Acaki 37

Yucepu ki omegine

1Yakobo obedo i lobo mayam kong wone obedo iyeni, lobo me Kanaan. 2Man aye lok me tekwaro pa Yakobo.

Ka Yucepu dong oromo mwaka apar wiye abiro, onongo dong kwayo lim kacel ki omege; en obedo ki lutino awobe pa Bila ki Jilpa, mon pa wone; Yucepu onongo kelo lok malube ki tim maracu ma omegine timo bot won gi. 3Yakobo onongo maro Yucepu makato lutinone ducu pien onongo en latin ma kinywalo ka wi tiyone. Yakobo onongo okwone kanyi mabor ma bade boco. 4Ento ma omegine guneno ni won gi maro en makato gin ducu, ci cwinygi ocako kwere woko, kun pe gimito lok kwede maber.

5Ikare mo Yucepu oleko lek, ci otito bot omegine, ci gumede ameda ki kwere. 6En otito botgi ni, “Kong wuwiny kit lek ma alekoni: 7nen ba, ikare ma wabedo ka tweyo larita i poto, ci nen, laritana oa malo ocung atir; ci laritawu gugure, gurume dyere, ka gukulu wigi piny bot laritana.” 8Ci omegine gugamo ni, “In ada ibiloyowa? In aye dong ibiloyo wiwa?” Gumede ki kwere dong marac pi leke ki pi loke. 9Yocepu dok oleko lek mukene, dok otito ki omegine aye, kun waconi, “Nenu ba, dok aleko lek mukene aye. Nen, ceng ki dwe ki lakalatwe apar wiye acel gubedo kakulu wigi piny inyima.” 10Ka otito bot wone ki bot omegine, ci wone ocoke, ocoke ma juke matek, kun wace ni, “Meno kit lek ango ma ileko kumenoni? An ki meni ki omegini wabibino, ci wapoto waryebe piny inyimi ada?” 111Omiyo nyeko omako omegine ikome ento wone okano lok meno i cwinye.

Kicato Yucepu ci kitere i lobo Ejipt

12Inino mo acel ka omegine gucito kakwayo lee pa won gi macok ki Cekem, 13ci Icrael owaco bot Yucepu ni, “Omegini gitye kakwat inget Cekem, bin wek aori icit botgi.” En ogamo doge ni, “An a ene.” 14Ci owace ni, “Kong, icinen ka omegini gitye maber, kacel ki lim bene, ka idwoka lok doki.” Ka ocwale nia ki i nota me Kebron, ci ocito wa i Cekem. 15Ka Yocepu oo kunu ci laco mo ononge kawoto junge atata i olet; ci openye ni, “In ibiyenyo ango?” 16En ogamo ni, “Atye kayenyo omegina. Alegi itita kama gitye iye kakwayo limgi.” 17Laco meno owace ni, “Dong gutyeko a woko, pien awinyo ka giwaco ni, ‘Wacitu wa i Dotan.’” Yucepu ocako lubu kor omegine, ka onongogi i Dotan.

18Ka gunene ki kamabor, ma onongo peya oo botgi cok, ci guyubu lok ikome me neke, 19kun giloko keken gi ni, “Lalek eno binonu. 20Wubin tin wa neke woko, wek wabole i bur mo kany; ci wabitito ni, ‘Nguu mo aye omake, omwode woko,’ wek wanen kit ma lekenu bicobe kwede.” 21Reuben owinyo yub meno, ci olare ki i cinggi, kun waconi, “Pe wan aye waneke.” 22Reuben owaco ki gin dok ni, “Pe giony remone mo; wubole woko i bur man matye i tim kany, ento pe wuket cingwu ikome.” En owaco man pien onongo en oyube me kwanye woko ki i cinggi pi dwoke bot wone. 23Ka Yucepu oo bot omegine, ci gupoto ikome, gulunyu bongo kanyine woko, kanyi mabor ma bade boco ma onongo orukuni; 24ci gumake, gutere gubole woko i bur. Bur meno onongo pii pe iye.

25Lacen gubedo piny kacam; ka guilo wanggi, ci guneno lwak jo Icmael ma gua i Gilead, ki lwak kinaga ma gutingo yec odok, moo yat to ki mura, ma giwoto gicito kwede i Ejipt. 26Juda dok openyo omegine ni, “Konyo ango ka waneko ominwa dok ka wamungu to ne woko? 27Wubin wek wacatu en bot jo Icmael, pe wan aye waneke ki cingwa, pien en ominwa, remowa kikome.” Ci omegine guworo doge. 282Jo Midian ma lucatwil gubino kenyo; ci guywayo Yucepu woko ki i bur, gucate woko bot jo Icmael, kun giwile ki cekel me ryal pyere aryo; ci gutero Yucepu wa i lobo Ejipt.

29Ikare ma Reuben odwogo i dog bur, ci oneno Yucepu dong pe i bur, ci cwinye ocwer ocako yeco bongone woko. 30Ka odok cen bot omegine, ci owaco ki gin ni “Awobini dong pe do; man abidok kwene ba?” 31Ka gukwanyo kanyi pa Yucepu, ci guneko dyel, ka gulutu kanyi i remo. 32Gukelo kanyi mabor ma bade boco bot won gi, kun giwaco ni, “Wan wanongo man; kong ingii, ka nyo kanyi pa wodi onyo pe.” 33Ka ongiyo, ci owaco ni, “Man kanyi pa woda do; nguu dong omwode woko do; adada Yucepu dong nguu okido woko matinotino do.” 34Yakobo bene cwinye ocwer, ocako yeco bongone, ci otweyo bongo cola i pyere, obedo kakoko wode pi kare malac. 35Awobene ducu ki anyirane gua malo gucito ka kweyo cwinye; okwero ni pe kikwe cwinye, kun waconi, “Aya do, abilubu kor latina i lyel ki koko.” Wone obedo ka koke kitmeno. 36Ci jo Midian gucato Yucepu woko i Ejipt bot Potipar, ladit tic pa Parao, maloyo acikari lukurpiny.