Nia 14

Ngolo Nam Makwar

1Rwot dok owaco bot Moses ni, 2“Tit ki jo Icrael ni gudok cen ki ngegi, wek gugony inyim taun me Pi-akirot, ikin Migdol ki nam, inyim Baal-jepon. 3Pien Parao bitamo ni, ‘Jo Icrael pud gitye kamal atata i lobo; dok tim ogengogi woko.’ 4Abimiyo tok Parao doko tek, ci en biryemo korgi, ci abinongo deyo ikom Parao ki monye ducu; miyo jo Ejipt gibingeyo ni An a Rwot.” Ci jo Icrael gutimo kit ma kiwaco botgi.

5Ka kitito bot rwot me Ejipt ni jo Icrael gutyeko lwi woko, ci Parao rwot me Ejipt ki lutice guloko cwinygi ikomgi kun giwaco ni, “Man watimo gin ango? Man waweko jo Icrael gua woko, dok bene warwenyogi ki i dog ticwa, woko do!” 6Kitmeno Parao ocako yubu gadigadine me lweny, ci ooto monye. 7Ci otero gadigadi ma oyero miya abicel, ki gadigadi pa jo Ejipt mukene ducu kacel ki ludito luwigi ducu. 8Ci Lubanga omiyo tok Parao rwot me Ejipt odoko tek, ci gucako ryemo kor jo Icrael ma onongo gua me cito woko ki loc madit adada. 9Mony me Ejipt guryemo korgi, aguragura pa Parao ducu ki lwak gadigadi, ki wegi aguragura ducu, ci gudingo cok kwedgi kama gugony iye inget Pi-kakirot, ma inyim Baal-jepon.

10Ka Parao odingo korgi cok, ci jo Icrael guilo wanggi, ci nen, jo Ejipt gitye kalubu korgi; ci gubedo ki lworo madwong omiyo gukok matek bot Rwot. 11Gin gukok kun giwaco bot Moses ni, “In mono onongo ineno ni bur lyel peke i Ejipt ma omiyo ikelowa wek wato woko i dye tim kany? Pingo itimowa kuman? Pingo ikwanyowa woko ki i Ejipt? 12Pe yam waloki man i Ejipt ni, ‘Dong iwek yelowa, wek dong watii ki jo Ejipt’? Onongo ber mada me bedo opii pa jo Ejipt makato to i dye tim kany ata.” 13Ci Moses owaco bot lwak ni, “Pe wulwor! Ento wucung matek, ci wubineno kit ma Rwot bilarowu kwede tin; pien jo Ejipt ma tin wunenogini pe dok wubinenogi matwal. 14Rwot bilweny pirwu, wun wubed mewu mot apira.” 15Ci Rwot owaco bot Moses ni, “Ikok akoka bota pingo? Tit bot jo Icrael ni guwot gucit anyim. 16Il odooni malo, ci irye cingi iwi nam, ci dye pii bipoke woko, wek jo Icrael guwok ki i dye nam i lobo mutwo. 17Abimiyo tok jo Ejipt doko tek, wek gin bene gulub korwu, ci abinongo deyo pi loyo Parao kacel ki monye ducu, ki gadigadine, ki wegi aguragurane. 18Jo Ejipt bingeyo ni An a Rwot, ka dong atyeko limo deyo pi loyo Parao ki gadigadine, ki wegi aguragurane.”

19Ka lamalaika pa Lubanga ma onongo obedo kawot inyim mony pa jo Icrael oa odok ocego ngegi; ki wir me pol bene oa ki inyimgi, odok ocung ingegi. 20Ci pol obino oriine ikin mony pa jo Ejipt ki mony pa jo Icrael, Pol ocego kunu ki mutu macol; ci dyewor meno ducu mony tungcel pe onyiko cok ki lawote nio ka piny oru.

21Moses oryeyo cinge iwi nam; ci Rwot odanyo dye nam woko, odiro pii woko wa cen ki yamo matek ma oa ki kunyango ma okodo i dyewor benebene, omiyo nam odoko lobo ma otwo, ki i pii bene opoke woko. 221Jo Icrael guwoto i dye nam i lobo ma otwo, pii otinge odoko kicika tung cinggi acuc ki tung kumalo. 23Jo Ejipt guryemo korgi, ci gudonyo ikorgi i dye nam; aguragura pa Parao ducu, ki gadigadine, ki wegi aguragurane. 24Ikare ma gikuru rupiny, Rwot onongo tye iwir me mac ki me pol kun neno mony pa jo Ejipt ci oketo myelkom ikom mony pa jo Ejipt. 25Ci omiyo tyen gadigadigi omoko woko i lobo, ci gubedo kaywane aywaya mot. Ci jo Ejipt guwaco ni, “Rwot tye kalweny ikomwa pi jo Icrael; wa ayu woko ki kany!”

26Rwot dok owaco bot Moses ni “Rye cingi iwi nam, wek pii odwog cen ikom jo Ejipt, ikom gadigadigi, ki ikom wegi aguraguragi.” 27Kitmeno Moses oilo cinge iwi nam, ci nam odwogo cen kun mol ikit macon i odiko ma piny tye ka ruuni. Jo Ejipt gutemo ngwec woko ki i dye nam, ento Rwot orido wigi i dye nam. 28Ka pii odwogo kakare, ci omwunyu gadigadi ki wegi aguragura pa Parao ducu mayam gulubu kor jo Icrael i nam ca; pe tye ngat mo acel ma obwot ki ikin gi. 29Ento jo Icrael guwoto ki i dye nam i ngom ma otwo, kun pii ocung mot macalo kicikagi tung cinggi me acuc ki me acam.

30Kitmeno Rwot olaro jo Icrael ki i cing jo Ejipt inino meno, ci jo Icrael guneno kom jo Ejipt ma guto i dog nam. 31Ka jo Icrael guneno gin matek ma Rwot otimo ikom jo Ejipt ci dano gulworo Rwot; omiyo guye Rwot ki latice Moses.