Nia 5

Moses ki Aron inyim Parao

1Lacen Moses ki Aron gucito bot Parao, guwace ni, “Rwot Lubanga pa Icrael owaco kit man ni, ‘Wek jona gucit, wek gukwer nino madit i tim.’” 2Ento Parao ogamo ni “Rwot en anga, ma myero awiny doge ci awek jo Icrael gucit? An pe angeyo Rwot meno, dok bene pe abiweko jo Icrael bicito!” 3Gin dok guwace ni, “Lubanga pa jo Ibru oromo kwedwa walegi ni iwek wan wacit, wawot wot me nino adek, katyero gitum bot Rwot Lubangawa, wek en pe opot ikomwa ki two gemo nyo pala lucwan.” 4Ento Parao ma rwot me Ejipt owaco botgi ni, “Moses wun ki Aron, pingo wukwanyo dano woko ki i dog ticgi? Wuwac ki opii gudok i dog tic.” 5Ka dok owaco ni, “Nen, jowu gudoko dwong woko i lobo makato Luejipt, wun dong wumitoni gugik ticgi woko?” 6Inino meno cut en ociko ludito maloyo tic pa lwak, ki lunyampara ni, 7“Pe dok wumede ki kelogi lum ocwici ni me goyo matapwali kit macon, wek gin aye gucit kakelone. 8Ento wel matapwali mayam gin goyoni wuwek gumede kwede, pe wudwok wele piny; pien gin luwackom, ma omiyo gikok ni, ‘Wek wacit i tim katyero gitum bot Lubangawa.’ 9Wumii tic mapek wek co gubed i dog tic pe guket cwinygi ilok goba.”

10Kitmeno ludito maloyo lunyampara pa lwak gucito guwaco bot dano ni, “Parao owaco kit man ni, ‘Wan pe dok wabikeliwu lum ocwici ni. 11Wun dong wucit ki komwu, wuyeny kama wutwero nongo lum ocwicini ki iye ento ticwu pe bidok piny.’” 12Kitmeno jo Icrael guket i lobo Ejipt ducu kacoko lum ocwici. 13Ludito maloyo tic guruyugi kun gin waco ni, “Wucob ticwu, kit me nino ducu, kit macalo yam lum ocwicini tyeni.” 14Ci ludito tic ma Parao oketogi me neno tic, gubedo kapwodo lunyampara pa jo Icrael kun gipenyogi ni, “Pingo pe wucobo tic me goyo matapwali tin, kit macon?”

15Ka lunyampara pa jo Icrael gucito gukok bot Parao ni, “Pingo itimowa kit man, ladit? 16Pe dong kikelo lum ocwici botwa, ento kiwacowa ni, ‘Wugo matapwali!’ Nen, ka kipwodowa, ladit; ento bal tye ikom lwaki!” 17Ento en ogamo ni, “Wun luwackom, wun luwackom; en ma omiyo wuwaco ni, ‘Wuwek wacit katyero gitum bot Rwot.’ 18Wucit kombedi katic. Pe kibikeliwu lum ocwicini mo, dok bene wubigoyo matapwali marom ki wel macon.” 19Lunyampara pa jo Icrael guneno ni dong gitye marac, ka kiwaco botgi ni, “Wun pe wubidwoko piny wel matapwali ma wugoyo nino ki nino.” 20Ka gia gidwogo ki bot Parao; ci guromo ki Moses ki Aron ma onongo yam gitye kakurugi woko. 21Ci guwaco botgi ni, “Rwot oneno gin ma wutimo dok ongoliwu kop, pien wun wukelo mone ikomwa bot Parao ki lutice, dok wumiyo gunongo kacungu me nekowa bene.”

Lega pa Moses

22Ci Moses oloke bot Rwot, ci owace ni, “Ai Rwot, itimo joni marac kuman pingo? Icwala ka ngo ka? 23Nicake ma abino bot Parao, ma aloko kwede pi nyingi, en ocako timo joni marac cut, in bene peya itimo gin mo pi laro joni wa ki acel.”