Acaki 12

Lubanga olwongo Abram

11

Rwot owaco ki Abram ni, “A woko ki i lobo tuwu, ki i kakawu, ki i paco pa woru, ci icit i lobo ma abinyuti. 2Abimiyo idoko rok madit, abimiyi gum bene, abimiyo nyingi bedo dit, pien ibibedo lakelgum. 32Abimiyo gum ikom jo ma legi gum, abiceno ngat mo ma biceni; dok kaka ducu ma iwi lobo bilimo gumgi piri.”

4Kitmeno Abram ocako wot, kit macalo Rwot ocike; ki Lot bene ocito kacel kwede. Abram onongo dong tye ki mwaka me dite pyere abiro wiye abic ikare ma en oa kwede ki i Karan. 5Abram ocito ki dakone Carai, ki Lot latin pa omine, ki lwak limgi ducu ma gucoko kacel, ki lwak opii ducu ma gunongo ki i Karan; gucako wot me cito i lobo Kanaan. Ma dong gutyeko o i lobo Kanaan, 6Abram okato atir ki i dye lobo obino ikabedo ma i Cekem, nio wa ite yat kworo me More. Ikare meno onongo jo Kanaan aye gitye i lobo meno. 73Ci Rwot dok onen bot Abram kun wace ni, “Abimiyo lobo man bot likwayi.” Ci Abram ocano keno tyer kunu pi Rwot ma onen boteni. 8Ka dok odak woko ki kunu, okobo odok ite got matye tung kunyango me Betel, ci oguro iye kemane, kun weko Betel tung kupotoceng, ki Ai tung kunyango; dok ocano keno tyer pi Rwot kunu, ci oworo iye Lubanga. 9Abram dok okobo, omede ki wote i yo tung Negeb.4

Abram i lobo Ejipt

10Kec onongo opoto i lobo, omiyo Abram owoto odok kupiny i Ejipt, wek kong ebed kunu, pien kec ca onongo dong lyet tutwal i lobo. 11Ikare ma Abram cok donyo i Ejipt, owaco ki dakone Carai ni, “Angeyo ni in i dako manen mwonya mada; 12ka Luejipt gibineni, ci gibiwaco ni, ‘Man dakone,’ ci gibineka woko, ento gibiweki makwo. 135Pi man ibiwaco botgi ni, in lamera, ci gibibedo kweda maber piri, miyo abikwo piri.” 14Ka Abram dong otyeko donyo i Ejipt, ci Luejipt guneno dako meno mwonya matek tutwal. 15Ka ludito ma i kal pa Parao6 guneno, ci guboro pire bote, gutero dako wa i ot pa Parao. 16Ci omiyo Parao obedo maber ki Abram pi Carai: omiyo okole lim, romi, ki twoni; twoni kana, lwak opii ki angecagu, megi kanagu, ki lwak kinagagu.

17Ento Rwot ocwalo cog two gemo mogo madongo ikom Parao ki jo ma i ode, pi Carai dako pa Abram. 18Omiyo Parao olwongo Abram bote, ci openye ni, “Itima kuman pingo? Pingo nene pe itita atir ni Carai obedo dakoni? 19Pingo dok iwaco ni, ‘En lamera,’ omiya akwanyo, odoko dakona? Nen dong, dakoni enu. Kwany icit kwede giri.” 20Parao ociko jone pire, ci gulwoke i yo, kacel ki dakone, ki lwak jami ducu mayam tye bote.