Acaki 9

Lubanga omoko gicikene ki Nua

11

Lubanga omiyo gum ikom Nua ki lutino awobene kun waco ni, “Wunywal, wunya, wek wupong lobo. 2Lee tim ducu bilworowu ki myelkom, wa winyo bene ducu me polo, ki gin ma lak alaka i ngom, ki rec ducu ma i nam bene. Kityeko miyogi ducu i cingwu. 3Gin ducu ma woto, ma kwo, gibibedo ginacama mewu; kit mayam amiyowu pot deki, dong amiyowu jami ducu. 42Ento pe wubicamo ringo kacel ki kwo ne, ma en aye remone. 5Atikane abiculu kwor ikom laneko pi remowu; abineko lee ducu ma neko dano. 63Ka ngat mo ooyo remo pa dano mo, ci dano meno kibioyo remone bene; pien Lubanga ocweyo dano i calle kikome. 74Wun wunywal, wunya wumede madwong iwi lobo, wunya iye.”

8Lubanga dok owaco bot Nua ki awobene ma onongo gitye kacel kwede ni, 9“Nen, amoko gicikena kwedwu ki likwayowu ma bilubuwu, 10ki gin makwo ducu ma gitye kwedwu, winyo ki lee ma paco ki lee tim ducu ma gitye kacel kwedwu, gin ducu ma gukato woko ki i yeya. 11Amoko gicikena kwedwu ni, pii aluka pe dok bineko gin makwo, dok pe bibedo aluka ma bityeko lobo.” 12Lubanga dok owaco ni, “Man aye lanyut me gicike ma aketo ikin an ki wun ki gin makwo ducu ma gitye kwedwu, ma bibedo matwal i yalwak ducu. 13Aketo danyu mera i pol, ma bibedo lanyut me gicikena ikin an ki lobo. 14Ka amiyo pol oyunge iwi lobo, ci danyu binen i pol, 15abipo ikom gicike matye ikin an ki wun ki gin makwo ducu ma gitye ki kom; dok pii bene pe dok bidoko aluka maromo tyeko gin makwo ducu. 16Ka danyu tye i pol, ci abineno, ci abipo i gicikena ma bedo matwal ikin Lubanga ki gin makwo ducu ma gitye ki kom iwi lobo.” 17Ci Lubanga owaco bot Nua ni, “Man dong lanyut me gicikena madong amoko ikin an ki gin makwo ducu matye iwi lobo.”

Nua ki awobene

18Awobe pa Nua mayam gukati woko ki i yeyani gin aye Cem, Kam ki Yafeci. Kam en aye won Kanaan. 19Lutino awobe pa Nua adeki aye lwak ducu ma iwi lobo gua ikomgi.

20Nua aye yam obedo lapur mukwongo. Ci opito olok i potone. 21Ikare ma omato kongo bwino, ci omer woko, ci olunyo bongone woko ki ikome ci obutu munero ikemane. 22Ci Kam, won Kanaan, ma oneno wone pe oumu kome, otito ki omegine aryo ma gitye wokoni. 23Ci Cem ki Yafeci gutingo bongo iwi gwokgi gin aryo, ka gucako wot kun gijer kingegi, ci guumu ki kom won gi ma onongo tye munero, kun guloko wanggi neno cen, ci pe guneno kom won gi matye nononi. 24Ka Nua oco ki iwang mero kongo bwinone, ci oniang gin ma wode matidine otimo ikome, 25ci owaco ni,

“Ki cen Kanaan;

en bibedo opii ikin lwak opii pa omegine.”

26Dok owaco bene ni.

“Ki pak Rwot Lubanga pa Cem; wek Kanaan obed opiine.

27Lubanga oyab lobo pa Yafeci obed ma lac!

Wek en obed i kema pa Cem!

Ka dok Kanaan obed opiine bene.”

28Nua orii mwaka miya adek ki pyere abic nia ikare ma pii aluka ocore iwi lobo. 29Kare me kwo pa Nua ducu oromo mwaka miya abongwen ki pyere abic; ka dong oto.