Acaki 15

Lubanga omoko gicikene ki Abram

1I nge lok meno ducu, Lubanga dok oloko ki Abram i ginanyuta kun waco ni, “Pe ilwor, Abram, an a kwoti, abimiyi mot madit tutwal.” 2Ento Abram ogamo ni, “Ai Rwot Lubanga, ibimiya mono gin ango? Pud atye labongo latin mo en do, ki laleyona bene aye Eliejer Ladamacikoni do.” 3Abram dok owaco ni, “Nen, in peya imiya nyodo mo; latin opii ma kinywalo i oda aye bibedo laleyona gire.” 4Ci dok nen, lok pa Rwot obino bote ni, “Dano man pe bibedo laleyoni; wodi kikome aye bibedo laleyoni.” 51Ci okele woko, ka owace ni “Nen malo i polo, kwan wel lakalatwe, ka itwero kwano welgi.” Dok owace ni. “Kitmeno wel likwayi bene bibedo rom meno.” 62Ci en oye lok pa Rwot; ci kikwane ni en dano ma kite atir.

7Ci Lubanga owace ni, “An a Rwot ma akeli nia ki i Ur ma gang pa jo Kaldaya, pi mini loboni wek obed meri.” 8Ci Abram ogamo ni, “Ai Rwot Lubanga, man abingeyo ningning ni loboni bibedo mera?” 9Ci Lubanga wace ni, “Kela roya mo me mwaka adek, dyel me mwaka adek, nyok romo me mwaka adek, amam, ki latin akuri.” 10Ci okelo bote lwak gin meno ducu, ka dong opoko igi arii aryoaryo, ka opyelogi ma gukeme ki luwotgi; pe onguno i winyo aryo. 11Ka acut bino kacamo ringogi, ci Abram ryemogi woko. 123

Ikare ma ceng dong mito poto woko, ci nino madwong omako wang Abram; nen, ka piny ocako cido woko macol licuc. 134Rwot owaco ki Abram ni, “Nge atir ni, likwayi gibidoko lubedo i lobo ma pe meggi, dok gibibedo opii kunu, kibibwoyogi ki tek pi mwaka miya angwen. 145Ento abingolo kop ikom rok ma biloyogini, lacen gibiloke, gidwogo kany ki lwak lim madwong. 15Ento in kikomi, ibicito bot kwarowu ki kuc; kibiyiki ma nongo dong itii likong. 16Dok gibidwogo kany ikare me likwayo ma i yalwak me angwen; pien bal pa jo Amor pud pe ya oromo.”

17Ikare ma ceng dong opoto, ma piny dong odoko col, nen, agulu ma duny yito, ki mac ma lyel, owok i dye ringo ma kipokoni. 186Inino meno aye Rwot oketo iye gicikene ki Abram, kun waconi, “Amiyo lobo man bot likwayi, nia wa i kulu me Ejipt nio wa i nam madit, en nam Euprate, 19lobo pa jo Kenit, jo Keniji, jo Kadmon 20jo Kit jo Periji, jo Repa, 21jo Amor, jo Kanaan jo Girgac ki jo Jebuc.”