Nia 9

Gemo opoto ikom Lee

1Ka Rwot dok owaco bot Moses ni, “Cit bot Parao, ci iwace ni, Rwot Lubanga pa jo Ibru, owaco kuman ni, ‘Wek jona gucit, wek guciwora. 2Kace pud icere ikomgi kun ikweroni pe gucit, 3ci nen, Rwot bipwodi kun kelo two malik ikom leewu ma gitye i olet: ikom aguragura, kanagu, kinagagu, dyangi, romi ki dyegigu. 4Ento abipoko kin lee pa jo Icrael ki pa jo Ejipt, ci lee pa jo Icrael pe bito kadi ki acel mo.’ 5An Rwot atyeko moko nino, ‘Diki abitiyo gin man i lobo.’”

6Orwone Rwot otiyo gin meno; lee pa jo Ejipt ducu guto woko, ento lee pa jo Icrael pe oto kadi ki acel mo. 7Ka Parao ocwalo dano, ci nen, lee pa jo Icrael pe oto kadi ki acel mo. Ento tok Parao odoko tek; pe oweko lwak gucito.

Gemo odeke

8Ci Rwot owaco bot Moses ki Aron ni, “Wujob latuk pong cingwu ki itur keno, wumii Moses oony malo ki inyim Parao. 9Ci bidoko apwa ma duny i lobo Ejipt ducu, ci bikwoto lwak odeke ikom dano wa ikom lee ducu ma bure bityer doko lwak bur.” 101Ci gujobo latuk ki itur keno, gucung kwede inyim Parao, ci Moses oonyo malo, ci okwoto odeke ma otyer odoko bur ikom dano ki ikom lee. 11Man omiyo cung inyim Moses oloyo lutyet woko pi odeke, pien odeke okwoto wa kom lutyet bene ki kom jo Ejipt ducu. 12Ento Rwot omiyo tok Parao odoko tek, ci okwero winyogi woko kit ma Rwot owaco bot Moses.

Gemo me pee

13Ka Rwot dok owaco bot Moses ni, “A malo odiko con, icit icung inyim Parao, ci iwace ni, Rwot Lubanga pa jo Ibru owaco kuman ni, ‘Wek jona gucit, wek guciwora. 14Tin wangi pe abicwalo gemo mera ikom lutici ki ikom lwaki keken, ento ikom in bene wek inge ni pe tye ngat mo marom ki an iwi lobo ducu. 15Kono onongo aryeyo cinga apwodi ki lwaki ducu ki two gemo magwar, kono onongo atyekowu woko ki i lobo; 162 ento aweko in makwo pi lok man, wek anyut teka boti, wek nyinga oywek i lobo ducu. 17In pud itye kanyate ikom lwaka, pe iye wekogi cito. 18Nen, diki icawa man abicoro lwak pee mapek ma bipoto i lobo man, mayam peya otime i lobo Ejipt. 19Piman cwal kwena kombedi, wek icok lee ni ki jamini ducu matye woko i olet igwokgi i ot pien pee bipwodo dano ducu ki lee ma gudong woko i tim ma pe kikelogi paco, ci gin bito woko.’” 20Jo ma ikin lutic pa Parao, ma gin lworo lok pa Rwot, gumiyo opiigi ki leegi guringo gularo odi; 21ento jo ma pe guwinyo lok pa Rwot guweko opiigi ki leegi i olet.

22Rwot owaco bot Moses ni, “Rye cingi malo tung polo, wek pee opot i lobo Ejipt ducu, ikom dano, lee ki ginapita ducu ma i poto, wek orom i lobo Ejipt ducu.”

23Ka Moses oilo odoone malo tung polo; ci Rwot omiyo polo omor, pee ocore i lobo, ma kine orube ki mac, ci Rwot omiyo pee ocwer oromo lobo Ejipt ducu. 243Pee ma omede ki lutkot ma wil i dye pee, pee mapek mapeya otime i lobo ducu me Ejipt nia ikare ma rok man ocake iye. 25Pee opwodo gin ducu ma odong woko i lobo Ejipt, dano ki lee wa ki ginapita ducu dok bene oturu jang yadi ducu. 26Lobo Gocen keken kama jo Icrael tye iyeni, en aye pee obedo peke kunu.

27Ci Parao ocwalo kwena olwongo Moses ki Aron, ci owaco botgi ni, “Dong atyeko poto ibal; Rwot loke tye kakare, ento an ki lwaka dong wabalo. 28Wuleg Rwot pien mor kot ki cwer pa pee dong oromo, abiwekowu wucito, pe dong wubidike kany.” 29Moses owace ni. “Ka akato woko inge taun madit man, ci abiryeyo cinga cut bot Rwot ci mor kot bigik, ki pee bene bibedo pe, wek wun wunge ni man lobo pa Rwot gire. 30Ento angeyoni in kacel ki lutici peya wulworo Rwot Lubanga.”

31(Pee obalo obira ki cayiri woko pien onongo cayiri otyeko ngok ki obira bene ocako turu. 32Ento ngano matar ki ngano makwar pee pe obalogi, pien ki coyogi lacen.) 33Moses okato woko inge taun madit meno ki bot Parao, ci oryeyo cinge bot Rwot; ci mor kot ki pee ogik woko, kot pe dok ocwer i lobo. 34Ento ka Parao oneno ni kot ki mor kot dong ogik, en dok opoto ibal aye, omiyo en kacel ki lutice tokgi odoko tek. 35Kitmeno tok Parao obedo tek, ci okwero weko jo Icrael me cito, macalo Lubanga yam oloko ki i dog Moses.