Acaki 39

Yucepu ki dako pa Potipar

1Jo pa Icmael onongo dong gutero Yucepu woko i Ejipt, ci Potipar ladit tic pa Parao, maloyo acikari lukurpiny, ma Laejipt, owilo en woko ki botgi. 21Rwot yam tye ki Yucepu, ci odoko lakomegum; ocako bedo gire i ot pa ladite ma Laejipt. 3Ci ladite bene oneno ni Rwot tye kwede, pien Rwot omiyo gin ducu ma en tiyo bedo maber. 4Cwiny Potipar obedo yom ikom Yucepu, ci odoko latice. Ocako keto en me bedo ladit maloyo ode ki jamine ducu. 5Nia ikare meno ma oketo en me bedo ladit maloyo ode, ki lalo jamine ducu, Rwot ocako miyo gum obedo i ot pa Laejipt meno pi Yucepu; gum pa Rwot opoto ikom jami mayam tye kwede ducu, ma i ot ki ma i potogu. 6Ci Potipar omiyo jami ducu ite loc pa Yucepu; pi bedo kwede omiyo dong pe paro gin mo, kono pi cam keken ma en camoni.

Yucepu onongo nen mabulubulu, dok mwonya matek. 7Lacen dako pa ladite cwinye ocako pyete ikom Yucepu, ci owace ni, “But kweda.” 8Ento en okwero woko, ci owaco bot dako pa laditeni, “Nen ba, pi bedona kany omiyo ladita pe dong paro pi gin mo matye i otti, dok otyeko keto gin ducu ma etye kwede i cinga. 9En pe dong tye ki dit makato an i ot man, pe tye gin mo ma dok okano ma peya omiyo i cinga, kono in keken, pien in i dakone. An dok acore katiyo bal madit marac kuman ningning, kun atimo wa bal ikom Lubanga kulu?” 10Kadi bed dako meno obedo ka bito Yucepu jwijwi, ci pe omedo ki winyo loke, pe oye butu kwede.

11Ento ma nino mo acel owec, ma onongo laco mo pe i ot, ikare ma Yucepu odonyo i ot katiyo tice, 12ci dakonu omake ki bongone, kun waconi, “But kweda.” Ento Yucepu omwome oweko bongone i cinge, okato gire woko ki i ot. 13Ka dakonu oneno en oweko bongone i cinge, omwome gire okato woko ki i ot, 14ci olwongo co ma gibedo i ode, ci otitigi ni, “Nenu, laditi okelo Laibruni kany me nywarowa; obino bota i ot ni ebut kweda kulu, ci atoke adange ki koko matek. 15Ka oneno ni atye kadange kun agore matek ki koko, ci otenyo ginarukane bota, ci omwome okato woko ki i ot.” 16Ci opyelo bongone kangete nio ka won ot odwogo paco. 17Otite kit lok acelu, kun waconi, “Opii Laibru ni ma ikelo ikinwa obino bota i ot kanywara; 18ento ma ailo dwona malo oyotoyot kun adange, ci oweko ginarukane bota, omwome gire woko ki i ot.”

19Tek Potipar winyo lok ma dakone oloke ni, “Man en aye kit ma opii man otima kwede,” ci kiniga omake matek mada. 20Ocako mako Yucepu, oketo i buc, ikabedo ma gitweyo iye lumabuc pa rwot, ci obedo i buc kunu. 212Ento Rwot onongo tye ki Yucepu, ci onyute mar mere ma pe loke, ci omiyo cwiny lagwok ot buc omare. 22Lagwok ot buc omiyo twer ki Yucepu me gwoko lumabuc ducu ma gitye i buc; gin ducu ma gitiyo kunu, en aye loyo. 23Lagwok ot buc pe dong paro pi gin mo ma oketo i cing Yucepu, pien onongo Rwot tye kwede; gin ducu ma Yocepu otiyo, Rwot omiyo iye gum.