Acaki 31

Yakobo olwi woko ki bot Laban

1Yakobo obedo kawinyo ni awobe pa Laban giwaco ni, “Yakobo dong otero lim pa wonwa woko ducu, oguru lonyo nia ki ikom lee pa wonwa.” 2Yakobo oneno ni wang Laban ocido woko ikome, pe dong nene maber kit macon. 3Ikare meno Rwot owaco bot Yakobo ni, “Dong idok cen i lobo pa kwarowu bot lutuwu, an abibedo kwedi.”

4Ci Yakobo olwongo Lakeri ki Lea i bar olet kama lime tye iye, 5ci owaco botgi ni, “An aneno wang wonwu dong ocido woko ikoma, pe dong nena maber kit macon. Ento Lubanga pa wora yam tye kweda. 6Wun wungeyo ni atyeko tic bot wonwu ki teka ducu; 7ci en obedo kabura kun dwoko mucarana piny tyen apar kulu, ento Lubanga pe oye en me timo gin mo marac ikoma. 8Ka owaco ni, ‘Lim ma abacabac bibedo meri me mucarani,’ ci lee ducu ginywal ma obedo abacabac keken. Ka dok oloko doge ni, ‘Lee ma gibedo akolakol gin aye bibedo meri me mucarani,’ ci lee ducu dok ginywal akolakol. 9Meno aye kit ma Lubanga okwanyo kwede lim pa wonwu ci omiyogi bota.”

10“Ikare ma giyitogi megine, ailo wanga malo ki iwang lek, ci aneno nyogi ma gitigo megine komgi obedo akolakol ki abacabac ki opukopuk. 11Lamalaika pa Lubanga oloko kweda iwang lek ni, ‘Yakobo,’ an agamo ni, ‘An a ene!’ 12Ci owaca ni, ‘Il wangi malo wek inen, nyogi ducu ma gitigo megineni gubedo akolakol ki abacabac ki opukopuk; pien atyeko neno kit ma Laban timi kwede. 131 An Lubanga mayam anyute boti i Betel, kama yam i wiro iye wir ki moo, ka ikwongo iye kwong botani. Dong ia malo, icit woko cen ki i lobo man, idok i lobo ma kinywali iye ca.’” 14Lakeri ki Lea gugamo ni, “Tye dok dul lim mo nyo ginaleya mo ma dok odong pirwa i ot pa wonwa? 15En dong nenowa macalo lurok ata. En dong otyeko catowa woko, dok tye kacamo bene lim ma kimiyo pirwa woko. 16Lim ducu madong Lubanga otyeko kwanyo ki bot wonwa dong mewa ki pa lutinowa; dong gin ducu ma Lubanga owaco ni aye itim.”

17Ci Yakobo oa, oketo awobene ki mone iwi kinaga, 18oleko lime ducu, mayam onongo i Paddan-aram; ci ocako wot me dok i lobo Kanaan bot Icaka. 19Laban onongo ocito kangolo yer kom romine, ci Lakeri okwalo cal lubanga ki i ot pa wone. 20Yakobo obwolo Laban La-aram kun pe otite pi wote. 21Olwi ki lwak lim ducu mayam tye kwede, ka ocako wot, ongolo nam Euprate, ci okemo lobo godi me Gilead.

Laban olubu kor Yakobo

22Ka nino okato adek kulu, ci kitito bot Laban ni, “Yakobo dong otyeko lwi, ocito woko.” 23En ogware ki lutugi, gutware, gulubu kore; ka guwoto nino abiro, ci gudingo kore cokcok ikin godi me Gilead. 24Ento Lubanga obino bot Laban La-aram iwang lek, kun wace ni, “Gwoke, pe icilok lok mo maber nyo marac bot Yakobo.”

25Laban omako Yakobo i yo. Onongo dong otyeko gony woko i lobo godi, ci Laban ki lutugi gugony i lobo godi meno me Gilead. 26Ci Laban owaco bot Yakobo ni, “Itimo tim kuman pingo?, Ibwola kit man, dok itingo anyirana, kun ilwii kwedgi, macalo iyakogi ayaka ki i dog lweny. 27Pingo ilwii woko alwiya i mung alii, kun iumu wanga ma pe itita gin mo? Ka onongo itita kono nene aciki ki yomcwiny ki wer ki ajaa ki opuk. 28Pingo pe iweko aciko lutinona kun anoto lem anyirana? Man itimo gin me mingo atika. 29Onongo atwero timi marac; ento Lubanga pa woru oloko kweda tin idyewor, ocika ni ‘Gwoke pe icilok lok mo maber nyo marac bot Yakobo.’ 30Man dong ia icako wot woko, pien pi ot pa woru odoko miti mada; ento dok ikwalo ki cal lubangana me ngo kono?” 31Yakobo ogamo dog Laban ni, “Onongo abedo ki lworo, abedo ka tamoni gwok nyo ibimayo anyirani woko ki bota.” 32Ento ka ibinongo cal lubangani bot ngat mo kany, ngat meno pe bikwo. Cim koni jamini ma inongo tye bota kany inyim utmegiwa ci ikwany idok giri kwede, “Onongo Yakobo pe ongeyo ni Lakeri aye ma okwalogi.”

33Kitmeno Laban ocako donyo i kema pa Yakobo, ki i kema pa Lea, ki i kema pa mon angeca aryonu ducu, ci pe omedo ki nongogi; ka okato woko ki i kema pa Lea, dok odonyo i kema pa Lakeri. 34Ikare meno onongo Lakeri otingo lubanganu, ci orwakogi ikom me bedo iwi kinaga; ci obedo iwigi. Laban ongiyo jami ma i kema ducu, pe omedo ki nongogi. 35Lakeri owaco bot wone ni, “Ladita, pe kiniga omaki ikoma ka ineno ni pe atwero a malo inyimi, pien atye ikit pa wan mon.” Kitmeno Laban oyenyo cal lubangane kwe, pe omedo ki nongogi.

36Omiyo kiniga omako Yakobo, ci oda ki Laban, kun waco bot Laban ni, “Balla dong tye kwene ka? Atimo bal ango, ma omiyo ilubu kora tutwali? 37Kadi bed iyenyo ikin jamina ducu, kit gin ango ma inongo ikom jami ducu ma oa i odi? Kel iket kany inyim utmegini ki utmegina, wek gungol kop ikin wan aryoni. 38An abedo kwedi mwaka pyere aryo kulu; pe tye megi romini ki megi dyegini mo ma iye opoto, pe bene acamo nyok romoni mo. 39Kare ducu ka nguu omwodo lee mo, pe amedo ki kelo ringone boti, ento an aye aculu gira; lim ma kikwalo i dyeceng ki idyewor bene ducu iweko an aye aculu pire. 40Yam abedo kitmeno, kun ceng wanga dyeceng, koyo neka dyewor, pe aketo nino mo i wanga. 41I lwak mwaka pyere aryo kulu ma abedo kwedi i odini, atiyo boti mwaka apar wiye angwen pi anyirani aryoni, ki mwaka abicel pi limi, ibedo kadwoko mucarana piny tyen apar kulu. 42Kace Lubanga pa wora, Lubanga pa Abraim ma Icaka bene lworo, pe obedo tung bota, kono tin icwala adok tuwa ki cinga nongo adada. Lubanga oneno twon aromana, ki tic ma atiyo ki cinga ci tin dyewor bene ojuki.”

Yakobo ki Laban gucike

43Laban ogamo kun dok iye bot Yakobo ni, “Anyira man gin anyirana, ki lutino bene gin lutinona, lim bene gin lima, ki gin ma inenoni gin ducu lima. Ento pe dong atwero timo gin mo ikom anyiranani, nyo ikom lutinogi ma gunywalo. 44Dong ibin wek waket gicike ikin in ki an, me bedo caden ikin in ki an.” 45Ci Yakobo otingo got ocibo wek obed wir. 46Ka Yakobo owaco bot utmegine ni, “Wucok got,” ci gucoko got, guguru kacel, ka gucamo cam inget odur got meno. 47Laban ocako nying kabedo meno ni Jegarcaduta; ento Yakobo ocako nyinge ni Galeed. 48Laban owaco ni, “Odur got man en aye caden ikin in ki an tin.” Ma omiyo ocako nyinge Galeed. 49Laban ocako nying kabedo meno ni Mijpa, pien owaco ni, “Rwot ogwok kin an ki in, ka kinwa dong bipoke woko. 50Ka ibiketo gingi marac ikom anyirana, nyo ka dok ibinyomo mon mukene, idodogi ikom anyirana, kadi ngat mo pe tye kwedwa, ber ipo ni Lubanga en aye caden ikin in ki an.”

51Ci Laban dok owaco bot Yakobo ni, “Nen odur man, ki wir ma atyeko cibo ikin in ki an. 52Odur man aye caden, ki wir bene en caden, an pe abikato ka nget odur man pi cito boti, in bene pe ibikato ka nget odur man ki wir man pi cito bota, ni pi tim marac. 53Lubanga pa Abraim, Lubanga pa Nakor, Lubanga pa won gi, obed langolkop ikinwa.” Ci Yakobo okwongo kwong ki nying Lubanga ma wone Icaka lworo. 54Yakobo otyero gitum iwi got, kun olwongo iye utmegine ducu kacamo cam kwede, ci gucamo gubutu kunu iwi got.

55Ka piny oru odiko con, Laban oa, onoto lem likwaye ki lem anyirane, olamo gum ikomgi, ci opoke kwedgi odok i gange.