Nia 3

Lubanga olwogo Moses

1Ka yam Moses tye kakwayo dyegi ki romi pa won dakone Yecero, ma ajwaka pa jo Midian, ci otero dyegi ki romi i tim ma tung kupotoceng. Owoto kwede wa i Koreb, ma got pa Lubanga. 21Lamalaika pa Rwot onen bote ileb mac ma i dye caka. Moses oneno caka tye kalyel mac ento gin mo peke kawang. 3Moses owaco ni, “Abingak wek anen gin manen okanini pien caka pe tye kawang.” 4Ka Lubanga oneno ni en ongak ka nenone, ci olwonge ki icaka ni, “Moses! Moses!” Ci en ogamo ni, “An a ene.” 5Ci Lubanga owace ni, “Pe inyik cok kany. Luny war woko ki ityeni, pien kabedo ma icung iye ni ngom maleng.” 6Ka owaco ni, “An Lubanga pa woru, Lubanga pa Abraim, Lubanga pa Icaka ki Lubanga pa Yakobo.” Ci Moses okano wange woko, pien onongo lworo neno Lubanga.

7Rwot dok owaco ni, “Dong atyeko neno atwom pa jona i Ejipt, ki bene awinyo kokogi ikom ludito maloyo ticgi. 8Piman dong alor piny ka larogi ki i cing jo Ejipt, ki kwanyogi woko ki i lobo meno, wek akelgi i lobo maber, malac, lobo maber mamiu, ikabedo pa jo Kanaan, jo Kit, jo Amor, jo Periji, jo Kiv ki jo Jebuc. 9Ci nen, koko pa jo Icrael dong owinye wa bota, dok aneno kit aun ma jo Ejipt giunugi kwede. 10Kombedi dong abicwali bot Parao wek icit ikwany jona, likwayo pa Icrael woko, ki i Ejipt.” 11Ento Moses owaco bot Lubanga ni, “An anga ma aromo cito bot Parao, ki kwanyo likwayo pa Icrael woko ki i Ejipt?” 12Lubanga ogamo ni, “Ento an aye abibedo kwedi; man aye bibedo lanyut boti, ma nyutu ni an aye acwali. Ka dong ityeko kwanyo jona woko ki i Ejipt, ci wubiworo Lubanga ikom got man.” 132

Ento Moses owaco bot Lubanga ni, “Ka acito bot jo Icrael, awaco botgi ni, ‘Lubanga pa kwarowu ocwala botwu,’ ce ka gupenya ni, ‘Nyinge anga?’ Ci abiwaco botgi ningo?” 14Ci Lubanga owaco ki Moses ni, “ATYE MA ATYE.” Ka dok owaco ni, “Wac lok man bot jo Icrael ni, ‘ATYE aye ocwala botwu.’” 15Lubanga dok onwoyo waco bot Moses ni, “Wac lok man bot jo Icrael ni, ‘Rwot, ma en Lubanga pa kwariwu, Lubanga pa Abraim, Lubanga pa Icaka, Lubanga pa Yakobo, ocwala botwu.’ Man aye nyinga matwal, wubipo ikoma, wun ki likwayowu ducu kitmeno.” 16Cit icok ludongo pa jo Icrael kacel, ka iwac botgi ni, “Rwot, ma en Lubanga pa kwariwu, Lubanga pa Abraim, pa Icaka ki pa Yakobo, otyeko nen bota, kun waco ni, aciko wanga kanenowu, ki kit ma kitimowu kwede i Ejipt. 17Dong amoko ni abikwanyowu woko ki i atwom ma wutye kwede i Ejipt, adwokowu i lobo pa jo Kanaan, jo Kit, jo Amor, jo Periji, jo Kiv ki jo Jebuc, i lobo maber mamiu. 18Ci gin gibiworo dogi; in ki ludongo pa jo Icrael wubicito bot rwot me Ejipt, ci wuwace ni ‘Rwot, ma en Lubanga pa jo Ibru, oromo kwedwa, ci kombedi walegi ni, wek wawot i tim, wot maromo nino adek, wek watyer gitum bot Rwot Lubangawa.’ 19Angeyo ni rwot me Ejipt pe biye wun wucito nio ka kidiye tektek. 20Ma omiyo abiryeyo bada, ci abipwodo jo Ejipt ki tango ducu ma abitiyo kunu; ci lacen en biye wucito. 213Dok abimiyo jona ginongo gum inyim jo Ejipt, wek ka wubicito, pe wucit ki cingwu nono. 22Dako acel acel bikwayo dako wadi, ki dako ma labedo i ode, kun gilego atego ryal ki atego jabu, ki bongo bene ma wubiruku ikom awobewu ki anyirawu; kitmeno miyo wubiyako jo Ejipt.”