Nia 11

Moses otito pi to pa lutino kayo

1Rwot owaco bot Moses ni, “Pud odong gemo acel ma abiketo ikom Parao ki ikom Ejipt; lacen en biweko wun wua ki kany wucito; ka en biwekowu ni wucit, biryemowu woko lawangacel. 2Lok kombedi bot jo Icrael ducu, wek ngat acel acel oleg Laejipt mabedo cok kwede, wek omiye atego ryal ki atego jabu.” 3Ci Rwot omiyo cwiny jo Ejipt opwoyo jo Icrael. Dok bene lutic pa Parao kacel ki lwake guneno Moses calo ngat madit tutwal i lobo Ejipt.

4Moses owaco ki Parao ni, “Rwot owaco kuman ni, ‘Icwiny dyewor ma tin abiwot i dye Ejipt; 5ci lutino kayo ducu ma i lobo Ejipt bito woko, nia ikom latin kayo pa Parao mabedo iwi komkereni, nio kwede wa ikom latin kayo pa angeca matye karego; wa lutino kayo pa leegi makwo ducu. 6Koko bibedo malik mada ma biromo i lobo Ejipt ducu, koko mayam peya otime, dok pe bitime matwal. 7Ento ikin jo Icrael ducu, dano onyo lee, gwok pe bigweyo ikomgi. Man bimiyo wungeyo ni Rwot opoko kin jo Ejipt ki jo Icrael.’” 8Ci Moses ogiko loke kun waco ni, “Lutici ducu gibibino bota, gibiryebe piny inyima, kun giwaco ni, ‘A woko, ki lwak ma gilubi ducu.’ Ci inge meno, abicito woko gira.” Ci Moses okato woko ki bot Parao ki kiniga madwong.

9Ka dok Rwot owaco bot Moses ni, “Parao pe biwinyi; wek tangona omede orom i lobo Ejipt.”

10Moses ki Aron gutiyo tango meno ducu inyim Parao; ento Rwot omiyo tok Parao odoko tek, pe oweko jo Icrael gucito woko ki i lobone.