Acaki 47

1Ci Yucepu okwanyo omegine abic ocito kwedgi bot Parao. Otite ni, “Wora ki omega gutyeko bino ki i lobo Kanaan, ki dyegigi ki dyangigu ki jamigi ducu; kombedi dong gitye i lobo Gocen.” 2Ci okwanyo omegine, oterogi, onyutugi bot Parao. 3Parao openyo omegine ni, “Wun wutiyo tic ango?” Gin guwaco bot Parao ni, “Ladit, wan lukwat macalo kwariwa.” 4Ka guwaco bot Parao ni, “Wan dong wabino kabedo i loboni; pien kec opoto malyet tutwal i lobo Kanaan oweko ka kwayo limwa odoko peke woko; kombedi walegi ni, wek wabed i lobo Gocen.” 5Parao owaco bot Yucepu ni, “Woru ki omegini dong gubino boti. 6Lobo Ejipt tye boti, ket woru ki omegini i lobo mabere, wek gubed i lobo Gocen; ka ingeyo ikin gi jo makwiri, ci iketgi gubed ludito ma gwoko lima.”

7Lacen Yucepu okelo wone Yakobo, okete inyim Parao, ci Yakobo olamo gum ikom Parao. 8Parao openyo Yakobo ni, “In mono dong irii wi lobo mwaka adi ka?” 9Yakobo owaco bot Parao ni, “An dong arii wi lobo mwaka miya acel ki pyere adek macalo labedo. Ento mwaka ma ari kwede pud nok, dok opong ki can, peya rom ki mwaka pa kwarina ma gubedo kwede macalo lubedo.” 10Yakobo olamo gum ikom Parao, ka dong okato woko ki inyime. 11Yucepu omiyo ki wone ki omegine kabedo i lobo Ejipt, i ngom mabere, i Ramcec, kun miyogi lobo wek obed megi, kit macalo Parao ociko. 12Yucepu ocako poko cam ki wone, ki omegine ki bot jo ducu me ot pa wone, kun lubu wel jo matye botgi.

Loc pa Yucepu ikare me kec

13Ikare meno onongo cam dong pe i lobo ducu; pien onongo kec dong lyet tutwal, omiyo jo ma i lobo Ejipt ki i lobo Kanaan kec obwoyogi woko. 14Yucepu ocoko cente ducu mayam tye i lobo Ejipt ki i lobo Kanaan, mayam dano guwilo ki cam; ci otero i ot pa Parao. 15Ka cente dong otum woko ki i lobo Ejipt ki i lobo Kanaan bene, ci jo Ejipt ducu gubino bot Yucepu, guwaco ni, “Miniwa cam; myero wato ki ikomi ma ineno pingo? Pien centewa dong otum woko.” 16Yucepu ogamo ni, “Wumiya lim makwo, ci an abimiyowu cam aloko ki dyangwu, ka limwu me cente dong otum woko.” 17Gucako kelo limgi makwo bot Yucepu, aguragura, romi, dyangi ki kana; ci Yucepu olokogi ki cam. I mwaka meno opoko botgi cam pi lwak lim makwo ma gukelo.

18Ka mwaka meno dong otum, ci gubino bote i mwaka ma lubune, kun giwace ni, “Wan pe dong wakano lok mo boti, laditwa, centewa dong watyeko woko ducu; ki lim makwo dong odoko pa laditwa; gin mo pe ma odong inyim laditwa, kono komwa ki lobowa keken. 19Myero wato ki ikomi ma inenowa pingo, myero wato wa wek lobowa odong nono pingo? In i wilwa ki cam kacel ki lobowa, wan kacel ki lobowa wabibedo opii pa Parao; dok imiwa kodi wek wabed makwo, pe wato, wek lobo pe odong nono.”

20Kitmeno Yucepu owilo lobo ducu me Ejipt obedo pa Parao; pien Luejipt ducu gucato potigi woko, pi kec ma onongo dong lyet tutwal. Lobo odoko pa Parao. 21Yucepu oloko dano ducu gubedo opii, nia i agiki lobo Ejipt tung cel, nio tung cel. 22Lobo pa ajwaki keken aye pe giwilo, pien ajwaki onongo gitye ki camgi ma a ki i cing Parao; onongo gubedo kacamo gin ma Parao miyogi, ma omiyo pe gucato lobogi. 23Yucepu dok owaco bot lwak ni, “Nen, ikare man atyeko wilowu ki lobo mewu me bedo pa Parao. Kombedi dong wugam kodi ma wubicoyo i lobo. 24Ikare me kac wubimiyo acel me abic bot Parao, ki dul angwen me abic bibedo mewu, pi kodi me acoya i potiwu, ki pi camwu, ki jo ma i pacowu, ki cam pa lutinowu.” 25Gugamo ni, “Dong ityeko laro kwowa, wek cwinyi obed yom ikom wa ladit, wan wabibedo opii pa Parao.” 26Pi lok man Yucepu oketo odoko cik i lobo Ejipt, pud tye nio wa onyo ni, Parao myero oter dul acel me abic. Lobo pa ajwaki keken aye pe odoko pa Parao.

Yakobo ociko Yucepu me agikine

27Jo Icrael gubedo i lobo Ejipt, i lobo Gocen; gunongo iye lim, gumede, ci gunya mapol. 28Yakobo obedo i lobo Ejipt mwaka apar wiye abiro; kitmeno nino pa Yakobo, mwaka me kwo ne ducu oromo miya acel ki pyere angwen wiye abiro. 291

Ka kare me to pa Icrael dong onyiko cok, ci olwongo wode Yucepu, owace ni, “Ka imar ci ber dong, irwak cingi, odony ki piny ite ema, icike kweda ki gen ki ada ni, pe ibiyika i Ejipt. 30Ento wek acit abut kacel ki kwarina; tinga woko ki i Ejipt, ci iciyika ikabedo ma kiyikogi iye.” Yucepu ogamo ni, “Abitiyo kit madong iwaconi.” 31Dok Icrael owaco ni, “Kwonga kwong,” ci Yucepu ocako kwongo kwong. Lacen Icrael okulu wiye piny iwi kitandane.