Acaki 33

Yakobo ki Ecau dok gumer

1Yakobo oilo wange malo, ci oneno ka Ecau bino, kacel ki jone miya angwen, ci opoko lutino ikin Lea ki Lakeri ki bot angecane aryoni. 2Ocwalo angeca ki lutinogi anyim, ka dok Lea ki lutinone, ka dong Lakeri ki Yucepu gudong cen i korgi ducu. 3En kikome obole, ocito anyim, kun woto kulu wiye piny tyen abiro nio ka oo kwede cok bot omine.

4Ento Ecau otoke ki ngwec, oringo ka mote, ci opoto okwako kore, ka omako ngute, onoto leme, ci gucako koko. 5Ka dok Ecau oilo wange malo, ci oneno lwak mon ki lutinogi, ci owaco ni, “Maca kono jo mene ma gibinoni?” Ci Yakobo ogamo ni, “Meno aye gin lutino ma Lubanga omiyo ki latici pi kicane.” 6Ka angeca gunyiko cok, kacel ki lutinogi, ci gukulu wigi piny. 7Lea bene kitmeno kacel ki lutinone ka gunyiko cok ci gukulu wigi piny; me agikine Yucepu ki Lakeri gunyiko cok, gin bene guryebe piny. 8Ci Ecau owaco ni, “Lwak man ma arwate kwedgi ducu, teloke ango?” Yakobo ogamo ni, “Wek anong pwoc inyim ladita.” 9Ento Ecau owaco ni, “An atye ki ma roma, omera; wek lim man ducu gubed meri.” 10Ci Yakobo ogamo ni, “Aa, pe. Alegi ni, ka ineno an ayomo cwinyi, ci ber igam mot ma amiyi ki i cingani; pien ada, neno wangi, rom ki neno wang Lubanga, pi kit cwiny maber ma ijola kwedeni. 11Dong alegi igam mot ma amiyo gikelo botini, pien Lubanga dong onyutu kicane ikoma, dok bene atye ki mera ma roma.” Yakobo obedo karide ki lok meno, nio ka oye, ogamo mote.

12Lacen Ecau owaco ni, “Wek dong wanywaku yo kacel, kun atelo nyimi.” 13Ento Yakobo ogamo ni, “Ladita, ingeyo ni lutino pud peya gutegi, dok atye kagwoko romi ki dyangi ma pud gidoto lutinogi; ka wamiyogi wot malac, bibwoyogi woko, kadi bed pi nino acel, lim ducu gibito woko. 14Wek in ladita iwot, icit anyim inyim latici, kun an alubu kori motmot, muporo wot pa lim mutela yo, ki wot pa lutino, nio ka abio boti i Ceir.”

15Ci Ecau ogamo ni, “Wek awek boti jo mogo ma abino kwedgini.” Ento en owaco ni, “Meno pe bimite Ladita, tima ber, wek dong anong pwoc keken inyimi.” 16Kitmeno Ecau ocako wot inino meno me dok i Ceir. 17Ento Yakobo owoto odok mere tung Cukot, ogero ode pire kene dok oguro dwol dyangine. Ma omiyo nying kabedo meno gilwongo ni Cukot.1

18Lacen Yakobo oo ki kuc labongo ayela i gang me Cekem, matye i lobo Kanaan, kun oa ki i Paddan-aram; ci oguro kemane inyim gang. 192Dul latin lobo ma oguro iye kemani, owilo ki bot lutino pa Kamor, ma won Cekem, ki wel lim maromo wel ryal miya acel. 20Ci ocano keno tyer kunu, ci olwongo ni El-Eloe-Icrael.3