Acaki 34

Kironyo Dina

1Nino mo acel Dina nya pa Lea, ma onywalo ki Yakoboni, ocito kalimo mon ma i lobo meno. 2Cekem wod pa Kamor ma Lakiv, laker me lobo meno, onene, ci omake tektek obutu kwede. 3Ci cwinye omaro Dina nya pa Yakobo; ocako mare, kun loko kwede mot mupye. 4Cekem oloko ki wone Kamor ni, “Nyoma nyako man, wek obed dakona.” 5Ci Yakobo owinyo ni otyeko ronyo nyare Dina; ento onongo awobene gitye ki lime i olet. Yakobo odiyo cwinye, oling gire mot, nio ka gudwogo, 6Kamor won Cekem ocito bot Yakobo kapenyo keny. 7Ka awobe pa Yakobo guwinyo lok meno, gua ki i olet, gudwogo, ki keco, ki akemo madit, pien Cekem otimo gin ma pe myero i Icrael, pi butu ki nya pa Yakobo, pien kit tim macalo meno pe myero otime.

8Kamor oloko kwedgi kun waco ni, “Cwiny woda dong omaro nyarwu; alegowu, wuwek en onyom nyarwu, obed dakone. 9Wek nyome obed ikin wan kwedwu; wumii anyirawu botwa, wun bene wunyom anyirawa. 10Wun wubibedo kwedwa, wubibedo i loboni macalo wumito; wubed iye wucat iye wilwu, wek wulim iye lonyo.” 11Cekem bene owaco kitmeno bot won nyako ki omegine ni, “Ber wujol kenya, abikelo botwu lim ducu ma wubingola. 12Wungola wel lim kit ma wumito ducu ki me ayal, abikolo lim kit ma wubiwaca; ento wumiya anyom nyakoni obed dakona.”

13Awobe pa Yakobo gugamo dog Cekem ki wone Kamor kun gibwologi abwola, pien oronyo lamin gi Dina. 14Guwaco botgi ni, “Pe watwero timo tim man, me miyo laminwa bot dano ma pe giliro, meno bikelo lewic ikomwa. 15Tye yo acel keken; ma ka otime, ci bimiyo wabiye, en ene: ka wudoko macalo wan, ka dano acel acel ma laco ikinwu olire. 16Miyo wan dong wabimiyowu anyirawa, ki wan bene dong wabinyomo anyirawu; ci dong wabibedo ikinwu macalo wat acel. 17Ento ka pe wuwinyo lokwa, ka wukwero lire, ci wabikwanyo nyarwa, wabicito giwa.”

18Lokgi oyomo cwiny Kamor ki wode Cekem. 19Latin awobi orune katimone woko cut, pien onongo cwinye omaro nya pa Yakobo ma pe tite, onongo yam giwore makato jo ducu ma i ot pa wone. 20Kitmeno Kamor ki wode Cekem gucito i dog gangi, ci guwaco bot jo me ganggi ni, 21“Jo man gimer kwedwa; waweku gin gubed i lobowa, gucat wilgi iye; nen, loboni tye malac ma romogi; wuwek wanyom anyiragi, wek wamii gin bene gunyom anyirawa. 22Tye lok acel ma bimiyo giye bedo ikinwa, en aye bedo wat acel, ka laco acel acel ikinwa bilire, kit macalo gin gilire. 23Pe limgi, ki lonyogi ki lwak lee matye i cinggi ducu gibidoko limwa? Ber waye lokgi wek gubed kwedwa.” 24Ci jo ducu ma guwok ki i dog gang guwinyo lok pa Kamor ki wode Cekem; ma omiyo co ducu ki acel acel gulire woko.

Omegi Dina guculu kwor pi ronye

25Inino me adeke, madong bur okwok, ci awobe pa Yakobo aryo, Cimeon ki Levi, omegi Dina, gukwanyo pala lucwan, gucito, guturu ki donyo i gang meno ma wegine pe gingeyo, ci guneko co woko ducu. 26Ci guneko Kamor ki wode Cekem ki pala lucwan, ci gukwanyo Dina woko ki i ot pa Cekem, gucito kwede. 27Awobe pa Yakobo gucore i gang pa luto, guyako iye jamigi pi ronyo lamingi. 28Guyako dyegigi ki dyangigi, ki lwak kana, ki jami ducu matye i gang ki matye i poti bene. 29Guyako lwak lonyogi ducu, ki lutinogi ducu ki mon gi, ki jami ma i odigi ducu, gutero odoko meggi. 30Ci Yakobo owaco bot Cimeon ki Levi ni, “Wun wukelo ayela ikoma, wumiyo nyinga odoko ngwe lituny ikin wegi loboni, Lukanaan ki Luperiji; An lwaka nok mo, kace gucoke kacel me lweny kweda, gibityeka woko liweng, an kacel ki oda ducu.” 31Ento gugamo ni, “Nen ma myero ka dong en otero laminwa macalo lakwele bo?”