Acaki 46

Yakobo ocito i Ejipt kacel ki jo me ode

1Icrael ocako wot ki jami mayam en tye kwedgi ducu ocito i Beer-ceba, ci otyero gitum bot Lubanga pa wone Icaka. 2Lubanga oloko ki Icrael iwang lek dyewor kun lwonge ni, “Yakobo, Yakobo.” En ogamo ni, “An a ene.” 3Owace ni, “An Lubanga, Lubanga pa woru; pe ilwor cito i Ejipt, pien abimiyi idoko rok madit ki kunu. 4Abicito kwedi wa i Ejipt, dok abidwoki cen bene; doki ikare ma ibito Yucepu bibedo kacel kwedi.” 5Yakobo ocako wot ki i Beer-ceba, kun awobene gutinge, kacel ki lutinogi matino, ki mon gi, i gadigadi ma Parao ocwalo me tingogi. 61Gutero limgi makwo ki jamigi mayam gulimo ki i lobo Kanaan, gucito kwede i Ejipt; gutero Yakobo ki lutinone ki likwaye ducu. 7En ocito i Ejipt ki awobene ki anyirane ducu, wa ki likwaye ma co ki ma anyira.

8Man aye nying likwayo pa Icrael ma gucito i Ejipt: Yakobo ki awobene. Reuben, latin kayo pa Yakobo, 9ki awobe pa Reuben, aye Kanok, Pallu, Kejeron ki Karmi. 10Awobe pa Cimeon aye Jemuel, Jamin, Okad, Jakin, Jokar ki Caul, ma awobi pa dako Lakanaan. 11Awobe pa Levi aye Gercon, Kokat ki Merari. 12Awobe pa Juda aye Er, Onan, Cela, Perej ki Jera, ento Er ki Onan guto woko i lobo Kanaan; awobe pa Perej aye Kejeron ki Kamul. 13Awobe pa Icakar aye Tola, Puwa, Iob, ki Cimron. 14Awobe pa Jabulon aye Cered, Elon ki Jaleel. 15Meno aye awobe pa Lea ma en onywalo ki Yakobo i Paddan-aram, kacel ki nyare Dina; wel lutino awobene ki anyirane giromo pyere adek wiye adek.

16Awobe pa Gad aye Jipion, Kagi, Cuni, Ejibon, Eri, Arodi ki Areli. 17Awobe pa Acer aye Imna, Iciva, Icivi, Beria ki Cera ma lamingi. Awobe pa Beria aye Keber ki Malkiel. 18Meno aye lutino awobe pa Jilpa, ma Laban omiyo bot Lea; en onywalo ki Yakobo lutino apar wiye abicel.

19Awobe pa Lakeri dako pa Yakobo aye Yucepu ki Benjamin. 202Yucepu onywalo Manace ki Epraim ki i lobo Ejipt, ma Acenaci, nya, pa Potipera ajwaka me On aye onywalogi. 21Awobe pa Benjamin aye Bela, Beker, Acibel, Gera, Naaman, Eki, Roc, Mupim, Kupim ki Arud. 22Meno aye awobe pa Lakeri ma en onywalo ki Yakobo, lutino ducu apar wiye angwen. 23Awobi pa Dan aye Kucim. 24Awobe pa Naputali aye Jajeel, Guni, Jejer ki Cilem. 25Meno aye likwayo pa Bila ma Laban yam omiyo ki nyare Lakeri; en onywalo ki Yakobo lutino ducu abiro. 26Jo ducu ma tung bot Yakobo mayam ocito kwedgi i Ejipt, ma gin yam lutinone ki likwaye kikome, ma pe gikwano iye mon pa lutino awobene onongo giromo jo pyerabicel wiye abicel. 273Ki lutino awobe ma nene Yucepu onywalogi ki i Ejipt, nene gin awobe aryo. Pieno jo ducu ma tung bot Yakobo ma gucito i Ejipt giromo pyere abiro.

Yakobo ki jo ma i ode i Ejipt

28Yakobo ocwalo Juda anyim bot Yucepu, wek gurwate i Gocen. Ma guo i lobo Gocen, 29Yucepu oyubu gadigadine me cito karwate ki wone Icrael i Gocen. Ma gurwate, ci ocito bote ka opoto i ngute kun kok kwede pi kare mo malac. 30Icrael owaco bot Yucepu ni, “Kombedi do aromo to, pien dong aneno wangi, aniang ni pud i kwo ada.” 31Yucepu owaco ki omegine ki jo ma i ot pa wone ni, “Abidok katito ki Parao, abiwace ni, ‘Omega ki jo ma i ot pa wora, mayam gitye i lobo Kanaan, dong gutyeko bino bota; 32gin lukwat, pien gin yam lukwat dyangi; dok gin gubino ki dyegigi ki dyangigi, ki gin ducu ma gitye kwede.’ 33Kace Parao olwongowu, ka openyowu ni, ‘Wun wutiyo tic ango?’ 34Wun wubidok iye ni, ‘Wan lutici wan lukwat dyangi nia ka tinowa nio kwede wa onyo, wan kacel ki kwarowa.’ Man bimiyo wun wubibedo i Gocen, pien bedo me kwer bot Luejipt me bedo ki lakwat mo.”