Nia 6

1Ento Rwot owaco bot Moses ni, “Tin dong ibineno gin ma abitimo ikom Parao; abitic ki tekona madit, ci en bicwalo jona woko ki i lobone ki tek.”

Lubanga onwoyo lwongo Moses

21

Lubanga owaco bot Moses ni, “An a Rwot. 3Yam anen bot Abraim, bot Icaka ki bot Yakobo, kun gingeyo ni an Lubanga Matwero ducu, ento pe amiyo gungeyo ni nyinga aye Rwot. 4An yam amoko gicikena kwedgi bene, pi miyo botgi lobo Kanaan, en aye lobo mayam onongo gin lubedo iyeni. 5Dok bene atyeko winyo cur pa jo Icrael pi atwom ma jo Ejipt olokogi gudoko opiini, an bene dong atyeko po ikom gicikena. 6Wac bot jo Icrael ni, ‘An a Rwot, abikwanyowu woko ki ipeko ma jo Ejipt oketo ikomwu, abilarowu ki i opiiwu, ci abikokowu woko ki cinga ma aryeyo, abipwodogi ki tic me aura madito ma abitiyone. 7Abiweko wubedo jona, dok an abibedo Lubangawu; wun wubingeyo ni An a Rwot Lubangawu, ma akwanyowu ki ikom peko ma jo Ejipt guketo ikomwu. 8Ci abikelowu i lobo mayam akwongo pire ni abimiyo bot Abraim, ki Icaka ki Yakobo, abimiyo botwu obed lobowu; An a Rwot.’” 9Moses oloko kitmeno bot jo Icrael; ento pe guwinyo lok pa Moses, pien cwinygi onongo obale woko pi tic me opii mukato kare.

10Ci Rwot owaco bot Moses ni, 11“Cit idony bot Parao, rwot me Ejipt, ci itite ni owek jo Icrael gua woko ki i lobone.” 12Ento Moses owaco bot Rwot ni, “Nen an te leba pe tye atir. Ka jo Icrael pe guwinyo loka, ci Parao biwinyo loka ningning?” 13Rwot Lubanga ociko Moses gin ki Aron me cito bot jo Icrael, ki bot Parao, rwot me Ejipt me kwanyo jo Icrael woko ki i lobo Ejipt.

Tekwaro pa Moses ki Aron

14Man aye ludito wi kaka i odi pa kwarigi: lutino awobe pa Reuben, ma latin kayo pa Icrael, gin ene: Kanok, Pallu, Kejeron ki Karmi; meno aye dogola pa Reuben. 15Lutino awobe pa Cimeon gin ene: Jemuel, Jamin, Okad, Jakin, Jokar ki Caul, awobi pa dako Lakanan; meno aye dogola pa Cimeon. 162Man aye nying lutino awobe pa Levi, kun lubu yalwakgi: Gercon, Kokat ki Merari; wel mwaka me kwo pa Levi oromo miya acel ki pyere adek wiye abiro. 17Lutino awobe pa Gercon gin ene: Libni ki Cimei, macalo dogolagi tye kwede. 18Lutino awobe pa Kokat gin ene: Amram, Ijar, Kebron ki Ujiel; wel mwaka me kwo pa Kokat oromo miya acel ki pyere adek wiye adek. 19Lutino awobe pa Merari gin ene: Makali ki Muci. Meno aye dogola pa Lulevi, kun lubu yalwakgi. 20Amram onyomo Yokobedi lamin wone, ci onywalo Aron ki Moses; wel mwaka me kwo pa Amram oromo miya acel ki pyere adek wiye abiro. 21Lutino awobe pa Ijar gin ene: Kora, Nepeg ki Jikri. 22Lutino awobe pa Ujiel gin ene: Micael, Elijapan ki Citri. 23Aron onyomo Eliceba nya pa Aminadab, lamin Nakucon, ci onywalo Nadab, Abiu, Eleajar ki Itamar. 24Lutino awobe pa Kora gin ene: Elkana ki Abiacap; meno aye dogola pa jo pa Kora. 25Eleajar, wod pa Aron, onyomo dako ma ikin anyira pa Putiel, ci onywalo Finekaci. Meno aye ludito wi kaka ma i odi pa Lulevi, macalo dogolagi tye kwede.

26Man aye Aron ki Moses ma Lubanga owaco botgi ni, “Wukwany jo Icrael woko ki i lobo Ejipt ki bucagi.” 27Gin aye yam guloko ki Parao rwot me Ejipt pi kwanyo jo Icrael woko ki i lobo Ejipt.

Cik pa Rwot bot Moses ki Aron

28Ikom nino ma Rwot oloko iye ki Moses i lobo Ejipt, 29Rwot owaco bot Moses ni, “An a Rwot; tit bot Parao rwot me Ejipt lok ducu ma awaco ki in.” 30Ento Moses owaco bot Rwot ni, “Nen, te leba pe atir; Parao biwinya ningning?”