Acaki 50

1Yucepu ocako poto inyim wone, okok ki pig wange kun noto leme. 2Lacen ociko lutice ma ludaktar pi wiro kom wone ki yat ma talo kom, ci ludaktar guwiro kom Icrael. 3Wirone otyeko nino pyere angwen, en aye nino mamite ka giwiro kom dano ki yat latal kom. Luejipt gukoko Yakobo nino pyere abiro.

4Ka nino me kwero cola dong otum, ci Yucepu oloko ki jo pa Parao, kun waconi, “Alegowu ni, ka wuneno kombedi ni bedona botwu kany oyomo cwinywu, ci wuwac loke bot Parao, kun wuwace ni: 51wora omiya akwongo kwong kun waconi, ‘An dong acok to: wubiyika i lyel mayam an kikoma aye akwinyo i lobo Kanaan.’ Ma omiyo alegi ni, itima ber, wek acit ayik wora, ka adwogi.” 6Parao ogame ni, “Ber cit giri, iciyik woru, kit macalo en omiyo ikwongo akwongani.”

7Ci Yucepu ocito kayiko wone. Ocito ki lwak lutic pa Parao ducu, ludongo me ode, ki ludongo ducu me lobo Ejipt. 8Jo ducu me ot pa Yucepu, ki omegine, ki jo me ot pa wone. Lutinogi keken ki lwak dyangigi ki dyegigi aye gudong i lobo Gocen. 9Yucepu ocito ki lwak gadigadi ki wegi aguragura, owoto ki lwak jo mapol adada. 10Ka guo i laro moyo ma i Atad, matye loka Jordan ci gukok kunu ki cwercwiny ki kumu madwong. Yucepu okwero cola pa wone nino abiro. 11Ka wegi lobonu ma gin Lukanaan, guneno kwero cola ma i laro moyo i Atad, ci guwaco ni, “Man kwero cola me cwercwiny madwong bot Luejipt.” Pimeno nying kabedo meno gilwongo ni, Abel-micraim; matye loka Jordan.

12Kitmeno awobe pa Yakobo gutimo ikom won gi kit ma nene en ocikogi kwede. 132Ci gin gutero kome i lobo Kanaan, ci guyiko kome i boro ma i poto matye i Makpela i tung kunyango me Mamre, mayam Abraim owilo, kacel ki poto, bot Epron Lakit, wek obed mere me kabedo me yik. 14Ka dong otyeko yiko wone, ci Yucepu odok i Ejipt kacel ki omegine, ki jo ducu ma nene ocito kwedgi ka yiko wone.

Yucepu okweyo cwiny omegine

15Ka omegi Yucepu guneno ni won gi dong otyeko to woko, ci gutamo ni, “Gwok nyo Yucepu dong bicako kwerowa woko, biculu kwor mayam watime kwede marac ikomwa.” 16Omiyo gucako cwalo kwena bot Yucepu kun giwaco ni, “Yam woru ocikowa ki cik man ma onongo peya oto ni, 17‘Wuwac bot Yucepu ni, alegi itim kica bot omegini pi tim aranyi ki pi bal ma gutimo ikomi, pien gutimo tim aranyi ikomi ada.’ Dong kombedi walegi itimwa kica pi tim aranyiwa, pien wan waworo Lubanga pa woru.” Yucepu okok ma guloko kwede. 18Omegine bene gucito ci guryebe inyime kun giwaco ni, “Nen, wan dong lutici.” 19Ento Yucepu odok iye botgi ni, “Pe wulwor, an atye ma ka Lubanga bo? 20Ki tung botwu yam wuyube pi timo gin marac ikoma, ento Lubanga oloko meno odoko gin maber, ma omiyo jo mapol gubedo kwo, macalo gitye kwede wa kombedi. 21Pimeno pe wubed ki lworo mo; abipitowu ki lutinowu ducu.” Kitmeno Yucepu ojingo cwinygi kun kweyo igi.

To pa Yucepu

22Ci Yucepu omede ki bedo i Ejipt, en ki jo me ot pa wone, ci en orii mwaka miya acel ki apar. 23Yucepu oneno lutino pa Epraim, nio wa ikom likwaye me adeke; lutino pa Makir wod pa Manace Yucepu onenogi ma en pud tye kwo. 24Ci Yucepu owaco bot omegine ni, “An dong acok to; ento Lubanga bilimowu, dok en bikwanyowu woko ki i lobo man, bidwokowu kama Lubanga okwongo me miyo bot Abraim ki Icaka ki bot Yakobo.” 253Ci Yucepu omiyo lutino pa Icrael gucike kun waco ki gin ni, “Ka Lubanga bilimowu, ci wubitingo cogona woko ki kany.” 26Yucepu oto, ma mwaka me dite romo miya acel ki apar; guwiro kome ki yat latalkom, lacen gupyelo kome i canduk me yik i Ejipt.