Acaki 49

Icrael olamo gum ikom awobene

1Icrael olwongo awobene, ci owacigi ni, “Wucoke kacel, wek atitiwu gin ma bitime ikomwu ikare ma anyim.

2Wugure wek wuwiny, wun lutino awobe pa Icrael,

wuwiny wonwu Icrael.

3Reuben, in aye latin kayona,

in i kerona, ma akwongo nywalo ki tekona,

in aye iloyo omegini ki wake ki tekkom.

4Icore macalo pii aluka ma twage, ento piri pe bibedo dit matwal,

pien i ito wa iwi kitanda pa woru;

ipyede iye, i ito iwi kabutuna!

5Cimeon ki Levi gin omego.

Gitiyo ki pala lucwangi me timo tim aranyi.

6Tipuna, pe icit i kacokegi;

in cwinya pe iribe kwedgi i kaguregi;

pien guneko lwak dano ki kiniga

dok gitongo odon twoni dyangi akaka.

7Kicen kinigagi, pien ger;

gicen akemogi, pien gwa!

Abipoko kin gi aketogi woko ata ikin jo pa Icrael

abikeyogi woko i dye Icrael.

8Juda, omegini gibipaki;

cingi bimako ngut lukwori,

lutino pa woru gibiryebe piny inyimi. 91

Juda in calo latin labwor,

ia ki kamwodo lee, latina, ci i ito malo.

En nyongo piny, en butu calo labwor,

macalo min labwor; anga ma bituge?

10Odoo ker pe bia ki bot Juda,

tal ker bene pe bia ki katyene,

nio ka rwodi bikelo mot bote,

nio ka rok ducu biworo doge.

11En tweyo latin kanane ikom yat olok,

tweyo wod kana ikom olok mabere.

En lwoko ginarukane ki kongo bwino,

ki bongone i pig olok makwar.

12Kongo bwino bimiyo wange loke doko makwar,

cak biloko lake doko matar.

13Jabulon bibedo i dog nam.

En bibedo ki wang wat me mel.

Wang lobone bibedo wa i Cidon.

14Icakar en obedo calo kana matek,

butu i dye anok romi;

15oneno ka yweyone tye maber,

ki lobone bene tye maber;

onyoce piny katingo yec,

odoko opii ma kidiyo i tic matek.

16Dan biloyo jone

macalo ngat acel ikin kaka me Icrael.

17Dan bibedo calo twol ma inget yoo,

lacocodo ma i yoo,

ma bitongo opuny aguragura,

miyo labed iwiye poto ataro.”

18Atye kakuru lar meri, ai Rwot.

19Gad mony bipoto ikome,

ento en biryemogi woko.

20Acer came bibedo moo,

en bikelo cam mamit muporo cam pa luker.

21Naputali en bibedo calo bwong til ma ngweco kama en mito,

ma iye olil ki lok mabeco.

22“Yucepu en calo jang yat ma nyak,

jange ginyak madwong inget wang it;

jange gilak ikom cel.

23Wegi atero gilwenyo ikome ki gero,

gibaye, gilubu kore matek;

24ento atume cung mot liking,

cinge odoko mit

pi teko pa Lubanga Matwero ducu pa Icrael,

pi nying Lakwat en Got pa Icrael.

25Lubanga pa woru ma bikonyi,

Lubanga Matwero ducu ma bimiyi gum;

gum ma a ki malo i polo,

gum ma a i kut matut muyare i te lobo,

gum me bedo ki lutino mapol ki lee mapol.

26Gum pa abani dwong,

loyo gum pa godi ma rii nakanaka,

ki jami mabeco ma iwi cere ma bedo matwal.

Gum magi ducu gubed iwi Yucepu,

ki itur nyime, en mayam opoke woko ki ikin omegine.

27Benjamin en calo orudi mager,

camo lee ma oneko odiko,

dok poko lim ma en oyako otyeno.”

28Magi aye kaka pa Icrael apar wiye aryo; man aye lok ma won gi oloko kwedgi ikare ma en lamo gum ikomgi, kun lamo gum ikom ngat acel acel kit macalo gume tye kwede.

Too pa Yakobo ki yike

29Ci Yakobo ociko awobene kun waco botgi ni, “An dong abito adok bot jona, wubiyika bot kwarina i boro matye i poto pa Epron Lakit, 302i boro meno matye i Makpela, tung kunyango me Mamre, i lobo Kanaan, mayam Abraim owilo kacel ki poto, ki bot Epron Lakit, odoko mere me kabedo me yik. 313Kunu yam giyiko iye Abraim ki dakone Cara; kunu bene giyiko iye Icaka ki dakone Labeka; an bene dok ayiko Lea kunu. 32Poto meno ki boro matye iye yam giwilo ki bot jo Kit.” 334Ka Yakobo otyeko ciko lutino awobene, ci odolo tyene malo iwi kitanda, oomo cwinye me agikine, oto odok bot lutugi.