Acaki 41

Yocepu ogonyo te lek pa Parao

1Ka mwaka okato aryo kulu, Parao oleko lek ni onongo ecung inget nam Nail, 2ci nen, dyangi abiro ma komgi pilpil ma gucwe gukati ki i Nail, gubedo kacamo lum tiro. 3Dyangi mukene abiro dok gukati woko ki i nam Nail ma komgi omok, gujony woko lingok, ma gulubu korgi, ka gucung ka nget dyangi meno, ma gitye inget nam Nail. 4Dyangi ma komgi omok, ma gujony woko lingoki gucamo dyangi ma komgi pilpil mucweni woko. Ci Parao oco woko ki iwang lek. 5Ka dok odok cen ka nino, ci dok oleko lek mukene me aryone, oneno wit kal abiro ma ocek olunge, mabeco, ma gujany ikom tyen kal acel. 6Dok ingegi oneno wit kal abiro ma gulot gujany ma witgi otwil, ma gubwaro woko pi yamo malyet ma oa ki tung kunyango. 7Ci wite abiro ma witgi otwili gumwonyo wit kal ma ocek olunge, ma witgi ngarangarani woko. Ma Parao dok oco woko ki iwang nino, onongo ni dok eleko lek aye. 81 Piman cwinye obedo ka cwer odiko con; ci ocwalo kwena olwongo lutyet ki luryeko ma i Ejipt ducu. Parao otitigi leke, ento ngat mo pe onen ma otwero gonyo ki Parao te leke.

9Ladit latyer kongo bwino owaco ki Parao ni, “Ada tin wiya opo pi rocana. 10Ikare ma in Parao ikeco ikom lutici, ci itweya i ot kol kacel ki ladit lated mugati i ot pa ladit maloyo acikari lukur piny, 11wan ducu waleko lek idyewor acelu, en ki an, waleko lek matyen lokgi patpat. 12Latin Ibru mo onongo tye kwedwa, ma obedo latic pa ladit maloyo acikari lukurpiny. Ikare ma watite, ci ogonyiwa te lekwa, kun gonyo te lek pa ngat acel acel kit ma leke tye kwede. 13Kit ma en ogonyo te lekwa, ci otime kumeno; an kidwoka i dog tica, ento lated mugati kingabo malo ikom yat.”

14Ci Parao ocwalo kwena kilwongo Yucepu, kikelo woko aruya ki i ot kol; olyelo wiye, ka oloko bongone, ci ocito odonyo bot Parao. 15Parao owaco bot Yucepu ni, “An onongo aleko lek, ento ngat mo pe ononge matwero gonya te leke; abedo kawinyo ka giloko ikomi ni ka iwinyo lek mo, ci itwero gonyo tere.” 16Yucepu ogamo dog Parao ni, “Meno pe a ki ite twerona; ento Lubanga aye binyutu ki Parao telok man maber.” 17Ci Parao owaco bot Yucepu ni, “Nen, iwang leka onongo acung inget nam Nail; 18ci dyangi abiro mucwe ma komgi pilpil gukati woko ki i nam Nail, gubedo kacamo lum tiro. 19Ka dok dyangi mukene abiro bene gukati woko gulubu korgi ma gigoro, komgi omok ma gujony woko lingok, kit mayam peya aneno i lobo me Ejipt ducu. 20Ci dyangi ma komgi omok ma gujony woko lingoki gucamo dyangi abiro mucweni woko. 21Ento kadi bed gucamogi woko, pe onen ikomgi ni gucamogi, pien onongo pud gujony woko lingok marom aroma ki kit ma nene gitye kwede. Ci aco woko ki iwang nino. 22Dok aneno ki iwang leka wit kal abiro ma gujany ikom tyen kal acel, ma wanggi ngarangara mabeco. 23Ka dok wite abiro muner ma wangi atati, ma gubwaro woko pi yamo malyet ma oa i tung kunyango, gulot gudongo ingegi; 24ci wite ma titinoni gumwonyo wite abiro mabeconi. Ci atito bot lutyet, ento pe tye ngat mo matwero gonya tere.”

25Yucepu ogamo dog Parao owaco ni, “Lek pa Parao en lek acel; Lubanga dong onyutu ki Parao gin ma en bitiyo. 26Dyangi abiro mabeconi nyutu mwaka abiro, ki wit kal abiro mabeco bene nyutu mwaka abiro; lek aryonu telokgi acel. 27Dyangi ma komgi otuk, ma gujony woko lingoki ma dok gukati woko gulubu korgini, ki wit kal abiro ma obware woko pi yamo malyet ma oa i tung kunyango ca, meno nyutu mwaka abiro me kec. 28Tye kit macalo dong atito ki Parao, Lubanga onyutu ki Parao gin ma en bitiyo. 29Mwaka abiro bibedo ma cam bicek madwong tutwal i lobo ducu me Ejipt, 30ento ingegi dok bibino mwaka abiro me kec, ma wi dano biwil woko i lwak camgi ma guceko i lobo Ejipt. Kec bimako lobo Ejipt woko ducu. 31Ki lonyo cam mayam dwongi pe binen ni yam tye i lobo pi kec ma bilubune, pien kec meno bibedo gwa matek. 32Kit ma lek meno otime tyen aryoni nyutu ni lok man Lubanga aye omoko, dok bimiyo time ikare macok.

33Ma omiyo ikare man in omyero iyer dano manen kwiri, maryek, ci iket en oloo lobo Ejipt ducu. 34Dok myero iketo lutela me doro wi dano, wek gubed kajogo dul acel me abic me cam ma bicek i lobo Ejipt ikin mwaka abiro ma cam bicek iyeni. 35Wek gin gubed ki twero me guru cam ki me gwokone i mwaka mabeco ma cam bicek iyeni, wek gugwok woko ite twero ni, i gangi ducu. 36Cam meno bibedo i dero me agwoka ma kibigwoko i lobo Ejipt ducu pi kec ma bipoto i mwaka abiro mukene ca ma bibinoni, wek kec pe onek dano i lobo man.”

Yucepu odoko latela i lobo Ejipt

37Tam ma Yucepu omiyo onen maber bot Parao, kacel ki lutice ducu. 38Piman Parao owaco ki lutice ni, “Watwero nongo dano mukene macalo man ki kwene, ma cwiny pa Lubanga tye kwede bene?” 39Ci Parao owaco bot Yucepu ni, “Kit macalo Lubanga dong otyeko nyuti telok magi ducu wokoni, pe dong tye dano mo manen kwiri, dok maryek calo in. 402In aye dong ibiloyo oda, ki lwaka ducu gibitiyo kun gilubu gin ma iciko; ento lok ma dok ikom komker keken, en aye bimiyo abedo dit makati.” 41Parao dok owaco bot Yucepu ni, “Nen, dong atyeko keti me loyo lobo Ejipt ducu.” 423 Ci Parao okwanyo lagit me ker ma olunyu ki i cinge, orwako i cing Yucepu, dok oruke ki ginaruka me bongo camanini pa luker maber, ka dok oruku nyor jabu i ngute. 43Ci Parao omiyo en oringo ki gadigadine ma ngat malubu kor Parao aye ringo kwede, kun dano gidange inyime ni, “Rumu congwu piny!” Ci oketo en me loyo lobo Ejipt ducu kitmeno. 44Parao dok omede kalok ki Yucepu kun wace ni, “An Parao; ka in pud peya imoko lok mo, ci pe bibedo ngat mo ma bitingo cinge nyo tyene i lobo ducu me Ejipt me timo gin mo.” 45Ci Parao ocako nying Yucepu ni Japengat-panea; ci omiye Acenaci nya pa Potipera ajwaka me On me bedo dakone. Ci Yucepu ocako wot orumu lobo Ejipt ducu. 46Yucepu onongo dong mwaka me dite romo pyere adek ikare ma odonyo i tic pa Parao rwot me Ejipt. Yucepu okato woko ki inyim Parao, ci owoto orumu lobo Ejipt ducu. 47Ci cam ocek i lobo madwong tutwal pir mwaka abiro, 48ci Yucepu ocoko cam ducu ma ocek i mwaka abironi ikare ma lobo Ejipt oceko cam madwong, ci okano cam i dero i gangi ducu; i gang acel acel en okano cam ma oa i poti ma gurumu kenyo. 49Yucepu okano lwak cam madwong i dero; cam obedo dwong marom ki kweyo ma i dog nam, nio ka oweko pimone pien pe twero pime.

50Ma mwaka kec peya oromo, onongo Yucepu dong tye ki lutino awobe aryo, ma Acenaci nya pa Potipera ajwaka me On onywal kwede. 51Yucepu ocako nying latin kayone ni Manace, kun waconi, “Pien Lubanga dong omiyo wiya owil woko ki ikom aromana ducu ki ikom jo ducu me ot pa wora.” 52Nying latin me aryone ocako ni Epraim ni, “Pien Lubanga omiya anywal i lobo ma abedo iye ki aroma.”

53Ka mwaka abiro ma cam obedo kacek iye madwong tutwal i lobo Ejipt dong ogik, 544ci mwaka abiro me kec ocake, kit mayam Yucepu owaco ni. Kec opoto i lobo ducu; ento i lobo Ejipt ducu onongo cam tye. 555Ka cam dong otum woko i lobo Ejipt ducu pi kec ma opoto, dano gucako koko pi cam bot Parao; ci Parao owaco ki jo Ejipt ducu ni, “Wucit bot Yucepu wutim gin ma owaciwu.” 56Ka kec opoto oromo lobo Ejipt ducu, ci Yucepu ocako yabo dog dero cam ducu, ocato cam bot jo Ejipt, pien onongo kec dong lyet tutwal i lobo Ejipt. 57Lobo ducu gucako mol i Ejipt bot Yucepu kawilo kal, pien onongo kec dong lyet tutwal iwi lobo ducu.