Acaki 7

Pii aluka ocore iwi lobo

1Ci Rwot owaco bot Nua ni, “Dony i yeya, in kacel ki jo ma i odi ducu, pien atyeko neno ni in aye kiti atir inyima ki ikin yalwak me kare man. 2Ter lee ma kicamogi abiro abiro, twonine ki megine, ki lee ma kikwero aryo aryo, twonine ki megine. 3Ki winyo me polo bene abiro abiro, ma co ki ma mon, wek kit kwayigi odong makwo me nya iwi lobo ducu. 4Pien odong nino abiro ka dong abimiyo kot cwer i lobo nino pyere angwen dyeceng ki dyewor benebene, ci gin ducu makwo mayam acweyoni ducu, abijwerogi woko ki iwi lobo.” 5Kitmeno Nua ocobo tic ma Rwot ocike kwede ducu.

6Nua onongo dong tye ki mwaka me dite miya abicel ikare ma pii aluka ocore iwi lobo. 71Ci Nua ki dakone ki awobene ki mon gi gudonyo i yeya me bwot ki i pii aluka. 8Lee ducu ma kicamo ki ma kikwero, ki winyogu, ki gin ma lak alaka i ngom, 9gudonyo i yeya bot Nua ki aryo aryo, laco ki dako kit macalo Rwot ociko. 10I nge nino abiro pii aluka ocore, opong iwi lobo. 112

I mwaka me miya abicel me dit pa Nua, i dwe me aryo, inino dwe me apar wiye abirone, inino meno aye wang it ducu me kut matut gumwoc woko ki pii, ki polo bene oyabe. 12Ci kot ocore iwi lobo nino pyere angwen dyeceng ki dyewor benebene. 13Ikom nino meno kikome, Nua ki awobene Cem, Kam ki Yafeci, ki dakone, en Nua, ki mon wote adek kacel kwedgi, gudonyo i yeya. 14Gin ki lee tim ducu, ki lee ma paco ducu madito ki matino, ki gin ducu ma lak alaka iwi lobo, ki winyi ducu ki kit kwayigi mapatpat ki gin ducu ma gituk ki bwomgi. 15Gin ducu ma gitye ki kwo gudonyo i yeya bot Nua ki aryo aryo, 16ma co ki ma mon, kit ma con Lubanga ociko ki Nua; ci Rwot oloro wigi woko.

17Pii aluka orii wi lobo pi nino pyere angwen kulu; pii opong, omede ameda nio ka otingo yeya, otero yeya malo tutwal nia ki iwi lobo. 18Pii opong, omede, ocege woko iwi lobo; yeya obedo ka kwang iwi pii malo. 19Pii ocege woko iwi lobo ki teke, nio ka oumu wi godi ma boco matye ite polo ducu. 20Pii omede, omwonyo wi godi woko ki puti pyere aryo kulu. 21Gin makwo ducu mayam giwoto iwi lobo guto woko; winyo, lee ma paco, ki lee tim, gin ducu ma nya, ma gicore limuk iwi lobo, kacel ki dano. 22Gin ducu mayam gitye ki yweyo me kwo i umgi, ma iwi tura, guto woko. 23Lubanga ojwero gin ducu makwo mayam gitye iwi lobo, dano ki lee ki gin ma lak alaka, ki winyo me polo; en ojwerogi woko nia ki i lobo. Nua keken aye odong, ki jo mayam gitye kwede i yeyani. 24Ci pii ocege iwi lobo nino miya acel ki pyere abic kulu.