Acaki 8

Pii aluka otwo woko

1Wi Lubanga pe owil ikom Nua ki lee tim ducu, ki lee ma paco ducu mayam tye kacel kwede i yeya. Lubanga omiyo yamo okodo iwi lobo, ci pii ocako dwon. 2Wang it me kut matut ducu, ki wang polo bene ocule woko, ki kot ma core a ki i polo bene ocok woko, 3pii omede ki dwon woko iwi lobo jwijwi. Ma nino okato miya acel ki pyere abic, pii onongo odwon woko. 4I dwe me abiro, inino dwe apar wiye abirone, yeya ogem iwi got Ararat. 5Pii omede ki dwon woko nio kwede i dwe me apar; i dwe me apar, inino dwe acel, wi godi maboco gucako nen.

6Ka nino pyere angwen okato, Nua oyabo wang dirica mayam otucu i yeyani, 7ci ocwalo agak woko. En obedo ka tuk, kun wire kwede tungi ki tungi nio ka piny otwo woko. 8Dok ocwalo amam woko nia ki bote, wek enen ka pii dong otyeko dwon woko ki i lobo ada. 9Ento amam pe omedo ki nongo kama myero opye iye ki tyene, ci odok bote cen i yeya, pien onongo pii pud omwonyo wi lobo woko ducu. Ci Nua oryeyo bade, omake, odwoke i yeya bote. 10Dok okuru pi nino abiro mukene, ka dok ocwalo amam woko nia ki i yeya. 11Amam dok odok bote i yeya ma onongo piny dong oyutu; ci nen, en onongo otingo pot yat jeituni ma opwono madyak idoge. Kitmeno Nua oniang ni pii dong otyeko dwon woko ki iwi lobo. 12Dok omede ki kuru pi nino abiro mukene, ka dok ocwalo amam woko; ci dong pe odok bote matwal.

13I mwaka me miya abicel ki acel me dit pa Nua, i dwe mukwongo, inino dwe acel, en aye pii otwo iye woko liweng ki iwi lobo. Nua ocako putu wi yeya woko, ci oneno wi lobo otwo woko. 14I dwe me aryo, inino dwe pyere aryo wiye abiro, onongo lobo dong otwo woko. 15Ci Lubanga owaco bot Nua ni, 16“Dong ikat woko ki i yeya, in ki dakoni, ki awobeni ki mon gi kacel kwedi. 17Kel gin makwo ducu ma gitye kwedi woko, wa kit kom ducu, winyo ki lee ki gin ducu ma lak alaka wi lobo, wek gucore iwi lobo, kun ginywal, ginya iwi lobo.” 18Kitmeno Nua okato woko, ki awobene ki dakone, ki mon pa awobene kacel kwede. 19Ki lee ducu ki gin ducu ma lak alaka, ki winyo ducu, gin ducu ma giwoto iwi lobo, gucako mol, gukato woko ki i yeya, ma oporo kit kwayigi ducu.

Nua otyero gityer

20Nua ocano keno tyer pi Rwot, ci oyero lee ma kicamo ki ikit kwayigi acel acel, ki winyo ma kicamo ki ikit kwayigi acel acel, ci otyero gitum awanga iwi keno tyer. 21Ma Rwot ongweyo gin ma ngwece kur ma yomo cwiny, Rwot oloko i cwinye kekene ni, “An pe dok abiceno lobo pi dano, kadi bed tam ducu ma i cwinye kemo bal keken nia wa i tinone; pe dong abineko gin makwo ducu kit mayam atimo. 22Ka tek lobo pud tye, ci kare me coyo kodi ki kare me kac, kare me ngico ki lyeto, ki oro ki cwir, dyeceng ki dyewor, pe bigik matwal.”