Acaki 40

Yucepu ogonyo te lek pa lumabuc

1Ma kare okato, latyer kongo bwino pa rwot me Ejipt ki lated mugatine gubalo inyim rwot. 2Kiniga omako Parao ikom ludito tice aryonu, ladit latyer kongo bwino ki ladit me tedo mugati, 3ci otweyogi i ot kol pa ladit maloyo acikari lukurpiny me gwokogi, i ot kol ma Yucepu bene gitweye iyeni. 4Ladit maloyo acikari lukurpiny oketogi i cing Yucepu, en okurugi; ka gitweyogi i ot kol kare mo. 5Ci guleko lek inino mo acel, latyer kongo olok ki lated mugati pa rwot me Ejipt, ma kitweyogi i ot buc; ngat acel acel oleko gire leke, kun lek acel acel tye ki tyen loke. 6Ikare ma Yucepu obino botgi odiko, ci onenogi kun gitye ki cwercwiny. 7Ci openyo ludito tic aryo pa Parao ma gitye kwede i ot kol i ot pa ladite ni, “Tin cwinywu obale woko pingo?” 8Gugamo doge ni, “Tin waleko lek, ci pe tye dano mo ma gonyowa te leke.” Yucepu owaco ki gin ni, “Pe Lubanga gire aye lagony tere? Kong wutita leke mono.”

9Ci latyer kongo bwino olok ocako tito leke bot Yucepu, kun waco ni, “Iwang leka onongo olok tye inyima, 10olok onongo tye ki jange adek; ma pud oluru me keto ture, ci onyak, olugu ocek woko. 11Onongo amako kikopo pa Parao i cinga, ci angolo nyige, abiyo i kikopo, ka amiyo kikopo i cing Parao.” 12Yocepu ogamo doge, kun wace ni, “Man aye te leke: jange adeki, meno nino adek; 13inino me adeke Parao bigonyi woko ci bidwoki cen i dog tici, ci dok ibimiyo kikopo pa Parao i cinge kit macon ca, kit macalo con ikare ma in latyer kongo bwino oloke. 14Ento ber ipo pira ka dong idok i dog tici; alegi ni in bene itima ber do, itit pira bot Parao, wek kigonya woko ki i ot man. 15Pien yam kikwala akwala ki i lobo pa jo Ibru; man bene dok kiketa kany i ot kol nono ma pe abalo gin mo.”

16Ikare ma ladit me tedo mugati oneno ni kigonyo te lek maber, en owaco ki Yucepu ni, “An bene onongo aleko leka: onongo adodo aduku adek me mugati iwiya. 17I aduku ma malone ca onongo opong ki lwak kit gin ma kitedo ducu pi Parao, ento winyo obedo kacamogi woko ki i aduku matye iwiyani.” 18Yucepu ogamo ni, “Man aye te leke: aduku adek en aye nino adek; 19inino me adeke Parao bigonyi, ci kibingolo nguti, ci bingabi ikom yat, ka winyo bicamo ringo komi woko.”

20Inino me adeke, ma en aye nino ma kinywalo iye Parao, ci otedo karama me kwero nino nywale ki lutice ducu, ci Parao okelo ladit latyer kongo bwino kacel ki ladit lated mugati inyim lutice. 21Odwoko ladit latyer kongo bwino i dog tice me tyero kongo, ci en otingo kikopo pa Parao omiyo i cinge. 22Ento ongabo ladit lated mugati malo ikom yat kit ma nene Yucepu ogonyo kwede te lekgi. 23Ento ladit latyer kongo bwino pe omedo ki po pi Yucepu, wiye owil woko ikome matwal!