Acaki 35

Lubanga omiyo Yakobo gum i Betel

11

Lubanga owaco ki Yakobo ni, “A woko icit i Betel, wek ibed kunu; dok ican keno tyer kunu kama yam an anen iye boti ikare ma iringo ilwii woko ki bot omeru Ecau.” 2Omiyo Yakobo owaco bot jo ma i ode ki jo ducu ma gibedo bote ni, “Wubol lwak cal lubanga pa lurok ma wutye kwedgi ikinwuni woko, wek wulonye kenwu, dok bene wulok ginarukawu woko; 3ka dong wa ayu, wacitu woko wa i Betel, wek acit acan keno tyer pi Lubanga mayam ogamo doga inino mayam can odingani, ma obedo kweda ikabedo ducu ma awoto iye.” 4Gumiyo ki Yakobo cal ducu, ki agit ma nongo tye i itgi bene; ci cal lubanga pa lurok ma gitye kwede Yakobo oyikogi piny ite yat kworo mayam tye cok ki Cekem.

5Ikare ma Yakobo ki awobene gucako wot, lworo ma oa ki bot Lubanga opoto ikom wegi taun matye cok kwedgi, omiyo pe gulubu kor awobe pa Yakobo. 6Yakobo otiro i Luj ma en aye Betel, matye i lobo Kanaan, en kacel ki lwak dano ducu mayam gitye kwede. 7En ocano keno tyer kunu, ci olwongo nying kabedo meno ni El-betel2 pien onongo Lubanga yam onen iye bote ikare ma olwi oringo woko ki bot omine. 8Debora lakony Labeka oto woko, ci kiyike ite yat kworo ma inget Betel; ma omiyo nying kabedo meno kilwongo ni Alon-bakut.3

9Lubanga dok onyute bot Yakobo ikare ma en oa ki i Mesopotamia, ci omiye gum. 104 Lubanga owace ni, “Nyingi Yakobo; pe dok kibilwongo nyingi ni Yakobo, ento nyingi dong bibedo Icrael.” Omiyo nyinge odoko Icrael. 115 Lubanga dok owace ni, “An Lubanga Matwero ducu; nywal, inya; rok ki lwak rok mapol bia ikomi, ki luker bene gibia ki ikomi. 12Lobo mayam amiyo ki Abraim ki Icaka abimiyo boti, ka dok abimiyo lobo bot likwayi ma gibilubi.” 13Lubanga oa ki ikabedo kama yam oloko iye kwedeni odok malo. 146 Ci Yakobo ocibo wir ikabedo kama oloko ki Lubanga iyeni, ocibo iye wir got; oonyo gityer amata, ka oliyo moo ikome. 15Yakobo olwongo nying kabedo ma Lubanga oloko iye kwedeni ni Betel.

To pa Lakeri

16Yakobo ki jone gumede ki wot nia ki i Betel. Ikare ma pud Eprat kiborbor, ci mwoc ogoyo Lakeri, ci nyodone obedo tek. 17Ikare madong arem omede matek, dako lacolo owace ni, “Pe ilwor; tin doki ibinywalo latin laco mukene.” 18Ikare ma en to ma cwinye cok ka tum, ocako nying latine ni Benoni; ento wone ocako nyinge ni Benjamin. 19Lakeri oto woko kitmeno, ci guyike i yo ma cito Eprat, ma en aye Beterekem. 20Yakobo ocibo wir got iwi lyel pa Lakeri; meno wir lyel pa Lakeri ma pud tye ocung kunu nio wa ikare man. 21Icrael omede ki wote, ogony inge lubele me Eder ma wiye ocudu malo.

Awobe pa Yakobo

(1 Tek 2:1-2)

227

Ikare ma Icrael tye i lobo meno, ci wode Reuben otimo tim caro, obutu ki ciwone Bila ma angeca; ci wone owinyo pire bene.

Yakobo yam tye ki awobene apar wiye aryo. 23Lutino awobe pa Lea gin aye Reuben, latin kayo pa Yakobo, Cimeon, Levi, Juda, Icakar ki Jabulon. 24Lutino awobe pa Lakeri gin aye Yucepu ki Benjamin. 25Lutino awobe pa Bila, angeca pa Lakeri, gin aye Dan ki Naputali. 26Lutino awobe pa Jilpa, angeca pa Lea, gin aye Gad ki Acer. Meno gin aye lutino awobe pa Yakobo ma kinywalogi i Mesopotamia.

To pa Icaka

278

Yakobo obino bot wone Icaka i Mamre, i Kiriat-arba, en aye Kebron kama yam Abraim ki Icaka gubedo iye. 28Icaka yam orii iwi lobo mwaka miya acel ki pyere aboro. 29Icaka oomo cwinye me agiki ka dong oto. En onongo dong dano ma oteggi mada; ci awobene Ecau ki Yakobo guyiko kome.