Acaki 38

Juda ki Tamar

1Ikare meno Juda oa woko ki bot omegine, ocito odak bot laco mo ma jo Adulam, ma nyinge Kira. 2Juda oneno nya pa Lakanaan mo ma nyinge Cua; ci onyomo, ka obedo kwede. 3Ci ogamo ic, onywalo latin laco, wone ocako nyinge Er. 4Dakonu dok ogamo ic, onywalo latin laco, ocako nyinge Onan. 5Dok ogamo ic aye, onywalo latin laco, ocako nyinge Cela. Latin meno en onywalo i Kejib.

6Juda onyomo nyako ma nyinge Tamar ki wode Er ma latin kayone. 7Ento Er latin kayo pa Juda yam onongo dano marac inyim Rwot, ci Rwot oneke woko. 8Ci Juda owaco bot Onan ni, “Lak ciomeru, ci ibed kwede macalo won ot, wek inywal kwede wi omeru.” 9Ento Onan ongeyo ni lutino pe bibedo mere; pimeno kare ducu ma obedo ka butu ki ciomine, ci en nyeto kodi me co ne piny, wek pe enywal kwede wi omine. 10Gin ma otimo pe oyomo cwiny Rwot, ci oneke woko bene. 11Juda dok owaco bot ciwode Tamar ni, “Kong dong ibed macalo dato i ot pa woru, nio wang ma woda Cela bidongo,” pien onongo lworo ni gwok bito woko, macalo omegine. Kitmeno Tamar odok obedo i ot pa wone.

12Ka kare okato, ci dako pa Juda ma nya pa Cua oto woko. Lacen ma cwiny Juda dong opye, ci ocito i Timna bot lungol yer romine, onywako yo ki lareme Kira ma jo Adulam. 13Ci kitito bot Tamar ni, “Kwaru okato obicito i Timna kangolo yer romine.” 14Ci olunyu bongo cola me dalako woko, ka oume ki kitambara, odwalo ki kome woko ducu, ka ocito obedo kwede i dogcel me Enaim, ma okemo yo me Timna; pien onongo oneno ni kadi bed Cela dong oteggi, ento peya kimiye ni olake. 15Ka Juda onene, ci otamo ni gwok dako lakwele mo, pien onongo en oumu wange woko ducu. 16Ka ocito bote kama obedo iye inget yo, ci owace ni, “Bin wek abut kwedi,” kun pe ngeyo ni ciwode. En ogamo ni, “Ibimiya gin ango kono, ka wek ibin ibut kweda?” 17En odok iye ni, “Abikwanyo latin dyel ki ikin dyegina, acwali.” Ci dakonu ogamo ni, “Kong ijeng gin mo bota, ka dong ibicwala dyel.” 18Ci Juda openyo ni, “In imito ajengi gin ango?” En odok iye ni, “Agit meri, ki toli, ki odooni matye i cingini.” Ci otingo omiyogi ducu bote, ka odonyo obutu kwede, ci dakonu oyac kwede. 19Dako oa okato ocito gire woko, olunyu bongo kitambara ma oume kwedeni, ka dong oruku bongo cola me dalako.

20Ikare ma Juda ocwalo Laadulam ma lareme pi tere latin dyel, wek odwoke jami mayam ojengo bot dakonu, ci pe omedo kinongo kome. 21Ci en obedo ka penyo jo ma ikabedonu ni, “Dako mo ma lakweleni tye kwene, ma onongo yam bedo inget yo Enaim?” Guwace ni, “Lakwele mo pe ma bedo kany ba.” 22Ka odok cen bot Juda, ci owace ni, “Pe amedo ki nongo dakonu; ki jo ma ikabedo meno bene guwaco ni, ‘Lakwele mo pe mayam bedo kany.’” 23Ci Juda ogamo ni, “Wek dong oter jaminu obed mere, wek pe kinyerwa; nen, acwalo latin dyel man, ci nongo kome aye oloyi.”

24Dwe maromo adek okato, ci gitito ki Juda ni, “Ciwodi Tamar obedo katime tim kwelekwele, ci dong oyac woko ki tim kweleneni.” Ci Juda owaconi, “Wukele woko, wek kiwange woko.” 25Ikare ma kitye ka kele woko, ci en ocwalo lok bot kwarone ni, “Won jami man en aye ayac kwede.” Dok onwoyo aye ni, “Alegi ni ingigi; agit, ki tol ki odoonu jami pa anga ka?” 26Juda ongiyogi ci oniang ni jaminu mege, ci otucu kun waconi, “Dako man otiyo gin ma atir makato an woko, pien pe amedo ki miyo en bot woda Cela.” Pe bene omedo ki butu kwede.

27Ka kare me gonyene oromo, ci onen ni lutino rudi tye i iye. 28Ka mwoc dong ogoye, latin ocwalo cinge woko, ci lacolo otweyo uci makwar i cinge, kun waconi, “Man aye okwongo kati woko.” 29Ka dong ongunyo cinge, odwoko cen, ci nen, omine aye dok okati woko, ci dakonu owaco ni, “In dong ituru ki baro dye ic, ikati woko ningning?” Ma omiyo kicako nyinge Perej.1 30Ka lacen omine dok kinywalo kun uci makwar tye i cinge; ci kicako nyinge Jera.