Nia 8

1Rwot dok owaco bot Moses ni, “Cit idony bot Parao, ci iwace ni Rwot owaco kuman ni, ‘Wek jona gucit wek guciwora. 2Ento ka ikwero wekogi ni gucit, ci nen, abicoro gemo ogwal i loboni ducu. 3Ogwal bicore limuk i kulu Nail ma gibibino wa i odi bene ki i kicikani, iwi kitandani, i odi pa lutici, pa lwaki, i keno tedoni, ki otako lanywang mokoni. 4Ogwal bipye wa ikomi, ikom lwaki, ki ikom lutici ducu.’” 5Rwot dok owaco bot Moses ni, “Wac bot Aron ni, ‘Dong irye cingi ki odooni iwi kulu, iwi kulu akwinya, ki iwi kut, wek ogwal ocore i lobo Ejipt ducu!’” 6Ka Aron oryeyo cinge iwi pii ma i Ejipt, ci ogwal ocore oumu wi lobo Ejipt woko. 7Ento lutyet bene gutimo ma romaroma ki ryekogi, ci gukelo lwak ogwal bene i lobo Ejipt.

8Lacen Parao olwongo Moses ki Aron, ci owaco ni, “Leg Rwot wek okwany ogwal woko ki ikoma ki ikom lwaka; ci abiweko dano gicito katyero gitum bot Rwot.” 9Moses owaco bot Parao ni, “Ber in aye icika kare ma omyero aleg iye piri, pi lutici ki pi lwaki, wek ogwal oa woko ikomi ki i odini, wek odong ma i kulu Nail keken.” 10Ci Parao ogamo ni, “Diki adikani.” Moses owaco ni, “Obed kit macalo iwaconi, wek in inge ni pe tye lubanga mo mukene macalo Rwot Lubangawani. 11Ogwal bia woko ki boti, ki i odini, ki ikom lutici ki lwaki, ci kibiweko ma i kulu Nail keken.” 12Ci Moses ki Aron gukato woko ki bot Parao. Moses okok pi ogwal bot Rwot, kit macalo onongo en oye ki bot Parao. 13Rwot otiyo kit ma Moses olego; ci ogwal ocako to woko ki i odi, i dyekal ki i poti ducu. 14Jo Ejipt gugurugi lipim, lobo okwok woko mangwe. 15Ento ka Parao onenoni ogwal dong gutyeko to woko, ci toke odoko tek, pe dok otimo kit ma Rwot owaconi.

Gemo nyuggi

16Rwot dok owaco bot Moses ni, “Wac bot Aron ni, ‘Il odo ni malo ci igo ki apwa ma i lobo wek odok nyuggi ma biromo lobo Ejipt ducu.’” 17Ci Aron oilo odoone, ci ogoyo ki apwa ma i ngom, ci nyuggi obino ikom dano ki lee ducu. 18Lutyet gutemo ki ryekogi wek nyuggi obin, ento pe gutwero. Pieno nyuggi oromo kom dano ki lee ducu. 191Ci guwaco bot Parao ni, “Man teko pa Lubanga kikome.” Ento tok Parao obedo tek, pe omedo ki winyogi, kit ma Rwot ceng ocikoni.

Gemo lwango

20Rwot dok owaco bot Moses ni, “A malo odiko con, icikur Parao, ka en tye kacito i dog kulu ci iwace ni, Rwot owaco kuman ni, ‘Wek jona gucit, wek guciwora. 21Ento ka pe iweko jona gucito, ci nen, abicoro lwango limuk ikomi, ikom lutici, ikom lwaki, i odini ki odi pa jo Ejipt ducu lwango bicore iye limuk, wa kama wubicung iye ducu bene. 22Ento inino meno abipoko lobo Gocen pat, en aye kabedo pa jona, wek pe lwango ocore iye limuk; wek wunge ni, An a Rwot ma atye katiyo man i lobo. 23Kitmeno abipoko kin jona ki joni. Lanyut man bitime diki.’” 24Ci Rwot oyubu kitmeno; omiyo lwak lwango ocore limuk i ot pa Parao ki i odi pa lutice; i lobo Ejipt ducu lwango obalo lobo woko.

25Ci Parao olwongo Moses ki Aron, kun waco ni, “Wucit, wutyer gitum bot Lubangawu ki i lobowa kany.” 26Ento Moses ogamo ni, “Pe watwero timone kitmeno; pien wabityero gitum bot Lubangawa mabedo me kwer bot Luejipt. Ka watyero gitum ma obedo me kwer bot Luejipt ma kun gineno ki wanggi, pe gibicelowa ki got? 27Wan myero wawot i tim wot me nino adek pi tyero gitum bot Rwot Lubangawa kit macalo en aye bicikowa kwede.” 28Omiyo Parao ogamo ni, “Abiwekowu wucito katyero gitum bot Lubangawu i tim; ento pe wubiwot kamabor. Wuleg pira aye.” 29Moses ogamo ni, “Nen, abikato woko ki boti, ci abilego Rwot wek lwak lwango oa woko ki ikom in Parao, ki ikom lutici, ki ikom lwaki diki; ento, ladit, pe dok ibwolwa pi kwero ye lwak me cito katyero gitum bot Rwot.”

30Kitmeno Moses okato woko ki bot Parao, ci olego Rwot. 31Rwot otiyo kit ma Moses olegoni, ci okwanyo lwak lwango woko ki ikom Parao, ki ikom lutice, ki ikom lwake, pe acel mo odong. 32Ento tok Parao odoko tek tyen man bene, pe oweko lwak gucito.