Acaki 16

Agar ki Icmael

1Carai dako pa Abram onongo pud peya onywale latin mo, dok en onongo tye ki angecane ma anyira Ejipt ma nyinge Agar. 2Carai owaco ki Abram ni, “Nen, Rwot ogenga woko me nywalo latin mo, cit wek i but ki angecana, gwok nyo abinongo iye latin mo ma en binywalo.” Ci Abram owinyo dog Carai. 3Kitmeno, ikare ma Abram otyeko bedo i lobo Kanaan mwaka apar, Carai dako pa Abram otero Agar anyira Ejipt ma angecane, omiye bot cware Abram wek obed dakone. 4Ci Abram ocako butu ki Agar, ci Agar ogamo ic. Ka Agar oneno ni dong egamo ic, ci ocako gayo Carai ki wang me cac. 5Carai owaco ki Abram ni, “Kipwola mupoto ikomani odok meri! Amiyo angecana i kori; ci man en oneno ni dong egamo ic, ci ocako gayo an ki wang me cac. Myero Rwot dong ongol kop ma atir ikin in ki an!” 6Ento Abram ogamo dog Carai ni, “Nen, angecani tye ite tweroni giri, in itim giri kit ma i mito ikome.” Omiyo Carai ocako une ki aroma malit, nio ka olwi, oringo woko ki bote.

7Lamalaika pa Rwot ononge iwang it mo ma i dye tim; it meno tye i yo ma cito Cur. 8Obino openye ni, “Agar, angeca pa Carai, in mono ia ki kwene ka, dok icito wa kwene ka?” En ogamo ni, “An alwi aringo Carai, min ot ma abedo i cingeni.” 9Ci lamalaika ogamo ni, “Dok cen bot min ot meno, ci iwore.” 10Lamalaika pa Rwot dok omedo lok ni, “An abimiyo likwayi nya mapol tutwal, ma ngat mo pe romo kwano welgi pi polgi.” 11Dok lamalaika pa Rwot omede ka wace ni, “Nen, igamo ic, ibinywalo latin laco, dok ibicako nyinge Icmael; pien Rwot obedo kaneno aromani. 12En bibedo dano ma cal ki kana me tim, en bituge ikom dano ducu, ki dano ducu bene bituge ikome; en bibedo ikabedone pat kun pyem ki utmegine ducu.” 13Ci Agar ocako nying Rwot ma oloko kwede ni, “In Lubanga maneno.” Onongo en owaco ni, “An atyeko neno Lubanga ada, aneno en ci pud atye makwo gira!” 14Ma omiyo nying wang it meno kicako ni, Beer-lakai-roi;1 152

Agar onywalo ki Abram latin laco; Abram ocako nying latine ma Agar onywalo ni Icmael. 16Abram onongo tye ki mwaka me dite pyere aboro wiye abicel ikare ma Agar onywalo Icmael.