Nia 7

1Rwot owaco bot Moses ni, “Nen aketo in macalo Lubanga bot Parao, ki omeru Aron bibedo lanebini. 2In ibiloko lok ducu ma aciko boti; ci omeru Aron bitito bot Parao pi weko jo Icrael gua woko ki i lobone. 31Ento abiweko tok Parao bidoko tek, abimedo lwak lanyut ki tango i lobo Ejipt. 4Parao pe biwinyo loki; abimiyo pwod ikom Ejipt, ci abikwanyo jona, ma gin aye likwayo pa Icrael ki i Ejipt, kun amiyo pwod ikome ki lanyut madito ma abitiyo. 5Jo Ejipt gibingeyoni An a Rwot, ka abitic ki tekona ikom lobo Ejipt pi kwanyo jo Icrael woko ki ikin gi.” 6Moses ki Aron gutimo kit ma Rwot ocikogi. 7Moses onongo mwaka me dite romo pyere aboro, ki pa Aron pyere aboro wiye adek, ikare ma gubedo kalok ki Paraoni.

Odoo pa Aron

8Rwot dok oloko ki Moses ki Aron ni, 9“Ka Parao owaco botwu ni, ‘Wunyut ada mewu pi tiyo tango,’ ci in Moses ibiwaco ki Aron ni, ‘Kwany odooni, ibol piny inyim Parao, wek oloke odok twol.’” 10Kitmeno Moses ki Aron gucito bot Parao gutiyo kit ma Rwot ocikogi kwede. Aron obolo odoone piny inyim Parao ki lutice, ci oloke odoko twol. 11Ci Parao olwongo jo ma luryeko ki lutal, ma gin lutyet ma i Ejipt, gin bene gutimo ma romaroma kitmeno bene ki ryekogi. 12Pien ngat acel acel obolo odoone piny, ci guloke gudoko twol, ento odo pa Aron omwonyogi woko ducu. 13Ento tok Parao pud obedo tek aye, pe omedo ki winyogi kit ma Rwot owaconi.

Gemo remo

14Rwot dok owaco bot Moses ni, “Tok Parao odoko tek, dok okwero weko dano me cito. 15Cit odiko wek irwate ki Parao ka en tye kacito i dog kulu; wek ikur en inget kulu, mak odoo i cingi, mayam oloke odoko twoli. 16Ci ibiwace ni, ‘Rwot Lubanga pa jo Ibru ocwala boti, kun waconi, wek jona gucit, wek guciwora i tim, ento nio wa kombedi, in peya iworo doga.’” 172 Rwot dong owaco kuman ni, “Pi gin ma abitiyo, bimiyo ingeyo ni An a Rwot.” Nen dong, abigoyo pii matye i kulu Nail ki odoo matye i cingani, ci pii biloke doko remo. 18Ci rec ma i Nail bito woko, kulu Nail biloke bidoko ma ngwece co, dok jo Ejipt cwinygi bikwero mato pii ma i kulu Nail woko. 19Rwot owaco bot Moses ni, “Wac ki Aron ni ‘Kwany odooni ci irye cingi iwi pii me Ejipt: iwi kulugi, iwi kulu akwinyagi, iwi kabedo ducu kama pii opong iye, wek guloke gudok remo; wek remo orom lobo Ejipt ducu ki atabo wee ducu, ki i agulu godi ducu.’”

20Moses ki Aron gutimo macalo Rwot ocikogi. Aron oilo odoone malo ki inyim Parao ki lutice; ka ogoyo ki pii ma i kulu Nail, ci pii ducu ma i kulu Nail oloke odoko remo. 21Rec ma i kulu Nail gucako to woko, ci ngwec pii kulu Nail odoko coo matek ma omiyo jo Ejipt pe dong gitwero mato pii ma i kulu Nail; dok remo oromo i lobo Ejipt ducu. 22Ento lutyet me Ejipt bene gutimo ma romaroma ki ryekogi; omiyo tok Parao odoko tek aye, okwero winyogi woko, kit ma Rwot owaconi. 23Parao oloke odok i ode, kun cwinye bene pe paro pi gin man ma otimeni. 24Jo Ejipt ducu gukwinyo pii me amata inget kulu Nail, pien pe onongo gitwero mato pii ma i kulu Nail.

Gemo ogwal

25Nino okato abiro nia ma Rwot ogoyo kulu Nail ki remo.