Acaki 48

Yakobo olamo gum ikom Epraim ki Manace

1Lacen gitito bot Yucepu ni, “Nen, woru kome lit.” Ci en otero lutino awobene aryo, Manace ki Epraim. 2Ka gitito ki Yakobo ni, “Wodi Yucepu obino boti,” ci Icrael ocuke oa malo, obedo iwi kitandane. 31Yakobo owaco bot Yucepu ni, “Lubanga Matwero ducu yam onen bota i Luj i lobo Kanaan, ci omiya gum 4kun waca ni, ‘Nen, abimiyi inya imede mapol, dok abimiyi idoko rok mapol. Abimiyo lobo man bot likwayi ki jo ma bilubugi me bedo meggi matwal.’ 5Awobeni aryoni ma inywalogi i lobo Ejipt ma onongo peya abino boti i Ejipt, meno mera gira. Epraim ki Manace gibibedo lutinona, macalo Reuben ki Cimeon bene. 6Lutino ma kinywalogi ki ingegi bibedo meri, ento kibikwanogi ki nying omegigi ikare ma gipoko lobo me bedo ginaleyagi. 72 Atimo kit man pien mayam aa ki i Paddan, Lakeri otona woko i lobo Kanaan i wangayo, munongo Eprat pud kiborbor; ci ayiko en i yo ma cito Eprat.” (Eprate kombedi kilwongo Beterekem).

8Ka Icrael oneno awobe pa Yucepu, ci owaco ni, “Man kono jo mene?” 9Yucepu ogamo dog wone ni, “Gin lutino awobena, ma Lubanga omiya ki kany.” Ci owaco ni, “Kelgi bota kany, wek alam gum ikomgi.” 10Ikare meno onongo Yakobo dong otii, wange ocido woko, ma pe dong neno piny. Ka Yucepu okelogi cok bote, ci onoto lemgi ka okwakogi ki bade. 11Ci Icrael owaco bot Yucepu ni, “Onongo yam atamo ni pe dok abineno wangi; nen, ka Lubanga dok omiyo aneno wa lutinoni bene.” 12Yucepu odirogi cen manok ki ka conge; oryebe piny, okulu wiye i ngom. 13Yucepu otero gin aryo ducu, omako Epraim ki cinge tung lacuc mukemo cing Icrael ma lacam, ki Manace omako ki cinge tung lacam ma okemo cing Icrael ma lacuc, odirogi cok bote. 14Icrael oketo cinge ma lacuc iwi Epraim, ma latin matidi, ki cinge ma lacam oketo iwi Manace, kun ogwenyo cinge, kadi bed Manace aye onongo latin kayo. 15Icrael olamo gum ikom Yucepu kun waco ni,

“Lubanga mayam kwarowa Abraim ki Icaka

gubedo kalubu cike omii gum bot awobeni.

Lubanga ma obedo kakwayo an ikare me kwona ducu

nio wa inino man omii ki gin gum.

16Lamalaika mayam olara ki i gin marac,

omii gum bot awobeni; wek kilwonggi ki nyinga,

ki nying kwarowa Abraim ki Icaka;

gudong, gudok lwak mapol iwi lobo.”

17Ka Yucepu oneno ni wone ogwenyo cinge ma lacuc aye dok oketo iwi Epraim, pe opwoyo; ci ocako kwanyo cing wone ki iwi Epraim wek elok eket iwi Manace. 18Yucepu owaco bot wone ni, “Pe kitmeno wora, pien man aye latin kayo, ket cingi ma lacuc iwiye.” 19Ento wone okwero woko, kun waconi, “An angeyo ya latina, angeyo; en bibedo rok, en bene bibedo madit. Ento omine matidi bibedo dit makato en, likwaye bidoko lwak rok mapol.” 203Olamo gum ikomgi inino meno, kun waco ni, “Icrael bilego gum ki nyingwu ni, ‘Lubanga omiyi ibed macalo Epraim ki Manace.’” Kitmeno oketo Epraim inyim Manace. 21Icrael owaco bot Yucepu ni, “Nen, an dong acok to, ento Lubanga bibedo kwedwu, dok bidwokowu i lobo pa kwarowu. 22Nen dong atyeko miyo boti ento pe bot omegini lobo ma ceko cam mayam amayo ki i cing jo Amor ki pala lucwan ki atero.”