Acaki 45

Yucepu onyute kekene bot omegine

11

Yucepu pe dong otwero diyo cwinye ki inyim lutice ducu ma gucung kangete, ci odange ni, “Wuwek dano ducu gua gukat woko ki bota, gucit cen.” Kitmeno ngat mo pe odong bote ikare ma en nyute kekene bot omegine. 2Ocako koko matek ma Luejipt bene giwinyo, ki jo ma i gangkal pa Parao bene guwinyo pire. 3Yucepu owaco bot omegine ni, “An a Yucepu; wora mono pud tye makwo?” Ento omegine pe gitwero gamo doge, pien tipu komgi oto woko inyime.

4Yucepu owaco bot omegine ni, “Alegowu, wubin bota cok.” Gucito cok bote. Owaco ki gin ni, “An aye ominwu Yucepu, mayam wucato i Ejipt. 5Pe dong wubed ki cwercwiny, dok cwinywu bene pe owang ikomwu kekenwu pi cato an kany; pien Lubanga aye yam ocwala kany inyimwu, wek akony kwo pa dano. 6Pien kec dong obedo i lobo pi mwaka aryo; pud dok odong mwaka abic ma pur ki kac bibedo pe. 7Lubanga ocwalo an inyimwu me larowu wek wudong makwo i lobo, ki pi gwoko ki wun jo mapol ma gibibwot makwo. 8Pien wun aye yam pe wucwala kany, ento Lubanga gire; omiyo an adoko lamitam bot Parao, ki lalo ode ducu ki lalo lobo Ejipt ducu. 92Wutim oyot, wucit bot wora, wucit wuwace ni, latini Yucepu owaco kuman ni, ‘Lubanga oketa abedo laloyo i Ejipt ducu; bin bota kany, pe dok iruu. 10Ibibedo i lobo Gocen, i bibedo cok kweda, in ki lutinoni ki lutino pa lutinoni ducu, ki dyegini ki dyangini ki gin ma itye kwedgi ducu. 11Abipito in kunu pien pud dok odong mwaka me kec mukene abic anyim; omiyo pe amito ni in ki jo ma i paconi, ki gin ma itye kwedgi ducu me to ki kec.’” 12Yocepu dok omede ki waco ni, “Kombedi dong wangwu ducu, ki wang omera Benjamin bene oneno ni an kikoma aye atye kalok kwedwu ki doga, 13Myero wun wucitit bot wora kit deyona ducu ma atye kwede i Ejipt, ki gin ducu madong wuneno. Wucit oyot, wek wukel wora kany.” 14Ocako gwako kor omine Benjamin ki koko, ki Benjamin bene okok i ngute. 15Ka onoto lem omegine ducu kun kok; ka dong lacen omegine gucako boko lok kwede.

16Ma lok man owinye i ot pa Parao ni, “Omegi Yucepu gubino,” pire oyomo cwiny Parao ki lutice matek. 17Parao owaco bot Yucepu ni, “Wac bot omegini ni, ‘Wutim kit man, wutwe yecwu inge kanawu, wek wudok cen i lobo Kanaan. 18Wucit wugam wonwu ki jowu, wek wubin bota; abimiyowu gin mabeco matye i lobo Ejipt, wubicamo gin mabeco matye i lobo man.’

19Dok icikgi ni, ‘Wutim kit man: wuter gadigadi nia ki i lobo Ejipt kany pi lutinowu matino ki pi monwu, wek wukel wonwu kany. 20Pe wupar pi jamiwu, pien jami mabeco matye i lobo Ejipt ducu mewu.’”

21Awobe pa Icrael gutimo kitmeno; Yucepu omiyogi gadigadi kit macalo Parao ociko, ka dok omiyogi peke me wotgi. 22Omiyo bot ngat acel acel ducu bongi mabeco me aruka, ento bot Benjamin omiyo cekel me ryal miya adek ki ruk mabeco abic. 23Ocwalo bot wone jami magi: kana apar ma guyene ki jami mabeco ma oa ki i Ejipt, ki megi kana apar ma guyeyo kal, ki cam, ki peke me wot pa won gi. 24Ka dong ocwalo omegine gucito. Ka dong gia ocikogi ni, “Pe wubed ka da i yo.” 25Gua woko ki i Ejipt, ci gudok i lobo Kanaan bot won gi Yakobo. 26Ka gutite ni, “Yucepu pud tye makwo, en aye ladit maloyo lobo Ejipt ducu!” Ci tipu kome oto woko lirut, pien onongo petwero ye lokgi. 27Ento madong gutite lok kom Yucepu ducu, kit ma ocikogi kwede, ka dok pi neno lwak gadigadi ma Yucepu ocwalo pi tingo en, ka tipu kom won gi ocako dwogo. 28Ka Icrael ocako lok ni, “Dong aye, woda Yucepu kara pud tye makwo; abiwot acito kanene ma pud peya ato.”