Acaki 42

Omegi Yucepu gucito i Ejipt pi wilo cam

1Ikare ma Yakobo owinyo ni cam tye i Ejipt, owaco bot awobene ni, “Pingo wubedo kanene anena?” 21Ka owaco botgi ni, “Nen, an awinyo ni cam tye i Ejipt; wucit wuwil ki wan ki kunu, wek wabedu kwo, pe wato ki kec.” 3Ma omiyo omegi Yucepu apar gucito i Ejipt kawilo cam. 4Ento Yakobo pe ocwalo Benjamin, omin Yucepu, kacel kwedgi, pien obedo kalworo ni gwok dok kibitime rac bene. 5Kitmeno awobe pa Icrael gucito kawil ikin jo mukene ma gicito kunu, pien onongo kec oromo lobo Kanaan ducu.

6Ikare meno onongo Yucepu odoko laloc maber i lobo Ejipt; en obedo kacato cam bot lwak me lobo meno. Ci omegi Yucepu bene gubino, gupoto piny aryeba cwiny inyime, kun gukulo wangi i ngom. 7Yucepu oneno omegine, ci ongeyogi cut, ento obedo kigero ikomgi, kun terogi calo lurok ata, kun gere agera ni, “Wun wua ki kwene?” Gugamo ni, “Waa ki i lobo Kanaan, wabino ka wilo cam.”

8Kadi bed Yucepu ongeyo omegine, ento gin pe gumedo ki ngene. 92Yucepu ocako poo lek mayam eleko ikomgini; dok owacigi ni, “Wun lurot piny do, wun wubino kakengo lobowa wek wuniang ka goro nyo pe.” 10Gugamo doge ni, “Pe kumeno laditwa, wan lutici wabino giwa kawilo cam. 11Wan ducu awobe pa ngat acel, wan jo ma cwinywa leng, wan pe lurot piny.” 12Owaco ki gin ni, “Pe ya, wun wubino mewu kakengowa wek wunen ka wan wagoro nyo watek.” 13Gugamo dok ni, “Wan ducu onongo watye omego apar wiye aryo, ma awobe pa laco acel matye i lobo Kanaan; ci ominwa matidine odong bot wonwa, ki acel aye dong oto woko.” 14Yucepu owaco ki gin ni, “Dong kara tye kit ma awaco ki wun, ni wun lurot piny. 15Man aye dong kit ma wabiniang ni wun kitwu atir: macalo Parao tye makwoni, wun pe dong wubicito kamo, ka ominwu matidini pe obino kany. 16Wucwal ngat acel ikinwu, wek en ocit okel ominwu, kun nongo wun pud wudong kany i buc, wek lokwu kong ginen maber, ka wun wutye ki ada i iwu. Ka pe, macalo Parao tye makwo ni, wun lurot piny i ada.” 17Ci oketogi ducu i ot kol pi nino adek.

18Ka nino adek oromo, ci Yucepu owaco botgi ni, “Wutim kit man ci wubikwo, pien alworo Lubanga. 19Ka wun jo ma iwu leng, wuwek ngat acel aye gitwe odong i buc, wek jo mukene gucit paco guter kal ki jo ma paco pi larogi ki kec. 20Ka wucit wukel ominwu matidini bota; miyo binen ni lokwu dong tye ada, ci pe wubito.” Ci gutimo kitmeno. 21Gucako lok gigi keken gi ni, “I adane, wan waroco ikom ominwa, pien waneno cwercwinye, ka yam bako doge botwa, ci pe wamedo ki winyone; ma omiyo tin can man opoto ikomwa bene.” 223Reuben owacigi ni, “Yam pe awaco ki wun ni pe wutim bal mo ikom latin ca? Ento wun pe wumedo ki winyo, en aye ma omiyo kipido pi remone ikomwa ni.” 23Pe gumedo ki niang ni Yucepu winyo lokgi ni, pien onongo lagony leb aye tye ikin gi. 24Yocepu oa woko ki botgi ci ocako koko; lacen ma odok botgi kalok kwedgi, omako Cimeon ki ikin gi ci oweko gitweye woko ki inyimgi.

Omegi Yucepu gudwogo i Kanaan

25Yucepu ociko ni dong kipik kal opong kicaa pa omegine, ka dok lim pa ngat acel acel bene kipik kidwok cen i kicaane, dok gumi botgi peke me wotgi. Man ducu kitimo botgi.

26Gutweyo kal inge kanagi, ci gucako wot. 27Ka guo ikabedo ma gubutu iyeni, ngat acel oyabo dog kicaane wek emii cam ki kanane, ci oneno lim kiketo i dog kicaane. 28Owaco ki omegine ni, “Lima ducu gidwoko kakare. Nen, tye i kicaana ene.” Ma guwinyo, ci cwinygi opoto lirut, gubedo kacabe keken gi ki myelkom kun giwaco ni, “Lubanga otimowa kuman pingo?”

29Ikare ma gudwogo bot won gi Yakobo i lobo Kanaan, gutite gin ducu ma otime ikomgi, kun giwaco ni, 30“Dano ma ladit me lobo Ejipt obedo kalok ki gero, kun tongo lok ikomwa ni wan lurot piny dok wabino kakengo lobogi. 31Ento wan watite ni, ‘Wan jo ma lulok ada, wan pe lurot piny. 32Wan omego apar wiye aryo ma wonwa acel. Ominwa acel aye dong oto, ki acel matidine tye odong bot wonwa i lobo Kanaan.’ 33Ci dano meno, ladit me lobonu, owaco botwa ni, ‘Man aye miyo abiniang ni wun jo ma lulok ada: wuwek ominwu acel odong bota, wuciti, wuter kal me laro kec ki jo ma i pacowu. 34Wucit wukel ominwu matidini bota, ci dong abingeyo ni wun pe lurot piny, ento wun jo ma lulok ada, ci dong abimiyo ominwu i cingwu, dok wubicato wil i loboni.’”

35Ikare ma gitye ka onyo kal ma i kicaagi, ci gin ducu gunongo lim ma nene guboyo ca tye i kicaagi. Ma gin ki won gi guneno lim ma giboyo, ci lworo omakogi matek. 36Wongi Yakobo owaco ni, “Wumito tyeko lutinona woko liweng? Yucepu dong pe, Cimeon bene dong pe, dok wumito tero Benjamin woko; man ducu cane poto iwiya.” 37Reuben owaco ki wone ni, “Ka pe adwogo Benjamin cen boti ci ibineko lutino awobena aryoni ducu. Ket en i cinga, abigwoke dok abidwoge paco boti.” 38Ento Yakobo ogamo ni, “Woda pe bicito kwedwu kunu, pien omine dong oto mere woko, en kene aye odong. Gin mo marac dok twero time ikome i dog wotwuni. An dong atii woko dok cwercwinye bineka woko lutuwa.”