Acaki 10

Likwayo pa awobe pa Nua

(1 Tek 1:5-23)

1Man aye tekwaro pa lutino awobe pa Nua, Cem, Kam ki Yafeci. Gunywalo lutino awobe inge kare ma pii aluka ocore iwi lobo.

2Lutino awobe pa Yafeci aye Gomer, Magog, Madai, Javan, Tubal, Mecek ki Tirac. 3Lutino awobe pa Gomer aye Acikenaj, Ripat ki Togarma. 4Lutino awobe pa Javan aye Elica, Tarcic, Kitim ki Dodanim. 5Jo ma i dog nam guket ki ikom jo meno. Magi aye lutino awobe pa Yafeci ki lobogi, kun ngat acel acel loko leb tugi, macalo kakagi ki rokgi tye kwede.

6Magi aye lutino awobe pa Kam: Kus, Ejipt, Put ki Kanaan. 7Lutino awobe pa Kuc aye Ceba, Kavila, Cabta, Raama ki Cabteka. Lutino awobe pa Raama aye Seba ki Dedan. 8Kus onywalo mere Nimurod; en aye dano ma okwongo bedo oteka iwi lobo. 9En obedo ladwar oken inyim Rwot; ma omiyo nio wa onyo kiwaco ni, “Myero Rwot owek ibed ladwar oken calo Nimurod.” 10Acaki kere onongo tye iye Babel, Erek, Akad, gin ducu gibedo i lobo Cinar. 11Nia i lobo meno kere omede, ocito oo wa i Aciria, ci ogero iye Nineve, Rekobot-Ir, Kala, 12ki Recen ma ikin Nineve ki Kala; meno aye gang madit. 13Ejipt onywalo jo Lud, jo Anamim, jo Leabim, jo Naptukim, 14jo Patrucim ki jo Kapclukim, ma en aye kaka ma jo Piliciti gua ki ikomgi, ki jo Kaptorim.

15Kanaan onywalo Cidon latin kayone, ki Ket, 16jo Jebuc, jo Amor, jo Girgac, 17jo Kiv, jo Arki, jo Cin, 18jo Arvad, jo Jemar ki jo Kamat. Lacen kaka pa jo Kanaan gucako ket woko ata. 19Wang lobo pa jo Kanaan ocake ki i Cidon odok kwede i yo tung Gerar, nio kwede wa Gaja; ka odok yo tung Codom ki Gomora ki Adma ki Jeboim, nio kwede wa Laca. 20Magi aye lutino awobe pa Kam, kit macalo kakagi, lebgi, lobogi, ki rokgi tye kwede.

21Cem, omin Yafeci madite, en aye kwaro lutino pa Eber ducu, en bene onywalo lutino. 22Lutino awobe pa Cem aye Elam, Acur, Arpakcad, Lud ki Aram, 23Lutino awobe pa Aram gin aye Uj, Kul, Geter ki Mecek. 24Arpakcad onywalo Cela, Cela onywalo Eber. 25Eber onywalo lutino awobe aryo; nying ngat acel onongo Peleg, pien ikare mere aye kipoko iye lobo, ki nying omine onongo Joktan. 26Joktan onywalo Almodad, Celep, Kajarmabet, Jera, 27Adoram, Ujal, Dikla 28Obal, Abimael, Ceba, 29Opir, Kavila ki Jobab; magi gin ducu lutino awobe pa Joktan. 30Lobo ma gubedo iye wange ocake ki i Meca, odok kwede yo tung Cepar nio kwede wa lobo godi ma tung kunyango. 31Magi aye lutino awobe pa Cem, macalo kakagi, lebgi, lobogi, ki rokgi tye kwede.

32Man aye kaka pa lutino awobe pa Nua, kit ma tekwarogi tye kwede, i rokgi; rok ocako ket nia ki ikomgi oromo lobo, cake inge kare ma pii aluka ocore iwi lobo.