Nia 4

Lubanga omiyo ki Moses Teko me tiyo Tango

1Moses ogamo ni, “Ento ka jo Icrael, pe gibiye loka, dok pe gibiwinyo doga, pien gibiwaco ni, ‘Rwot gire pe onen boti, ci abitimo ango?’”

2Rwot owace ni, “Meno gin ango ma i cingi ni?” Moses ogamo ni, “Odo.”

3Ci Rwot owace ni, “Bol piny i ngom.” Ka Moses obolo piny i ngom, ci odo oloke odoko twol ci Moses oringo woko cen. 4Ento Rwot owaco bot Moses ni, “Rye cingi imak kitung yibe.” Ci Moses oryeyo cinge, omako; ci twol oloke odoko odo ki i cinge. 5Rwot owaco ni, “Man bimiyo giye ni Rwot Lubanga pa kwarigi, Lubanga pa Abraim, pa Icaka, ki pa Yakobo, otyeko nen boti.” 6Ci Rwot owace ni, “Rwak cingi ibongoni.” Moses orwako cinge ibongone; ka okwanyo woko, ci nen, cinge orugu matar macalo pee. 7Rwot dok owace ni, “Rwak cingi ibongoni.” Ci dok orwako cinge ibongone; ka okwanyo woko ci nen, cinge odok kakare macalo kome mukene ducu. 8Lubanga dok owaco ni, “Ka pe gibiye lokki, nyo pe gibiparo bene pi lanyut mukwongo ni, ci gibiye lanyut malacen. 9Ka bene pe gibiye lanyut magi aryo ni ducu, ki kwero winyo dogi, ci ibitwomo pii ki i kulu Nail, ibionyo i ngom kama otwo; ci pii ma itwomo ki i Nail bidoko remo ki i ngom ma otwoni.”

10Ento Moses owaco bot Rwot ni, “Ai Rwot, an ladwal nia wa con, kadi wa ikare ma ibedo kalok kweda. Onongo atye ma aywayo lok mot, leba dwale woko.” 11Rwot dok owace ni, “Anga ma oketo dog dano? Anga mamiyo dano bedo ladwal, ma ite oding, maneno piny nyo ma wange oto? Pe an ma a Rwoti aye atiyo magi ducu? 12Pimeno dong icit, abibedo ki dogi, abipwonyi ki gin ma ibiloko.” 13Ento en dok ogamo ni, “Ai, Rwota, alegi ni icwal ngat mukene.” 14Ci kiniga pa Rwot otuge ikom Moses kun waco ni, “Aron pe tye kunu, ma omeruni, ma Lalevi? An angeyo en lebe loko atir, ci nen, en tye kabino karwate kwedi; ka en bineni, ci cwinye bibedo yom. 15In ibilok kwede, dok ibitite lok ma omyero en owac ci an abititiwu gin ma omyero wutii. 16En aye bilok ki lwak maka in; en bibedo maka dogi, dok in i bibedo macalo Lubanga bote. 17Ibicito ki odo man i cingi, ma ibitiyo ki lanyut.”

Moses odok cen i Ejipt

18Ka Moses odok bot Yecero, ma won dakone, ci owace ni, “Alegi wek kong adok bot omegina ma i Ejipt, wek anen ka pud gitye makwo.” Ci Yecero ogamo dog Moses ni, “Cit ki kuc.” 19Rwot owaco bot Moses i Midian ni, “Dok cen wa i Ejipt; pien jo mayam mito neki dong guto woko ducu.” 20Kitmeno Moses okwanyo dakone ki awobene, oketogi iwi kana, ci owoto, odok cen i lobo Ejipt, kun omako odo ma Lubanga owaceni owot kwede.

21Rwot dok oloko bot Moses ni, “Ka dong ityeko dok cen i Ejipt, nen ni itiyo inyim Parao tango ducu ma atyeko keto i cingini; ento abiweko cwinye doko nwang, ma pe biye dano mecito. 22In ibiwaco bot Parao ni, ‘Rwot owaco kit man ni, Icrael aye latin kayona. 231Ci awaco boti ni, wek latina ocit ka wora; ka ikwero kome ni pe ocit, ci nen, abineko latin kayoni woko.’”

24Idye wor acel ikabutugi i yoo me cito i Ejipt en aye Rwot oromo ki Moses kun mito neke woko. 25-26Ci Jipora okwanyo got mabit, oliro ki kom latin awobine. Ci okwanyo delkom ma olironi ci ogudu ki tyen Moses kun wace ni, “Ada, in i cwara me remo!” Ci Rwot oweko kwo pa Moses, pien Jipora oloko ni, “In i cwara me remo.”

27Rwot owaco bot Aron ni, “Cit i tim, wek icirom ki Moses.” Ci Aron ocito oromo ki Moses wa ite got pa Lubanga ka onoto leme. 28Moses otito bot Aron lok ducu ma Rwot owace, ma ocwale kwede, ki lanyut ducu ma ociko ni otii. 29Ci Moses ki Aron gucito, gucoko ludongo pa jo Icrael ducu. 30Ci Aron oloko lok ducu ma Rwot oloko bot Moses, ci onyutu lanyut ducu inyim dano. 31Dano guye; ka guwinyo ni Rwot otyeko limo jo Icrael dok otyeko neno atwomgi ci gukulu wigi piny, guworo Lubanga.