Nia 2

Kinywalo Moses

1Laco mo ma ladogola pa Levi ocito onyomo nyako mo ma nya pa Levi. 21Dako meno ogamo ic, ci onywalo latin laco. Ka dakonu onenoni latin meno ber tutwal, ci okane woko pi dwe adek. 3Ka dong pe twero kane, ci otingo aduku ma kicweyo ki togo, ci opuyu ki odok yat; ci opyelo iye latin, otero oroyo i dye aluga ma inget kulu. 4Lamine ocung ki cen pi ngeyo gin ma bitime ikome. 5Ka nya pa Parao obino ka lwok i kulu, ci anyirane guwoto gurabo nget kulu; en oneno aduku ki ikin aluga, ci ocwalo angecane ka omone. 6Nyaker oelo wi aduku, ci oneno latin iye; ci nen, latin okok. Kica omake ikome, ci owaco ni, “Man latin pa jo Ibru.” 7Ci lamin latin openyo nya pa Parao ni, “Acit alwong lapidi mo ki ikin mon Ibru, wek opiti latin bo?” 8Nya pa Parao ogamo ni, “Citi.” Kitmeno nyako meno ocito olwongo min latin. 9Ci nya pa Parao owace ni, “Cit ki latin man, ci icipita; an abiculi mucarani.” Kitmeno min latin otero latin, opito. 102Ka dong latin odongo, ci otere bot nya pa Parao, odoko wode, ocako nyinge Moses kun waco ni, “Pien aywayo ki i pii.”

Moses olwi ocito i Midian

1134

Ka Moses dong odongo, ci inino mo acel en owoto bot lutugi, oneno pekogi. Ka oneno Laejipt mo ka goyo Laibru mo, ma ngat acel ikin lutugi. 12Ci Moses ongiyo piny tungi ki tungi, ka pe oneno ngat mo, ci oneko Laejipt meno, okane woko ikweyo. 13Ka odok orwone, ci oneno jo Ibru aryo ka gilwenyo, ci owaco bot latim bal ni, “Pingo igoyo lawoti?” 14Ci laconu ogamo ni, “Anga ma oketi me bedo laker ki langolkop ikomwa? In imito neka macalo ineke Laejipt ni?” Ci lworo omako Moses kun tamo ni, “Ada lok man ongene woko.” 155Ka Parao owinyo lok man, ci omito neko Moses woko.

Ento Moses oringo olwi woko ki bot Parao, ocito i lobo Midian ci ocako bedo kunu. 16Inino mo acel ka Moses obedo piny inget wang pii, anyira abiro pa Yecero6 mayam onongo ajwaka pa jo Midian gubino gutwomo pii, ci gupongo wee ki pii me amata pa lim pa won gi. 17Ento lukwat mogo gubino guryemogi woko; ci Moses oa okonyogi, ci omiyo dyegi ki romigi omato pii. 18Ka gudok cen paco, ci won gi openyogi ni, “Pingo tin wudwogo con?” 19Ci gugamo ni, “laco mo me Ejipt aye olarowa ki bot lukwat. En aye otwomo ki wan pii, dok omiyo dyegi ki romiwa omato.” 20Ci en openyo anyirane ni, “En tye kwene? Pingo wuweko laco meno odong woko? Wulwonge wek obin ocam.” 21Moses oye bedo bot Yecero, ci en omiyo nyare Jipora bot Moses. 22Jipora onywalo latin laco, ci Moses ocako nyinge Gercom, kun waco ni, “An larok i lobo man.”

23Inge lwak kare meno ducu, rwot me Ejipt oto woko, ci jo Icrael gubedo kacur pi bedo opii, kun gikok gimito kony; ci kokogi pi bedo opii owinye bot Lubanga. 247Ka Lubanga owinyo cur meggi pi atwomgi, ci opo pi cikene ki Abraim ki Icaka, ki Yakobo. 25Lubanga oneno jo Icrael, ci ongeyo kit can gi.