung botwu wun wudok mewu bot wonwu ki kuc.”

Juda opido pi Benjamin

18Juda ocako cito bote, owace ni, “Alegi ladita, ye wek alok lok mo kwedi, pe iwek kinigani obed lyet ikoma, pien in irom ki Parao kikome. 19Ladit, in yam ipenyowa ni, ‘Wun wutye ki wonwu, onyo omegiwu?’ 20Wan wagamo dogi ni, ‘Watye ki wonwa, dano ma otii dong, ki ominwa matidine latin me tiyone.’ Omine aye oto woko, en aye odong latin acel i kor mine; wone bene maro en. 21Ka dok iwaco botwa ni, ‘Wukel en bota, wek anen kome.’ 22Wan watito boti ni, ‘Latin awobinu pe twero weko ka nget wone; kace opoke woko ki wone, ci wone to woko.’ 23Ento in onongo iwaco botwa ni, ‘Ka ominwu matidini pe obino kany kacel kwedwu, pe dok wubibino inyima.’”

24Ka wadok paco bot wonwa ladit, ci watite loki ducu. 25Ka wonwa owaco ni, “Wudok cen wek wucit wuwil ki wan cam mo manok. 26Wan wawace ni, ‘Pe watwero dok ka ominwa matidini pe bicito kwedwa. Pien pe wabicito inyim laco ca, ka ominwa matidine pe ikinwa.’ 27Ci wora owaco ki wan ni, ‘Wun wungeyo ni dakona Lakeri onywalo lutino awobe aryo keken; 28acel oweka woko, ci yam awaco ni ada nguu okide woko, pe dok amedo ki nene matwal. 29Ka dok wukwanyo man woko ki bota, ce gin marac bipoto ikome, ci wubineka woko ki cwercwiny kit macalo dong atii woko ni.’”

30Ma omiyo ka an adok bot wora ma latin awobini pe ikinwa, ci en bito woko, pien kwo ne ocung ikom latin awobini. 31Miyo wabineko wonwa woko ki cwercwiny kit macalo dong otii woko ni. 32An nene acung pi latin awobi man bot wora, kun awace ni, ka pe abidwoko en boti, an abibedo won alii inyim ikare me kwona ducu. 33Ma omiyo kombedi alegi ni ber iye an opiini, adong ma ka latin awobi man, abed opiini ladit; wek latin man odok paco kacel ki omegine. 34Pien atwero dok paco bot wora ningning, ka pe latini tye kweda? Alworo neno gin marac ka poto ikom wora.