Acaki 32

Yakobo oyube pi rwate ki Ecau

1Lacen Yakobo omede ki wote ci lumalaika pa Rwot guromo kwede. 2Ka Yakobo onenogi, owaco ni, “Man mony pa Lubanga!” Ma omiyo olwongo nying kabedonu ni Makanaim.1

3Ci Yakobo ocwalo lukwena bot omine Ecau matye i lobo Ceir, i lobo pa jo Edom. 4En opwonyogi ni, “Wubiwaco bot ladita Ecau kit man: Latici Yakobo owaco ni, ‘Dong atyeko bedo bot Laban abedo nio wa ikareni. 5Atye ki twoni ki lwak kana, ki lwak lim, ki lwak opii ki lwak angeca; acwalo kwena boti ladita wek anong pwoc mo ki tung boti.’”

6Ikare ma lukwena gudwogo bot Yakobo, guwace ni, “Wao bot omeru Ecau, en obibino ka rwate kwedi i yo, kacel ki jo miya angwen.” 7Lworo omako Yakobo matek kome bene oryange woko; ci opoko kin jo ma onongo gitye kwede, ki dyegi ki dyangi, ki kinaga, dul aryo, 8kun tamo ni “Ka Ecau obino olwenyo ikom dul man aceli otyeko woko, ci dul acel mudong ca bibwot.”

9Yakobo olego ni, “Ai Lubanga pa kwara Abraim, Lubanga pa wora Icaka, ai Rwot in mayam iwaca ni, ‘Dong idok tuwu bot kakawu, an abitimi maber.’ 10An pe amyero kadi matidi mo ki mar meri ducu ma pe loke, ki ada meri ducu ma inyutu ikom an latici; pien con angolo kulu Jordan ma kun atye ki odoona keken, ci kombedi dong adoko lwak aryo kulu. 11Alegi ni ilara ki i cing omera, lara ki i cing Ecau; pien alwore, gwok nyo obibino ka neko wan ducu, mon ki lutinogi. 122Ento yam onongo iwaco ni, ‘Abitimi ber, abimiyo likwayi bedo macalo kweyo ma i dog nam, ma pe kwane pi dwonge.’”

13En obutu kenyo inino meno, okwanyo dul lim mogo mayam tye kwede ocwalo bot omine Ecau, 14megi dyegi miya aryo ki nyogi dyegi pyere aryo, megi romi miya aryo ki nyogi romi pyere aryo, 15megi kinaga ma kinyeto cakgi pyere adek ki lutinogi, megi dyangi pyere angwen ki twoni apar, megi kana pyere aryo ki twoni kana apar. 16En otingo magi ducu, ci omiyo i cing lutice, kun gilekogi dul ki dul patpat. Dok ociko lutice ni, “Wun wukat inyima, wek kinwu obed mabocoboco ka wutye kalekogi.” 17Ociko latel yo ni, “Ka omera Ecau oromo kwedi, ce openyi ni, ‘Wun jo pa anga? Wucito kwene? Lim man ma i nyimwuni pa anga?’ 18Ibiwace ni, ‘Lim pa latici Yakobo; gin aye mot ma ocwalo bot ladite Ecau; en bene pud odong cen ingewa.’” 19Dok omede ki ciko dano me aryo ki me adeke, ki gin ducu ma gileko lim, ocikogi ni, “Wubiloko lok ma romrom bot Ecau ka wuromo kwede. 20Wubiwaco bote ni, ‘Dok bene latici Yakobo aye odong cen ingewa.’” Onongo otamo ni, “Wek akwe cwinye ki mot ma ocito anyimi, ci lacen olo abineno wange twal, dok en bene gwok dong bijola.” 21Kitmeno mot okwongo nyime, kun en kikome obutu i gony idyewor meno.

Yakobo olwenyo i Peniel

22I dyewor meno en oa malo, ci okwanyo mone aryo, angecane aryo, kacel ki lutinone apar wiye acel, owoto ongolo kwedgi kulu Jabok. 23Okwanyogi, omiyo gungolo kulu, kacel ki lim ma en tye kwede ducu. 243 Yakobo odong kene; ci laco mo obino, ocako rete kwede nio wa kwarpiny. 25Ikare ma laco meno oneno ni pe dong etwero loyo Yakobo, ci otwomo awangmace; ci em Yakobo otuk owil woko lacungo ma en rete kwede. 26Laconu owace ni, “Weka dong aciti, pien piny dong mito ruu woko.” Ento Yakobo ogamo ni, “Pe abiweki, nio wang ma kong ilama gum.” 27Laconu openye ni, “Nyingi kono anga?” En owaco ni, “Yakobo.” 284Ci dok owace ni, “Nia tin nyingi dong pe kibilwongo ni Yakobo, ento ni Icrael,5 pien ibedo kalweny ki Lubanga, dok ki dano bene, ci imedo ki loyo.” 296Yakobo dok openye ni, “Alegi ni ituca nyingi do.” Ci en ogamo ni, “Ipenyo nyinga kono pingo?” Ci laconu omiye gum kakenyo. 30Ci Yakobo ocako nying kabedo meno ni, Peniel, kun waconi, “Pien atyeko neno Lubanga wang ki wang, ento pud akwo gira aye.” 31Ceng otuce i Peniel kun dong woto ma komo akoma pi eme ma otuk owil wokoni. 32Omiyo wa ikare man jo Icrael gikwero ringo puc me bam matye i awangmac, pien Lubanga otwomo Yakobo i ler awangmac.