Nia 1

Atwom pa jo Icrael i lobo Ejipt

11

Man aye nying awobe pa Icrael mayam gucito i Ejipt kacel ki Yakobo, kun ngat acel acel cito ki jo ma i ode: 2Reuben, Cimeon, Levi, Juda, 3Icakar, Jabulon, Benjamin, 4Dan, Naputali, Gad ki Acer. 5Lutino pa Yakobo ducu gin pyere abiro, kun onongo Yucepu dong tye i Ejipt. 6Ci Yucepu oto, omegine ki yalwak meno ducu guto. 72Ento likwayo pa Icrael gunya gumede mapol; gudoko matek tutwal, ci gupongo lobo Ejipt woko. 83

Lacen, rwot manyen mayam pe ngeyo Yucepu ocako loyo lobo Ejipt. 9Ci en owaco ki lwak ma mere ni, “Nenu, jo Icrael dong gin dwong tutwal, dok gitek, giloyowa woko. 104Wubin wek watimugi ki ryeko, wek pe gunya tutwal; pien ka mony mo bipoto ikomwa, ci gin biribe ki lumerokwa kalweny ikomwa, ci gibiringo, giweko lobowa woko.” 11Pimeno guketo ludito maloyo tic me romogi ki tic madwong; ci gugero ki Parao gangkal ma nyinggi Pitom ki Ramcec, me kano cam. 12Kadi bed Luejipt gumedo keto can ikomgi, gin dok gunya, gumede ameda, oweko gin opongo lobo malac, ci Luejipt gubedo ki lworo ikom jo Icrael. 13Pimeno gurido jo Icrael ki tic magwar, 14ma omiyo kwogi obedo tek pi tic matego me nyono lobo ki goyo matapwali. Gin bene guridogi ki kit tic ducu me poto labongo kica.

15Ka dok rwot me Ejipt omiyo cik bot lucolo ma colo mon jo Ibru, ma ngat acel nyinge Cipira ki mukene Pua, kun waco ni, 16“Ka wutye kacolo mon jo Ibru, ce wunenoni tye kanywalo latin laco, ci wubineko woko; ento ka latin nyako, ci wubiweko makwo.”

17Ento lucolo yam gilworo Lubanga, ci pe, gutiyo kit ma rwot me Ejipt ocikogi kwede, ento guweko lutino co makwo. 18Ma omiyo rwot me Ejipt dok olwongo lucolo magi, ci openyogi ni, “Wutimo kuman pingo, ma wuweko lutino co makwo ni?” 19Lucolo guwaco bot Parao ni, “Pien mon jo Ibru pe girom ki mon Ejipt. Gin komgi tek ginywal oyotoyot, miyo ginywal woko ma nongo lacolo mo peya obino botgi.” 20Man omiyo Lubanga otimo lucolo maber. Ci jo Icrael gunya gudoko matek tutwal. 21Pien lucolo gulworo Lubanga, Lubanga omiyogi gudoko mege i gangigi. 225Parao dok ociko lwake ducu ni, “Latin laco acel acel ma jo Ibru gunywalo wubibolo woko i kulu Nail, ento wubiweko lutino anyira ducu gibedo makwo.”