Nia 13

Dyero lutino kayo bot Rwot

1Rwot owaco bot Moses ni, 21“Dyer lutino kayo ma co ducu gubed mega; gin ducu ma okwongo yabo ic ikin jo Icrael, pa dano ki pa lee bene, ducu mera.”

Nino madito me Mugati ma Tobi pe iye

3Moses owaco ki lwak ni, “Wupo ikom nino man, ma wua iye woko ki i Ejipt i ot me opii, pien Rwot okwanyowu woko ki ikabedo man pi tekone madit; pe wubicamo mugati mo ma tobi tye iye. 4Tin wun dong wubicito woko, i dwe me Abib. 5Ka Rwot bikelowu i lobo pa jo Kanaan, jo Kit, jo Amor, jo Kiv ki jo Jebuc, mayam okwongo pire bot kwariwu ni ebimiyowu, lobo mamiu maceko cam ki ma gwoko lee, wubilubu kit tic man idweni. 6Wubicamo Mugati ma Tobi Pe iye pi nino abiro; ikom nino me abirone en aye wubikwero iye nino madit bot Rwot. 7Pe wubicamo mugati ma kirubu iye tobi pi nino abiro. Dok bene pe wubed ki tobi ikabedowu ducu. 8Inino meno ibitito bot lutinoni ni, ‘Man obedo tye pi gin mayam Rwot otimo pira ikare ma aa woko ki i lobo Ejipt.’ 9Man bibedo lanyut i cingi, dok bibedo i tur nyimi, me poyo wi, wek cik pa Rwot obed idogwu; pien Rwot okwanyowu woko ki i Ejipt ki tekone madit. 10Pimeno wugwok cik man ikare ma kicikoni mwaka ki mwaka.”

Lutino kayo

11Ci Moses omede kun waco ni, “Ka Rwot bikelowu i lobo pa jo Kanaan, macalo yam okwongo ki bot kwariwu ni ebimiyowu, 122ci wubiyeko lutino co ducu mukwongo yabo ic gubed pa Rwot. Lutino kayo ma co pa limwu ducu ma twone gibibedo pa Rwot. 13Latin kayo ma laco pa kana ibikoko ki romo acel, nyo ka pe ikoko, ci ibineko woko kun ituru ngute. Wubikoko latin kayowu ma laco acel acel ma ikin lutinowu bene. 14Ikare me anyim, ka latini bipenyi ni, ‘Man kono teloke ango?’ Ci ibiwace ni, ‘Rwot yam okwanyowa woko ki i Ejipt ki tekone madit, i ot me opii. 15Pien ikare mayam Parao okwero woko matek ni pe wacit, Rwot oneko lutino kayo pa dano ki pa lee makwo ma co ducu ma i lobo Ejipt. Man omiyo atyero bot Rwot twon ducu ma gukwongo yabo ic; ento akoko awobena ma lutino kayo ducu.’ 16Man bibedo macalo lapowic ingut cingwa, nyo gin me atweya i tur nyimwa; pien Rwot yam okwanyowa woko ki i Ejipt ki tekone madit.”

Lubanga otelo dano ki wir me pol ki me mac

17Ka Parao oweko dano gucito, ci Lubanga pe otelo wigi i yoo ma dok tung lobo pa Lupiliciti, kadi bedi yam yoone cok; pien Lubanga owaco ni, “Ka dano gibirwate ki mony, ci cwinygi bibale woko gibidok woko cen i Ejipt.” 18Ento Rwot otelo wi dano kun rabo kwedgi piny i yoo ma dok tung tim mukemo Nam Makwar. Ci jo Icrael gua woko ki i lobo Ejipt ma guyube pi lweny. 193Moses okwanyo cogo pa Yucepu ocito kwede; pien yam Yucepu omiyo jo Icrael gukwongo kwong matek, kun waco ni, “Ka Lubanga bilimowu; myero wuting cogona nia ki kany, wuwot kwede.” 20Jo Icrael gua ki i Cukot, gugony i Etam i dog tim. 21Rwot otelo nyimgi i dyeceng ki pol ma ocung macalo wir me nyutugi yoo, ki i dyewor telo nyimgi ki mac ma ocung macalo wir me menyo piny wek gubed kawot dyeceng ki dyewor; 22wir me pol dyeceng ki wir me mac dyewor, kun pe aa woko ki inyim dano.