Nia 12

Karama me Kato

11

Rwot owaco bot Moses ki Aron ki i lobo Ejipt ni, 2“Dwe man aye bibedo dwewu mukwongo i mwaka. 3Tit bot lwak jo Icrael ducu ni, ikom nino dwe apar me dwe man, ladit wi ot acel acel bikwanyo latin romo nyo latin dyel acel pi ot acel acel, ikit ma dogola pa kwarogi tye kwede. 4Ka ot mo tidi, ma pe romo tyeko ringo latin romo ci won ot meno ki ladogolane ma ode cok kwede gibikwanyo latin romo ma oporo wel dano ma gin tye kwede. Wubipoko malube ki wel dano ma bicamo. 5Wutwero kwanyo latin romo nyo latin dyel makome pe kimwonyo, nyok madite romo mwaka acel. 6Wugwok nio wa inino dwe apar wiye angwen me dweni ka lacen, ka lwak jo Icrael ducu gucoke kacel, gibineko romigi otyeno. 7Guter remo manok, gucwiny ikom okar me dogola ryoryo, ki ikom rii wiye malo i dog odi ma kibicame iye. 8Gucam ringo i dyewor meno, ma kibulu abula; gucam ki Mugati ma Tobi Pe iye, ki pot dek mogo makec. 9Pe wumwod mo manumu, nyo ma kitedo ki pii, ento kibul abula, wiye kacel ki tyene ki jam iye. 10Pe wuwek gin mo odong nio odiko; ka gin mo odong nio odiko, ci wubiwango woko. 11Wubicamo aruya, kun nongo wutweyo pyerwu, dok nongo wuruku war ityenwu, ki nongo bene wumako odo i cingwu, meno aye Karama me Kato me wora, an Rwot. 12Pien i dyewor meno, abikato ki i dye lobo Ejipt, ci abineko lutino kayo ma co ducu, pa dano ki pa lee ma i lobo Ejipt, ci abipwodo lubanga ducu pa jo Ejipt. An a Rwot. 13Remo bibedo lanyut mewu, ikom odi ma wutye iye; ka aneno remo, ci abikato lamal ki kawiwu. Gemo mo pe bipoto ikomwu ma binekowu, ikare ma abipwodo iye lobo Ejipt.”

14“Wubikwero nino man me poyo wiwu ikom gin ma atimo pirwu. Wubikwerone wun ki likwayowu ducu. Man bibedo nino madit bot Rwot, dok bibedo cik matwal.”

Karama me Mugati ma Tobi pe iye

15Ci Rwot owaco ni, “Wubicamo mugati ma pe kirubu ki tobi pi nino abiro; ikom nino mukwongo wukwany tobi ki i ot, wuony woko. Ka ngat mo bicamo mugati ma tobi tye iye, nia inino mukwongo nio wa inino me abiro, dano meno pe kibikwaneni en obedo Laicrael. 16Ikom nino mukwongo wubibedo iye ki gure maleng; ki inino me abirone bene wubibedo iye ki gure maleng; pe kibitiyo tic mo inino meno ducu; ento gin ma dano ducu camo, meno aye wuyubi. 17Wubikwero nino madito me Mugati ma Tobi pe iye, pien ikom nino meno kikome en aye yam akwanyo iye bucawu2 ki i lobo Ejipt; ma omiyo wubikwero nino meno, wun ki likwayowu ducu, wek obed cik matwal botwu. 18Idwe mukwongo, ikom nino dwe apar wiye angwen otyeno, wubicamo Mugati ma Tobi Pe iye, nio wa inino dwe pyere aryo wiye acel otyeno. 19Pe kinong tobi mo i odiwu ikom nino abironi; pien ka ngat mo bicamo gin ma kirubu iye tobi, dano meno kibiryemo woko ki ikin lwak pa jo Icrael, kadi bed en labedo nyo anywali me Icrael. 20Pe wubicamo gin mo ma kirubu iye tobi. Kama wubibedo iye ducu wubicamo Mugati ma Tobi Pe iye.”

Karama mukwongo me Kato

21Moses olwongo ludongo pa jo Icrael ducu, ci owaco botgi ni, “Wuyer lutino romi muporo dogolawu, ci wunek latin romo me Kato. 22Wujak oboke anyero, wek wulut iremo matye ibecen, wucwiny ikom rii dogola ki ikom okar me dogola ryoryo. Dok ngat mo ikinwu pe okat woko ki idogola ode nio wa odiko, 23pien Rwot bikato cito kaneko jo Ejipt. Ka en bineno remo ikom rii dogola, ki ikom okar me dogola, ci Rwot pe bidonyo i odiwu ka nekowu. 24Wugwok lok man obed cik pirwu ki pi likwayowu matwal. 25Ka wubio i lobo ma Rwot bimiyowu, macalo yam ociko, ci wubilubu kit tic man. 26Ka lutinowu gibipenyowu ni, ‘Kit tic man teloke ango?’ 27Ci wubiwaco botgi ni, ‘Man gitum me Kato pa Rwot, pien yam okato lamal iwi odi pa jo Icrael i Ejipt, ikare ma oneko jo Ejipt, ci obwoto odiwa.’” Ci dano gukulu wigi piny, guworo Lubanga.

28Jo Icrael gucito gutimo kitmeno; kit macalo Rwot ociko Moses ki Aron.

Gemo me agiki: To pa lutino kayo ma co

29Icwiny dyewor, Rwot oneko lutino kayo ma co ducu ma i lobo Ejipt: okwongo ki ikom latin kayo pa Parao mayam obedo ikomkere, oo kwede wa ikom latin kayo ma laco pa ngat ma kiyako matye i ot kol, ki lutino kayo ma co pa lee makwo ducu. 30Parao oa malo i dyewor, en ki lutice ducu ki jo Ejipt ducu; koko obedo malik mada i Ejipt, pien pe odong ot mo ma dano pe oto iye. 31Parao olwongo Moses ki Aron ki i dyewor, ci owaco botgi ni, “Wua, wucit woko ki ikin lwaka, wun kacel ki jo Icrael ducu; wuciti, wuwor Rwot, kit macalo wuwaconi. 32Wucit ki romiwu ki dyangiwu kit macalo wuwaconi, wucit giwu; wulama gum bene!”

33Jo Ejipt gubedo karuyu dano pi cwalogi woko ki i lobogi pi oyotoyot; gubedo kalok ni, “Wabito dong watum woko ducu ka pe wua.” 34Kitmeno omiyo dano gutingo moko mapeya kirubu iye tobi, gutweyo otako lanywange ki bongo umgi, gutingo kwede iwi gwokgi. 353Jo Icrael gutiyo kit macalo nene Moses ocikogi, gubedo kalego atego ryal ki atego jabu, ki bongi, ki bot jo Ejipt. 36Rwot omiyo cwiny jo Ejipt opwoyogi, ci gubedo ka miyogi gin ducu ma gulego. Kitmeno guyako jo Ejipt.

Jo Icrael gua woko ki i Ejipt

37Jo Icrael gucako wotgi nia ki i Ramcec nio i Cukot; co ma guwoto ki tyen guromo alip miya abicel, ma pe iye mon ki lutino. 38Ki lwak kwayi rok mapatpat bene gucito kwedgi, ki lwak lee makwo mapol tutwal, romi, dyegi ki dyangi. 39Ci gutedo capat ki moko ma gunyobo i otako labongo tobi ma gutero ikare ma gua ki i Ejipt, pien onongo pe guyubu tobi; pien kibedo kacwalogi woko ki tek nia ki i Ejipt, kun pe dong gutwero dike, pe bene guyubu peke mo.

40Kare ma jo Icrael gubedo kwede i Ejipt oromo mwaka miya angwen ki pyere adek. 41I agiki me mwaka miya angwen ki pyere adeke, ikom nino meno kikome, en aye mony ducu pa Rwot gua gumol woko ki i lobo Ejipt.

42En aye obedo dyewor ma Rwot okuru iye piny me kwanyogi woko ki i lobo Ejipt; dyewor meno en aye dyewor ma jo Icrael, gin ki likwayogi ducu, gikuru iye Rwot.

Cik mukene ma mako Karama me Kato

43Ci Rwot owaco bot Moses ki Aron ni, “Man aye cik ma mako Karama me Kato: larok mo pe bicamo, 44ento opii ducu mayam ki wilo ki lim bicamo ka onongo dong kityeko lirogi. 45Labedo mo nyo lapakaca mo pe bicamo. 46Wubicamo ki i ot acel; pe wubikato ki ringo mo woko nia ki i ot, cogone bene pe kibituru iye. 47Lwak jo Icrael ducu gibikwero nino man. 48Ka larok mo bedo ikinwu ce mito kwero Karama me Kato bot Rwot, wek kong kilir kom co ducu matye bote, ka dong onyik cok kalubu kit kwer man. En dong kibinene macalo anywali me Icrael. Ento dano ma pe kiliro pe bicamo. 49Cik bibedo acel pi anywali ki pi lurok ma bedo ikinwu.”

50Ci jo Icrael ducu gutimo kit macalo yam Rwot ociko Moses ki Aron kwede. 51Ikom nino meno kikome en aye yam Rwot okwanyo iye mony pa jo Icrael woko ki i lobo Ejipt ki bucagi.