Acaki 13

Abram ki Lot gupoke woko

1Kitmeno Abram odwogo woko ki i Ejipt, en ki dakone, ki lwak jami ducu mayam tye bote, kacel ki Lot, ci gutiro i Negeb.

2Ikare meno onongo Abram odoko lalonyo dyang mada, ki lim me ryal, ki me jabu bene. 3Ci en okobo, omede ki wote nia ki i Negeb, odak wa Betel, kama yam kong okwongo guru iye kemane, matye ikin Betel ki Ai, 4ikabedo mayam okwongo cano iye keno tyer; ki kunu aye dok Abram oworo iye Lubanga. 5Ki Lot mayam onywako wot ki Abram, ceng tye ki romi, dyegi ki dyangigu kacel ki jo ode bene. 6Lobo onongo dong pe romo ka kwat pi gin aryo ducu; pien onongo gin ducu cinggi ki lim madwong, ma pe romogi bedo kacel. 7Onongo mone dong tye ikin lukwa lim pa Abram ki lukwa lim pa Lot. Ikare meno onongo jo Kanaan ki jo Periji aye gibedo i lobo meno.

8Ci Abram owaco ki Lot ni, “Pe wawek mone obed ikin in ki an, ki ikin lukwa limi ki lukwa lima, pien wan ot acel. 9Nen lobo man ducu tye inyimi ene. Ber ipoke giri woko keni ki ikoma. Ka ibidok tung kumalo, ci an abidok gira tung kupiny: ce ka in idok tung kupiny, ci an abidok gira tung kumalo.” 101Ci Lot ocako loke ka oneno nota Jordan ducu ma iye ki pii macalo poto pa Rwot, rom ki lobo Ejipt ma odok yo tung Joar; man yam otime ikare ma Rwot peya ojwero Codom ki Gomora. 11Pimeno Lot oyero gire pire kene lobo ducu mayam tye i nota Jordan, ci Lot ocako dak tung kunyango, kitmeno gupoke woko keken gi. 12Abram obedo mere i lobo Kanaan, kun Lot kono obedo mere ikin gangi ma gitye i nota, ci ocako dak ki jo ode gucito wa i Codom. 13Jo ma i Codom onongo jo maracu, balgi onongo dwong tutwal inyim Rwot.

14Rwot oloko ki Abram madong onongo gutyeko poke woko ki Lot ni, “Il wangi malo, nen piny nia ki ikabedo ma itye iyeni, nen tung kumalo ki tung kupiny, ki tung kunyango ki tung kupotoceng; 152pien lobo meno ducu ma inenoni abimiyone boti ki bot likwayi matwal. 16Abimiyo likwayi bedo pol marom ki apwa me ngom; ma omiyo ka ngat mo twero kwano wel apwa me ngom, ci likwayi welgi bikwane. 17Dong ia malo, iwot i dye loboni, wek inen bore ki lace, pien abimiyo boti.” 18Kitmeno Abram okobo kemane, ci odak, obedo ite kworo me Mamre, matye i Kebron; dok ocano keno tyer pi woro Rwot kunu.