Nia 10

Gemo bonyo

1Rwot dok owaco bot Moses ni, “Cit bot Parao; pien amiyo toke odoko tek, kacel ki tok lutice, wek anyut lwak lanyut mera man ikin gi, 2wek in itit i it lutinoni ki likwayi kit macalo abedo katuku ki jo Ejipt kit ma iya mitoni, ki kit lanyut ma atiyo ikin gi; wek wun wunge ni An a Rwot.”

3Kitmeno Moses ki Aron gucito gudonyo bot Parao, ci guwace ni, “Rwot Lubanga pa jo Ibru owaco kuman ni, ‘In ibikwero bedo ki mwolo inyima pi kare marom mene? Wek jona gucit, wek guciwora. 4Pien ka ikwero ni jona pe gucit, ci nen, diki abikelo lwak bonyo i loboni. 5Gin biumu lobo woko lipuk, pe tye ngat mo ma bineno lobo; ci gin bicamo gin ma pee ongoyo botwu, ka dok gibicamo yadiwu ducu ma dongo i poto. 6Gin bipongo i odini ki i odi pa lutici ducu ki i odi pa jo Ejipt ducu. Man bibedo gin mayam wegiwu ki kwariwu peya guneno.’” Ka Moses oloke ci okato woko ki bot Parao.

7Ci Lutic pa Parao guwace ni, “Laco man bikelo can ikomwa pi kare marom mene? Wek jo Icrael gucit, wek guti bot Rwot Lubangagi. In peya iniang ni Ejipt dong otyeko bale woko?” 8Omiyo gudwoko Moses ki Aron bot Parao; ci owaco botgi ni, “Dong wucit, wutii bot Rwot Lubangawu. Ento angagi ki ikinwu ma bicito?” 9Ci Moses ogamo ni, “Wan wabicito ki lutinowa, ki luditowa wabicito ki awobewa ki anyirawa. Wabigware ki lwak leewa ducu matino ki madito, pien myero wakwer nino madit bot Rwot.” 10Ci Parao owaco botgi ni, “Ka abiweko wun ki monwu, ki lutinowu wucito, ci nongo Rwot tye kwedwu! Nen wun iwu kirungula, wutye ki kop i iwu. 11Pe twere, co ma ikinwu aye gucit kamiyo woro bot Rwot; pien meno aye gin ma cwinywu tye kapyete iye.” Ci kiryemo Moses gin ki Aron woko ki inyim Parao.

12Rwot dok owaco bot Moses ni, “Rye cingi iwi lobo Ejipt wek bonyo obin obed i lobo Ejipt, ocam gin ma otwi i lobo ducu mayam pee ongoyo.” 13Kitmeno Moses oilo odoone i lobo Ejipt, ci Rwot ocwalo yamo oa tung kunyango okodo i lobo dyeceng meno ducu ki i dyewor benebene; ka oo odiko ci yamo ma oa kunyango okelo bonyo. 141Ci bonyo ocore oromo i lobo Ejipt ducu. Lwak bonyo ma omuke madwong mayam peya onen, dok bene pe binen matwal. 15Pien bonyo oumu lobo woko lipuk, ma lobo ocido woko licuc, ci gucamo gin ma otwi ducu ma i lobo ki nyig yadi ducu mayam pee ongoyo. Pot gin mo pe odong, kadi yat, kadi gin ma otwi i poto ma i lobo Ejipt ducu. 16Ka Parao dok olwongo Moses ki Aron pi oyotoyot, ci owaco botgi ni, “Atyeko timo bal ikom Rwot Lubangawu, ki ikomwu. 17Piman dong alegowu tin wek wutima kica kicel dong keken. Dok wuleg Rwot Lubangawu wek okwany to man woko ki ikoma.” 18Ci Moses okato woko ki bot Parao, ci olego Rwot. 19Rwot omiyo yamo okodo matek nia kitung kupotoceng, otingo bonyo ocorogi woko wa i Nam Makwar; bonyo mo acel pe odong i lobo Ejipt. 20Ento Rwot omiyo tok Parao odoko tek, pe oweko jo Icrael gucito.

Gemo me colpiny

21Rwot dok owaco bot Moses ni, “Rye cingi malo tung polo, wek piny ocid woko licuc i lobo Ejipt, colpiny ma dano winyo wa ikome.” 222Ci Moses oryeyo cinge malo tung polo, ci piny ocido woko matek licuc ma oromo lobo Ejipt pi nino adek. 23Dano mo pe oneno lawote, dok pe ngat mo pe odire ki ikabedone pi nino adek. Ento kitung bot jo Icrael piny onongo leng mere alenga. 24Ka Parao olwongo Moses, ci owace ni, “Cit wuwor Rwot; lutinowu bene myero gucit kwedwu; ento wuwek leewu matino ki madito gudong” 25Ento Moses ogamo ni, “In bene myero imiwa gitum ki gityer me awanga, wek watyer bot Rwot Lubangawa. 26Wan wabicito kacel ki limwa makwo; obong tyen mo pe bidong i ngewa, pien myero wakwany mogo ki ikin gi me woro Rwot Lubangawa, dok pe wangeyo gin ma myero watii kwede bot Rwot, nio ka wabio wa kunu.” 27Ento Rwot omiyo cwiny Parao odoko nwang, pe oweko gucito. 28Parao dok owace ni, “A woko ki bota, pe dok inen wanga, pien inino ma ibineno iye wanga en aye bibedo nino toni bene.” 29Moses ogamo ni, “Pe dok abineno wangi kit macalo iwaco.”