Acaki 11

Lubele ma wiye ocudu me Babel

1Yam con lobo ducu onongo tye ki leb acel keken, ki lok bene onongo lam. 2Ikare ma dano gucako dak nia ki tung kunyango, gunongo ngom ma obedo bar i lobo Cinar, ci gubedo iye kunu. 3Ci gucako lok keken gi ni, “Wubin, wek wagoyu matapwali, wawanggi woko matek.” Ci gutiyo ki matapwali me ka got, ki odok macol me lamwon kin gi. 4Dok guwaco ni, “Wubin, wek wageru taun madit ma mewa, ki lubele ma wiye olur ocudu wa malo ma gudu polo, wek wamiyu nyingwa oyweki, wek pe waket woko ata iwi lobo ducu.” 5Ci Rwot olor piny kaneno gang ki lubele ma wiye olur ocudu maloni ma dano gugero. 6Ci Rwot owaco ni, “Nen, jo man guribe gitye rok acel, ki lebgi bene acel; man aye pud acaki gin ma gibitiyo, dok gin ma gibitamo pi tiyone pe dong biloyogi. 7Wubin walor wunu piny, wek warub lebgi woko, wek ngat acel acel pe oniang leb wadi.” 8Kitmeno Rwot okeyogi woko nia ki kunu, guromo lobo ducu, ci guweko gero gang meno. 9Ma omiyo nyinge gucako ni Babel, pien kenyo aye Rwot orubu iye leb ducu ma i lobo, dok Rwot okeyogi woko nia ki kunu, ci guromo lobo ducu.

Likwayo pa Cem

(1 Tek 1:24-27)

10Man aye likwayo pa Cem. Ka Cem dong tye ki mwaka me dite miya acel, ci onywalo Arpakcad ma onongo dong okato mwaka aryo inge pii aluka. 11Cem orii inge nywalo Arpakcad mwaka miya abic, dok omede ki nywalo awobe ki anyira bene.

12Ka Arpakcad dong otyeko rii mwaka pyere adek wiye abic, ci onywalo Cela. 13Arpakcad orii mwaka miya angwen ki adek madong otyeko nywalo Cela, dok omede ki nywalo awobe ki anyira bene.

14Ka Cela dong otyeko rii mwaka pyere adek, ci onywalo Eber. 15Cela orii mwaka miya angwen ki adek madong otyeko nywalo Eber, dok omede ki nywalo awobe ki anyira bene.

16Ka Eber dong otyeko rii mwaka pyere adek wiye angwen, ci onywalo Peleg. 17Eber orii mwaka miya angwen ki pyere adek madong otyeko nywalo Peleg, dok omede ki nywalo awobe ki anyira bene.

18Ka Peleg dong otyeko rii mwaka pyere adek, ci onywalo Reu. 19Peleg orii mwaka miya aryo ki abongwen madong otyeko nywalo Reu, dok omede ki nywalo awobe ki anyira bene.

20Ka Reu dong otyeko rii mwaka pyere adek wiye aryo, ci onywalo Cerug. 21Reu orii mwaka miya aryo ki abiro madong otyeko nywalo Cerug, dok omede ki nywalo awobe ki anyira bene.

22Ka Cerug dong otyeko rii mwaka pyere adek, ci onywalo Nakor. 23Cerug orii mwaka miya aryo madong otyeko nywalo Nakor, dok omede ki nywalo awobe ki anyira bene.

24Ka Nakor dong otyeko rii mwaka pyere aryo wiye abongwen, ci onywalo Tera. 25Nakor orii mwaka miya acel ki apar wiye abongwen madong otyeko nywalo Tera, dok omede ki nywalo awobe ki anyira bene.

26Ka Tera dong otyeko rii mwaka pyere abiro, ci onywalo Abram, Nakor ki Karan.

Likwayo pa Tera

27Man aye likwayo pa Tera. Tera onywalo Abram, Nakor ki Karan; Karan onywalo Lot. 28Karan okwongo to ki wone Tera i lobo mayam kinywale iye, i gang me Ur pa jo Kaldaya. 29Ci Abram ki Nakor gunyomo mon; dako pa Abram nyinge Carai, dako pa Nakor nyinge Milka, en aye nya pa Karan won Milka ki Icika. 30Carai onongo lalur, dok onongo pe tye ki latin mo.

31Tera otero wode Abram, ki Lot wod pa Karan, ma lakware, ki Carai ciwode, dako pa Abram, ci gudak woko ki i Ur, gang pa jo Kaldaya, gucito kacel kun gikemo lobo Kanaan; ento ma guo i Karan, kong gudike kenyo. 32Nino me kwo pa Tera oromo mwaka miya aryo ki abic; ci Tera oto i Karan.