Acaki 14

Abram olaro Lot

1Ikare pa Amrapel rwot me Cinar, ki Ariok rwot me Ellacar, ki Kedor-laomer rwot me Elam, ki Tidal rwot me Goyim, 2luker meno guribe kalweny ikom Bera rwot me Codom, ki Birca rwot me Gomora, ki Cinab rwot me Adma, ki Cemeber rwot me Jeboim, ki rwot me Bela, en aye Joar. 3Luker abic magi ducu guribe kalweny i nota me Ciddim, en aye Nam Muto. 4Gubedo ite loc pa Kedor-laomer pi mwaka apar wiye aryo, ento gujemo woko i mwaka me apar wiye adeke. 5I mwaka me apar wiye angwene, Kedor-laomer ki luker mayam gitye kwede gubino dok guero lweny, ci guloyo jo Repaim i Aciterot-Kamaim, ki jo Jujim i Kam, ki jo Emim i Cabwe-Kiriataim, 6ki jo Kori i lobo godi meggi me Ceir, nio wa i El-paran iwang apoki lobo ma tung tim. 7Ka dok gudwogo cen, gucito wa i En-micipat, en aye Kadec, guloyo lobo ducu pa jo Amalek, ki Jo Amor bene ma gibedo i Kajajon-tamar.

8Ka dok rwot me Codom, rwot me Gomora, rwot me Adma, rwot me Jeboim, ki rwot me Bela (ma en aye, Joar) gucito guero lweny i nota me Ciddim, 9ikom Kedor-laomer rwot me Elam, ki Tidal rwot me Goyim, ki Amrapel rwot me Cinar, ki Ariok rwot me Ellacar, luker angwen guribe kalweny ikom luker abic. 10Nota me Ciddim onongo tye iye bur odok macol; ka luker me Codom ki me Gomora guringo woko, jo mukene gupoto i bur meno, ki jo mukene mudonge guringo, gularo igot. 11Ci merok guyako jami pa jo Codom ki Gomora ducu, ki camgi ducu, gucoke, gucito kwede, 12guyako bene Lot latin pa omin Abram, ma onongo obedo i Codom, ki jamine ducu, guwoto kwede woko.

13Ci dano acel mo ma obwot oringo, obino otito ki Abram ma Laibru, ma onongo bedo ite kworo me Mamre, ma en La-amor, omin Ecikol ki Aner; gin yam gucike pi ribe ki Abram. 14Ka Abram owinyo ni mony oyako watgi woko, ci ocoko monye kacel, ka otelo wi jo mupwonyo lweny ma kinywalogi i ode, jo ma giromo miya adek ki apar wiye aboro, ci olubu korgi nio wa i Dan. 15En opoko i monye idyewor; ci en ki lutice gumonyogi, ci guryemogi nio wa i Koba, i tung kumalo me Damaciko. 16Ka oyako jami ducu, odwogo kwede, kacel ki watgi Lot, jamine ducu ki mon gi ki lwakgi ducu.

Melkijedek olamo gum ikom Abram

17Ikare madong odwogo ki kama en oloyo iye Kedor-laomer ki Luker ma gitye kwedeni, ci rwot me Codom ocito kangolo wiye i wanga yo wa i nota me Cabwe, ma en aye Nota pa Rwot. 181Melkijedek rwot me Calem okelo ire mugati ki kongo bwino; en aye onongo ajwaka pa Lubanga Mamalo Twal. 19Ci en olego gum ikom Abram kun waco ni, “Lubanga Mamalo Twal ma lacwec me polo ki lobo omii gum ikom Abram! 20Kipak Lubanga Mamalo Twal ma omiyo lumeroki i cingi!”

Ci Abram omiye dul acel me apar me jami ducu ma en omayo ki bot lumerok. 21Rwot me Codom dok owaco ki Abram ni, “Dwoka mera danona aye, ento in iter giri jami ducu obed meri.” 22Ento Abram odok iye bot rwot me Codom ni, “Dong atyeko kwongo kwong woko bot Rwot Lubanga Mamalo Twal, ma ocweyo polo ki lobo 23ni, pe abigamo gin mo ki boti kadi latin uci, nyo del war mo, nyo gin mo ikin jami ma merini, wek pe ibed kawaco ni, ‘Amiyo Abram olony.’ 24Pe dok abigamo gin mo, dong agik ki gin ma awobena gucamoni, ki dul lim ma apoko ki jo ma gucito kwedani; wek dong Aner, ki Ecikol Mamre guter jamigi gigi.”